Aisaia
61 Spirit bilong Nambawan Bikpela Jehova i stap long mi,+
Long wanem, Jehova i bin makim mi long autim gutnius long ol man i daunim ol yet.+
Em i bin salim mi i kam bilong oraitim ol man husat i bel hevi tru,
Bilong autim tok olsem ol man i stap kalabus ol i ken i go fri
Na bilong opim ai bilong ol man i stap kalabus,+
2 Bilong autim tok long yia bilong Jehova i mekim gut long ol manmeri
Na de bilong God bilong yumi long bekim rong,+
Na bilong mekim isi bel bilong olgeta man i krai sori,+
3 Bilong givim ol samting long ol manmeri i krai sori long Saion,
Bilong givim ol gutpela bilas bilong het bilong senisim sit bilong paia,
Bilong givim ol oil bilong amamas bilong senisim krai sori,
Bilong givim ol klos bilong litimapim nem, bilong senisim bel hevi.
Ol man bai kolim ol olsem ol bikpela diwai bilong stretpela pasin,
Em Jehova i bin planim na bai em i ken kisim glori long dispela.+
4 Ol bai wokim gen ol taun bilong bipo i bagarap i stap;
Ol bai sanapim gen ol ples bilong bipo i bin stap nating,+
Na ol bai wokim gen ol taun i bin bagarap,+
Em ol ples i bin stap nating inap planti yia tru.+
5 “Ol man yupela i no save long ol bai kam na was long ol sipsip bilong yupela,
Na ol man bilong narapela ples+ bai kamap ol fama na ol wokman bilong gaden wain bilong yupela.+
6 Tasol long yupela, ol bai kolim yupela olsem ol pris bilong Jehova;+
Ol bai kolim yupela olsem ol wokman bilong God.
Yupela bai kaikai ol gutpela samting bilong ol arapela kantri,+
Na yupela bai tok amamas long yupela yet bikos yupela i bin kisim planti mani kago long ol.
7 Yupela bai kisim dabol skel bilong ol samting bilong senisim sem yupela i bin kisim,
Na ol bai singaut amamas long kisim skel bilong ol bilong senisim bikpela sem ol i bin kisim.
Yes, ol bai kisim dabol skel long graun bilong ol yet.+
Na ol bai amamas inap oltaim oltaim.+
8 Long wanem, mi Jehova, mi save laikim stretpela pasin;+
Mi save heitim pasin bilong stil na pasin i no stret.+
Mi bai mekim pasin i fea na givim pe i stret long ol,
Na mi bai mekim wanpela kontrak bilong oltaim oltaim wantaim ol.+
9 Ol kantri bai save long lain pikinini bilong ol+
Na ol manmeri bai save long ol tumbuna pikinini bilong ol.
Olgeta man husat i lukim ol bai luksave long ol,
Olsem ol i dispela lain pikinini Jehova i bin blesim.”+
10 Mi bai amamas tru long Jehova.
Mi bai amamas long God bilong mi.+