Aisaia
46 Bel* i bendaun,+ Nebo* i brukim baksait i go daun.
Ol man i putim ol imis bilong tupela antap long ol animal, antap long ol animal i save karim kago,+
Olsem kago i save putim hevi long ol animal i no gat strong.
2 Tupela i bendaun na brukim baksait i go daun wantaim;
Tupela i no inap long kisim bek ol dispela hevi kago,*
Na tupela yet i go kalabus.
3 “Putim yau long mi, O lain bilong Jekop, na hap lain bilong Israel i stap yet,+
Yupela lain em mi bin sapotim stat long taim yupela i bon, na mi bin lukautim yupela taim yupela i stap yet long bel.+
4 I go inap yupela i kamap lapun, mi bai stap wankain tasol;+
I go inap gras bilong yupela i kamap waitpela, mi bai sapotim yupela yet.
Olsem mi bin mekim bipo, mi bai karim yupela na sapotim yupela na kisim bek yupela.+
5 Yupela inap makim husat na tok mi wankain stret olsem em, o skelim mi wantaim em+
Bilong soim olsem mitupela i wankain?+
6 I gat sampela man husat i save rausim planti gol tru long paus bilong ol;
Ol i putim silva long skel na ol i skelim.
Ol i haiarim wanpela saveman bilong wokim ol samting long ain samting, na em i mekim i kamap wanpela god.+
Bihain ol i putim pes i go daun long ai bilong en, yes ol i lotu long en.*+
7 Ol i apim i go long solda bilong ol;+
Ol i karim i go na putim long ples bilong en, na em i sanap i stap tasol long hap.
Em i no save muv na lusim ples em i sanap long en.+
Ol i krai long en, tasol em i no save bekim;
Em i no inap kisim bek wanpela man long pen na hevi em i karim.+
8 Tingim dispela, na strongim bel.
Tingim gut long bel, yupela ol man i save mekim sin.
9 Tingim ol samting i kamap pastaim long bipo tru,
Olsem mi God, na i no gat narapela moa i stap.
Mi God, na i no gat wanpela god i wankain olsem mi.+
10 Kirap long taim wanpela samting i kamap, mi save tokaut long dispela samting bai pinis olsem wanem,
Na long bipo yet mi save tokaut long ol samting i no kamap yet.+
Mi tok, ‘Ol samting mi wokim disisen pinis long en* bai kamap tru,+
Na mi bai mekim wanem wanem samting mi laik mekim.’+
11 Mi singautim wanpela pisin tarangau long hap bilong sankamap,*+
Long wanpela longwe kantri, mi singautim wanpela man long karimaut disisen bilong mi.*+
Mi bin tok pinis, na mi bai mekim i kamap dispela samting olsem mi tok.
Samting mi tingting pinis long mekim, mi bai mekim tu dispela samting.+
12 Putim yau long mi, yupela ol manmeri em bel bilong yupela i pas strong,
Yupela ol manmeri husat i stap longwe long stretpela pasin.
13 Mi bringim stretpela pasin bilong mi i kam klostu;
Em i no stap longwe,
Na taim bilong mi long kisim bek ol manmeri i no ken kamap bihaintaim.+
Mi bai kisim bek ol manmeri long Saion, em naispela samting tru mi givim long Israel.”+