Buk Song
Tok i go long dairekta. Jedutun.*+ Devit i raitim dispela song.
39 Mi tok olsem: “Mi bai was gut long wokabaut bilong mi
Na long dispela rot, mi bai no ken mekim sin long toktok* bilong mi.+
Mi bai karamapim maus bilong mi na was gut long tok mi mekim+
Taim mi stap long ai bilong ol man nogut.”
2 Mi bin pasim maus na mi no mekim wanpela tok.+
Na mi no mekim wanpela tok long gutpela samting tu,
Tasol pen mi pilim i bikpela moa yet.
3 Paia i lait isi isi* insait long bel bilong mi.
Na taim mi tingting i stap, dispela paia i wok long lait i stap.
Olsem na mi tok:
4 “Jehova, helpim mi long save wanem taim laip bilong mi bai pinis,
Na hamas yia mi bai stap laip,+
Na bai mi ken save laip bilong mi i sotpela olsem wanem.
5 Tru tumas, yu mekim na ol yia mi stap laip i sotpela tru;*+
Na long ai bilong yu, haptaim mi stap laip em i samting nating.+
Tru tumas, maski olgeta man i stap gut, ol i olsem win i kamap long maus tasol.+ (Selah)
6 Laip bilong ol man i olsem sedo.
Hatwok bilong ol i save lus nating.
Ol i save bungim planti mani kago, tasol ol i no save husat bai kisim ol dispela samting.+
7 Jehova, mi bai bilip na wet long wanem samting?
Mi bai bilip na wet long yu tasol.
8 Olsem na kisim bek mi long olgeta sin bilong mi.+
Na no ken larim ol krankiman i tok bilas long mi.
9 Mi no mekim wanpela tok;
Mi no inap opim maus bilong mi,+
Long wanem, yu yet i mekim ol dispela samting i kamap.+
10 Rausim dispela hevi yu putim long mi.
Mi bagarap stret, long wanem, han bilong yu i paitim mi.
11 Yu save mekim save long man bilong stretim em long rong em i bin mekim;+
Yu save pinisim olgeta samting em i laikim tumas olsem binatang i save kaikai klos.
Tru tumas, olgeta man i olsem win i kamap long maus tasol.+ (Selah)
12 Jehova, yu mas harim beten bilong mi,
Putim yau long singaut bilong mi na helpim mi.+
Na yu no ken givim baksait long aiwara bilong mi.
Long ai bilong yu, mi olsem man bilong narapela ples,+
Wankain olsem ol tumbuna papa bilong mi, em ol i save lusim wanpela ples na i go long narapela ples.+
13 Yu no ken belhat na lukluk long mi, na bai mi ken amamas gen
Paslain long mi dai na mi no stap moa.”