Aisaia
34 Yupela ol kantri, kam klostu na harim,
Na yupela ol manmeri, putim gut yau.
Graun na olgeta samting i stap long en i mas harim,
Graun na olgeta samting em i kamapim.
Em i tok pinis long ol i mas bagarap;
Em bai kilim ol i dai.+
3 Bodi bilong ol manmeri bilong ol em ol i kilim i dai bai slip nabaut long graun,
Na smel nogut bilong bodi bilong ol bai i go antap;+
Ol maunten bai melt bikos long blut bilong ol.+
4 Olgeta ami bilong heven bai sting na pinis,
Na ol bai rolim heven olsem man i rolim wanpela skrol.
Strong bilong olgeta ami bilong ol bai pinis,
Olsem lip long rop wain i drai na i pundaun
Na olsem wanpela fik i drai long diwai fik.
5 “Bikos long heven, bainat bilong mi bai karamap long blut.+
Em bai kam daun long Idom long mekim kot+
Long ol manmeri em mi tok pinis long ol i mas bagarap.
6 Jehova i gat wanpela bainat; em bai karamap long blut.
Em bai karamap long gris,+
Na blut bilong ol yangpela sipsip man na ol meme,
Na gris bilong ol kidni bilong ol sipsip man.
Jehova i mekim wanpela sakrifais long Bosra,
Em i kilim i dai planti manmeri long graun bilong Idom.+
7 Ol wel bulmakau bai go daun wantaim ol,
Ol yangpela bulmakau wantaim ol strongpela bulmakau.
Blut bai karamapim graun bilong ol,
Na gris bai karamapim das long graun bilong ol.”
8 Bikos Jehova i makim pinis taim bilong bekim pe long ol birua bilong em,+
Yia bilong bekim pe bilong helpim Saion long kot.+
9 Ol hanwara bilong en* bai senis i kamap kolta,
Na das bilong en bai kamap salfa,
Na graun bilong en bai kamap olsem kolta i paia i stap.
10 Long nait na san, paia bilong en bai i no inap dai;
Smok bilong en bai i wok yet long go antap inap oltaim oltaim.
Ol jeneresen i kam na i go, em bai bagarap i stap olsem;
I no gat wanpela man bai wokabaut moa long en inap oltaim oltaim.+
11 Em bai kamap ples bilong ol pisin peliken na ol pokipain,*
Na ol pisin aul i gat longpela yau na ol kotkot bai stap long em.
God bai pulim rop bilong mesarim dispela graun bilong soim olsem bai i no gat wanpela samting i stap long en, na em bai bagarap i stap,
Na em bai pulim tu string bilong mesarim bagarap.
12 I no gat wanpela bikman bilong em bai kisim wok king,
Na olgeta prins bilong em bai i no stap moa.
13 Ol liklik diwai i gat nil nil bai gro insait long ol strongpela taua bilong em,
Ol plaua i gat mosong na ol gras nogut bai gro insait long ol strongpela banis bilong em.
14 Ol animal bilong ples nating bai bung wantaim ol animal i save krai na singaut,
Na wel meme* bai singaut long poroman bilong em.
Yes, pisin bilong nait bai painim ples malolo long hap na stap long en.
15 Long dispela hap, wanpela snek bai wokim haus bilong en na putim ol kiau,
Na ol kiau bai bruk na em bai bungim ol pikinini bilong en aninit long sedo bilong en.
Yes, ol pisin kait bai bung long dispela hap, olgeta wan wan wantaim ol pisin man bilong ol.
16 Painim insait long buk bilong Jehova na ritim strong ol tok bilong en:
I no gat wanpela bilong ol bai i lus;
Olgeta bilong ol bai gat poroman bilong ol,
Bikos maus bilong Jehova yet i mekim dispela tok,
Na spirit bilong em yet i bin bungim ol wantaim.
17 Em i dispela Man husat i makim samting ol bai kisim,
Na han bilong em yet i bin mesarim ol ples em i makim bilong ol.*
Ol bai kisim dispela ples inap oltaim oltaim;
Ol bai stap long en inap oltaim oltaim.