Namba

9 Long namba 1 mun+ bilong namba 2 yia bihain long ol Israel i lusim Isip, Jehova i toktok wantaim Moses long ples nating bilong Sainai, na em i tok: 2 “Ol Israel i mas redim sakrifais bilong Pasova+ long taim stret bilong en.+ 3 Long namba 14 de bilong dispela mun long apinun tru,* yupela i mas redim sakrifais bilong Pasova long taim stret bilong en. Yupela i mas bihainim olgeta lo na pasin bilong redim dispela sakrifais.”+

4 Orait Moses i tokim ol Israel long redim sakrifais bilong Pasova. 5 Na ol i redim sakrifais bilong Pasova long ples nating bilong Sainai long namba 14 de bilong namba 1 mun long apinun tru.* Ol Israel i mekim olgeta samting olsem Jehova i bin tokim Moses.

6 Tasol sampela man i bin tatsim bodi bilong man i dai pinis+ na ol i kamap doti, olsem na ol i no inap redim sakrifais bilong Pasova long dispela de. So ol i go lukim Moses na Aron long dispela de,+ 7 na ol i tokim em: “Mipela i tatsim bodi bilong man i dai pinis, olsem na mipela i no klin. Tasol bilong wanem mipela i no ken mekim dispela ofa long Jehova long taim stret bilong en wantaim ol arapela manmeri bilong Israel?”+ 8 Na Moses i tokim ol: “Wet liklik. Bai mi askim Jehova long wanem samting yupela i mas mekim.”+

9 Na Jehova i tokim Moses olsem: 10 “Yu mas tokim ol Israel, ‘Sapos wanpela bilong yupela o wanpela tumbuna pikinini bilong yupela i kamap bihain i tatsim bodi bilong man i dai pinis+ na em i kamap doti o em i go long wanpela longwe ples, orait em i mas redim yet sakrifais bilong Pasova long Jehova. 11 Ol i mas redim sakrifais bilong Pasova long namba 14 de bilong namba 2 mun+ long apinun tru.* Ol i mas kaikai mit bilong dispela sakrifais wantaim bret i no gat yis na kumu i pait.+ 12 Ol i no ken brukim wanpela bun bilong animal,+ na ol i no ken larim sampela hap mit bilong en i stap inap long moning.+ Ol i mas bihainim olgeta lo bilong Pasova na redim dispela sakrifais. 13 Tasol sapos wanpela man i klin o em i no go long wanpela longwe ples, na em i no redim sakrifais bilong Pasova, orait yupela i mas kilim em i dai,+ long wanem, em i no bin mekim ofa long Jehova long taim stret bilong en. Dispela man bai karim hevi long sin em i bin mekim.

14 “‘Sapos wanpela man bilong narapela ples i stap wantaim yupela, orait em tu i mas redim sakrifais bilong Pasova long Jehova.+ Em i mas bihainim olgeta lo bilong Pasova na pasin bilong redim dispela sakrifais.+ I gat wankain lo bilong yupela ol Israel na ol man bilong narapela ples i kam i stap wantaim yupela.’”+

15 Ol i sanapim haus lotu sel na long de ol i sanapim pinis,+ wanpela klaut i karamapim haus lotu sel, em haus sel bilong Bokis Kontrak. Na long nait klaut i luk olsem paia i stap antap long haus lotu sel inap long moning.+ 16 Dispela samting i save kamap. Long de, klaut i save karamapim haus lotu sel na long nait klaut i luk olsem paia i save stap antap long haus lotu sel.+ 17 Taim klaut i lusim haus lotu sel na i go, ol Israel i save kisim ol samting bilong ol na bihainim klaut i go.+ Na sapos klaut i stap tasol long wanpela hap, orait ol Israel i save wokim kem long dispela hap.+ 18 Taim Jehova i tok, orait ol Israel i save lusim wanpela ples na i go. Na taim Jehova i tok, orait ol i save wokim kem.+ Taim klaut i stap tasol antap long haus lotu sel, orait ol Israel i save stap tasol na ol i no kirap i go. 19 Taim klaut i stap tasol antap long haus lotu sel inap planti de, ol Israel i save bihainim tok bilong Jehova na ol i no go long narapela hap.+ 20 Sampela taim klaut i save stap tasol antap long haus lotu sel inap sampela de. Na taim Jehova i tok, ol i save stap tasol na ol i no kirap i go, na taim Jehova i tok, ol i save kirap na i go. 21 Sampela taim klaut i save stap tasol long nait i go inap long moning. Na taim klaut i lusim haus lotu sel long moning na i go, ol Israel i save kirap na i go. Maski klaut i save go long de o nait, ol Israel i save kirap i go.+ 22 Maski klaut i stap antap long haus lotu sel inap 2-pela de o 1-pela mun o em i stap longpela taim liklik, ol Israel i save stap tasol na ol i no go. Tasol taim klaut i kirap i go, orait ol tu i save lusim dispela ples na i go. 23 Na taim Jehova i tok, orait ol i save wokim kem, na taim Jehova i tok, orait ol i save kirap na i go. Ol i bihainim tok bilong Jehova em Jehova i bin tokim Moses.