Buk Song
Devit i raitim dispela song.
141 O Jehova, mi singaut long yu.+
Kam hariap na helpim mi.+
Putim yau taim mi singaut long yu.+
2 Mi laik bai yu kisim beten bilong mi olsem smok i gat gutpela smel+ i go long yu,+
Na taim mi apim han na beten, mi laik bai dispela i olsem ofa bilong wit samting long apinun tru.+
3 O Jehova, helpim mi long was gut long maus bilong mi,
Na helpim mi long mi no ken mekim tok i no gutpela.+
4 No ken larim bel bilong mi i kirap long mekim pasin nogut,+
Na no ken larim mi bung wantaim ol man nogut na mekim pasin nogut;
Mi no laik kaikai ol gutpela kaikai bilong ol.
5 Sapos stretpela man i paitim mi, dispela i olsem em i mekim gutpela pasin laikim* long mi;+
Sapos em i stretim mi, dispela i olsem oil long het bilong mi,+
Na het bilong mi bai laikim dispela.+
Mi bai wok yet long beten long ol, na long taim ol i karim hevi tu.
6 Ol i tromoi ol jas bilong ol i go daun long klif,
Tasol ol manmeri bai putim gut yau long tok bilong mi, long wanem, tok bilong mi i gutpela.
7 Ol i bin tromoi nabaut ol bun bilong mipela long Matmat,*
Wankain olsem man i brukim graun na i tromoi nabaut.
8 Tasol mi lukluk long yu, O Nambawan Bikpela Jehova.+
Mi go long yu bilong yu ken i stap ples hait bilong mi.
Yu no ken larim mi lusim laip bilong mi.
9 Banisim mi na bai mi no ken pas long trap em ol i putim bilong holimpas mi,
Em ol trap bilong ol man nogut.
10 Long seim taim ol man nogut bai pundaun long ol trap ol yet i putim+
Tasol mi bai wokabaut gut i go na i no gat wanpela samting bai bagarapim mi.