Aisaia
13 Dispela em wanpela strongpela tokaut long samting bai painim Babilon+ em Aisaia,+ pikinini man bilong Emos, i bin lukim long wanpela visen:
2 “Sanapim wanpela signal pos*+ antap long wanpela maunten i no gat ol diwai long en.
Singaut i go long ol, tromoi han bilong yupela,
Na bai ol i ken kam insait long ol geit bilong ol bikman.
3 Mi salim pinis tok i go long ol man mi bin makim.+
Mi singautim ol soldia bilong mi i kam bilong kamapim belhat bilong mi,
Ol dispela soldia i amamas na hambak moa yet.
4 Harim! Wanpela bikpela lain i stap long ol maunten;
Nois bilong ol i olsem bilong planti man tru!
Harim! Bikpela nois bilong ol kingdom,
Bilong ol kantri i bung wantaim!+
Jehova, bosman bilong bikpela lain ami, i bungim ol ami bilong mekim pait.+
5 Ol i kam long wanpela longwe kantri,+
Long longwe ples tru aninit long skai,
Jehova na ol wepen bilong bikpela belhat bilong em i kam,
Bilong bringim bagarap long olgeta hap bilong graun.+
6 Krai bikpela, long wanem, de bilong Jehova i kam klostu pinis!
Dispela de bai kam olsem wanpela bikpela bagarap em God i Gat Olgeta Strong i bringim.+
7 Olsem na olgeta han bai slek na hangamap nating,
Na pret bai mekim na bel bilong olgeta man bai kamap olsem wara.+
8 Ol manmeri i pret na tingting bilong ol i no stap isi.+
Bikpela pen tru i kisim ol,
Olsem pen bilong meri i laik karim pikinini.
Ol i pret tru na lukluk long narapela narapela,
Bikpela wari i mekim na pes bilong ol i ret.
9 Lukim! De bilong Jehova i wok long kam wantaim bikpela kros na belhat i lait olsem paia,
Dispela de i no inap marimari long wanpela man.
Em bai mekim kantri i kamap samting em ol man bai lukim na pret long en,+
Na long bagarapim na pinisim ol man bilong mekim sin i stap long en.
10 Ol sta long skai na ol lain sta bilong ol*+
Bai i no givim lait bilong ol;
San bai tudak taim em i kam antap,
Na mun i no inap lait.
11 Mi bai askim ol manmeri bilong graun long tokaut long pasin nogut bilong ol,+
Na ol man nogut long tokaut long asua bilong ol.
Bai mi pinisim pasin hambak bilong ol man i gat pasin antap,
Na bai mi daunim pasin antap bilong ol hatpela bos.+
12 Bai mi mekim namba bilong ol man i go liklik moa yet winim namba bilong gutpela gol tru,+
Na namba bilong ol man i go liklik moa yet winim namba bilong gol bilong Ofir.+
13 Olsem na bai mi mekim skai i guria,
Na graun bai seksek na lusim ples bilong en+
Taim mi, Jehova, bosman bilong bikpela lain ami, i kamapim bikpela kros bilong mi long de bilong belhat bilong mi i lait olsem paia.
14 Olsem wanpela gasel* em ol man i wok long painim bilong kilim i dai na olsem wanpela lain sipsip i no gat man bilong bungim ol,
Olgeta wan wan man bai go bek long lain bilong ol yet;
Olgeta wan wan man bai ranawe i go long graun bilong ol yet.+
15 Wanem man ol i painim, ol bai sutim em,
Na wanem man ol i holim, ol bai kilim em i dai long bainat.+
16 Ol bai paitim nogut tru ol pikinini bilong ol na kilim ol i dai long ai bilong ol,+
Ol bai stilim ol samting long ol haus bilong ol,
Na reipim ol meri bilong ol.
17 Nau mi bai kirapim ol Midia long go pait long ol,+
Em lain husat i save tingim silva i olsem samting nating
Na ol i no save amamas long gol.
18 Ol banara bilong ol bai brukbrukim ol yangpela man;+
Ol i no inap sori long ol bebi i stap long bel bilong mama
O marimari long ol pikinini.
19 Babilon, em nambawan tru na i winim ol arapela kingdom,+
Em i kantri we i nais tumas na ol Kaldia i save hambak long en,+
Em bai kamap olsem Sodom na Gomora taim God i bin daunim ol.+
20 Ol manmeri i no inap stap moa long en,
Na long olgeta lain i kamap bihain bihain, em i no inap stap moa olsem ples we ol man i ken stap long en.+
I no gat wanpela man Arab bai sanapim haus sel bilong em long dispela hap,
Na i no gat wanpela wasman bai bringim ol sipsip bilong em i kam malolo long hap.
21 Ol animal bilong ples nating bai slip long hap;
Ol pisin aul bai pulap long ol haus bilong ol.
22 Ol animal bai singaut insait long ol taua bilong en,
Na ol jekol* bai stap long ol bikpela na naispela haus king bilong en.
Taim bilong en i kam klostu pinis, na em i no gat planti de moa i stap.”+