Aisaia
50 Dispela em tok bilong Jehova:
“We stap divos setifiket+ bilong mama bilong yupela em mi bin salim em i go?
O mi bin salim yupela long wanem ol man em mi gat dinau long ol?
Harim! Long ol rong bilong yupela yet,+ yupela i kamap ol kalabusman,
Na bikos long ol sin bilong yupela, ol birua i bin salim mama bilong yupela i go.+
2 Orait wai na i no gat man i stap hia taim mi kam?
Wai na taim mi singaut i no gat man i bekim?+
Olsem wanem? Han bilong mi i sot na mi no inap kisim bek* yupela?
O mi no gat strong long kisim bek yupela?+
Ol pis bilong ol i sting bikos i no gat wara,
Na ol i dai bikos ol i no inap dring wara.
3 Mi mekim bikpela tudak i karamapim skai,+
Na mi mekim na klos bilong sori i kamap klos bilong ol.”
4 Nambawan Bikpela Jehova i givim mi maus olsem bilong ol man i bin kisim skul pinis,+
Olsem bai mi inap save hau long bekim tok long* ol man i no gat strong na mekim tok i stret.+
Em i kirapim mi long olgeta moning;
Em i kirapim yau bilong mi long harim tok olsem bilong ol man i bin kisim skul pinis.+
Mi no bin tanim i go long narapela rot.+
6 Mi givim baksait bilong mi i go long ol man i paitim mi
Na mi givim wasket bilong mi i go long ol man na ol i kamautim olgeta mausgras bilong mi.
Mi no haitim pes bilong mi long ol samting i semim mi na long ol man i spetim mi.+
7 Tasol Nambawan Bikpela Jehova bai helpim mi.+
Olsem na bai mi no inap pilim sem.
Olsem na mi strongim mi yet olsem wanpela strongpela ston,+
Na mi save olsem ol man i no inap semim mi.
8 Dispela Man husat i tokaut olsem mi stretpela man, em i stap klostu.
Husat inap sutim tok long* mi?+
Kam na yumi feisim narapela narapela.
Husat i gat kot keis agensim mi?
Larim em i kam long mi.
9 Harim! Nambawan Bikpela Jehova bai helpim mi.
Husat inap tokaut olsem mi gat asua?
Harim! Olgeta bai wok long bagarap olsem laplap i bagarap.
Binatang bai kaikaim ol na pinisim ol.
10 Husat namel long yupela i save pret long Jehova
Na harim tok bilong wokman bilong em?+
Husat i bin wokabaut long bikpela tudak na i no gat lait?
Em i mas bilip tru long nem bilong Jehova na sapotim em yet long God bilong em.
11 “Harim! Yupela olgeta husat i kirapim paia,
Mekim liklik hap paia i sut nabaut,
Wokabaut long lait bilong paia bilong yupela,
Namel long ol liklik hap paia yupela i bin laitim.
Yupela bai kisim dispela samting long han bilong mi:
Yupela bai pilim bikpela pen na slip i go daun.