Namba

1 Long namba 1 de bilong namba 2 mun bilong namba 2 yia bihain long ol Israel i lusim Isip,+ Jehova i toktok wantaim Moses insait long haus sel bilong bung+ long ples nating bilong Sainai,+ na em i tok: 2 “Yu na Aron i mas kisim sensas+ bilong olgeta wan wan manmeri bilong Israel.* Na yupela i mas kaunim ol na wokim lista bilong olgeta wan wan klen na ol tumbuna papa bilong ol, na kaunim nem bilong olgeta man. 3 Yu na Aron i mas rejistaim olgeta man bilong wan wan lain em ol i gat 20 krismas na i go antap+ na ol inap insait long ami bilong Israel.

4 “Yupela i mas makim wanpela man long olgeta wan wan traib bilong Israel na ol bai stap hetman bilong lain bilong ol.+ 5 Nem bilong ol man em ol bai helpim yutupela em: long lain bilong Ruben, em Elisur,+ pikinini man bilong Sedeur, 6 long lain bilong Simeon, em Selumiel,+ pikinini man bilong Surisadai, 7 long lain bilong Juda, em Nason,+ pikinini man bilong Aminadap, 8 long lain bilong Isakar, em Netanel,+ pikinini man bilong Suhar, 9 long lain bilong Sebulun, em Eliap,+ pikinini man bilong Helon, 10 long ol pikinini man bilong Josep, long lain bilong Efraim+ em Elisama, pikinini man bilong Amihut, na long lain bilong Manase em Gamaliel, pikinini man bilong Pedasur, 11 long lain bilong Benjamin em Abidan,+ pikinini man bilong Gideoni, 12 long lain bilong Dan em Ahieser,+ pikinini man bilong Amisadai, 13 long lain bilong Aser em Pagiel,+ pikinini man bilong Okran, 14 long lain bilong Gat em Eliasap,+ pikinini man bilong Duel, 15 long lain bilong Naptali em Ahira,+ pikinini man bilong Enan. 16 Ol i makim ol dispela man namel long ol manmeri. Ol i hetman+ bilong ol traib bilong tumbuna papa bilong ol na ol i hetman bilong planti tausen manmeri bilong Israel.”+

17 Orait Moses na Aron i kisim ol dispela man em ol i bin makim. 18 Na ol i singautim olgeta manmeri i kam bung long namba 1 de bilong namba 2 mun, na bai ol i ken rejistaim nem bilong olgeta wan wan, klen bilong ol, na ol tumbuna papa bilong ol. Ol i rejistaim nem bilong ol man i gat 20 krismas na i go antap.+ 19 Ol i mekim olgeta samting olsem Jehova i bin tokim Moses. Na Moses i rejistaim olgeta manmeri long ples nating bilong Sainai.+

20 Ol i wokim lista bilong ol pikinini man bilong Ruben, em ol tumbuna pikinini bilong fesbon bilong Israel.+ Ol i wokim lista bilong nem bilong olgeta wan wan, na nem bilong klen bilong ol, na nem bilong ol tumbuna papa bilong ol. Ol i kaunim namba bilong olgeta wan wan man i gat 20 krismas na i go antap em ol i ken insait long ami, 21 na namba bilong ol man em ol i rejistaim long traib bilong Ruben em 46,500.

22 Ol i wokim lista bilong ol tumbuna pikinini bilong Simeon.+ Ol i wokim lista bilong nem bilong olgeta wan wan, na nem bilong klen bilong ol, na nem bilong ol tumbuna papa bilong ol. Ol i kaunim namba bilong olgeta wan wan man i gat 20 krismas na i go antap em ol i ken insait long ami, 23 na namba bilong ol man em ol i rejistaim long traib bilong Simeon em 59,300.

24 Ol i wokim lista bilong ol tumbuna pikinini bilong Gat.+ Ol i wokim lista bilong nem bilong olgeta wan wan, na nem bilong klen bilong ol, na nem bilong ol tumbuna papa bilong ol. Ol i kaunim namba bilong olgeta man i gat 20 krismas na i go antap em ol i ken insait long ami, 25 na namba bilong ol man em ol i rejistaim long traib bilong Gat em 45,650.

26 Ol i wokim lista bilong ol tumbuna pikinini bilong Juda.+ Ol i wokim lista bilong nem bilong olgeta wan wan, na nem bilong klen bilong ol, na nem bilong ol tumbuna papa bilong ol. Ol i kaunim namba bilong olgeta man i gat 20 krismas na i go antap em ol i ken insait long ami, 27 na namba bilong ol man em ol i rejistaim long traib bilong Juda em 74,600.

28 Ol i wokim lista bilong ol tumbuna pikinini bilong Isakar.+ Ol i wokim lista bilong nem bilong olgeta wan wan, na nem bilong klen bilong ol, na nem bilong ol tumbuna papa bilong ol. Ol i kaunim namba bilong olgeta man i gat 20 krismas na i go antap em ol i ken insait long ami, 29 na namba bilong ol man em ol i rejistaim long traib bilong Isakar em 54,400.

30 Ol i wokim lista bilong ol tumbuna pikinini bilong Sebulun.+ Ol i wokim lista bilong nem bilong olgeta wan wan, na nem bilong klen bilong ol, na nem bilong ol tumbuna papa bilong ol. Ol i kaunim namba bilong olgeta man i gat 20 krismas na i go antap em ol i ken insait long ami, 31 na namba bilong ol man em ol i rejistaim long traib bilong Sebulun em 57,400.

32 Ol i wokim lista bilong ol tumbuna pikinini bilong Josep i kamap long lain bilong Efraim.+ Ol i wokim lista bilong nem bilong olgeta wan wan, na nem bilong klen bilong ol, na nem bilong ol tumbuna papa bilong ol. Ol i kaunim namba bilong olgeta man i gat 20 krismas na i go antap em ol i ken insait long ami, 33 na namba bilong ol man em ol i rejistaim long traib bilong Efraim em 40,500.

34 Ol i wokim lista bilong ol tumbuna pikinini bilong Manase.+ Ol i wokim lista bilong nem bilong olgeta wan wan, na nem bilong klen bilong ol, na nem bilong ol tumbuna papa bilong ol. Ol i kaunim namba bilong olgeta man i gat 20 krismas na i go antap em ol i ken insait long ami, 35 na namba bilong ol man em ol i rejistaim long traib bilong Manase em 32,200.

36 Ol i wokim lista bilong ol tumbuna pikinini bilong Benjamin.+ Ol i wokim lista bilong nem bilong olgeta wan wan, na nem bilong klen bilong ol, na nem bilong ol tumbuna papa bilong ol. Ol i kaunim namba bilong olgeta man i gat 20 krismas na i go antap em ol i ken insait long ami, 37 na namba bilong ol man em ol i rejistaim long traib bilong Benjamin em 35,400.

38 Ol i wokim lista bilong ol tumbuna pikinini bilong Dan.+ Ol i wokim lista bilong nem bilong olgeta wan wan, na nem bilong klen bilong ol, na nem bilong ol tumbuna papa bilong ol. Ol i kaunim namba bilong olgeta man i gat 20 krismas na i go antap em ol i ken insait long ami, 39 na namba bilong ol man em ol i rejistaim long traib bilong Dan em 62,700.

40 Ol i wokim lista bilong ol tumbuna pikinini bilong Aser.+ Ol i wokim lista bilong nem bilong olgeta wan wan, na nem bilong klen bilong ol, na nem bilong ol tumbuna papa bilong ol. Ol i kaunim namba bilong olgeta man i gat 20 krismas na i go antap em ol i ken insait long ami, 41 na namba bilong ol man em ol i rejistaim long traib bilong Aser em 41,500.

42 Ol i wokim lista bilong ol tumbuna pikinini bilong Naptali.+ Ol i wokim lista bilong nem bilong olgeta wan wan, na nem bilong klen bilong ol, na nem bilong ol tumbuna papa bilong ol. Ol i kaunim namba bilong olgeta man i gat 20 krismas na i go antap em ol i ken insait long ami, 43 na namba bilong ol man em ol i rejistaim long traib bilong Naptali em 53,400.

44 Moses wantaim Aron na 12-pela hetman bilong Israel em ol i makim ol tumbuna papa bilong ol, ol i rejistaim olgeta man. 45 Ol i rejistaim ol man em ol i gat 20 krismas na i go antap em ol inap insait long ami bilong Israel. Na ol i rejistaim ol long lain tumbuna papa bilong ol. 46 Namba bilong olgeta man em ol i rejistaim em inap 603,550.+

47 Tasol ol i no rejistaim ol Livai+ long ol traib bilong ol tumbuna papa bilong ol olsem ol i mekim long ol arapela lain.+ 48 So Jehova i tokim Moses olsem: 49 “Yu no ken rejistaim ol man long traib bilong Livai, na yu no ken bungim namba bilong ol wantaim namba bilong ol arapela lain bilong Israel.+ 50 Yu mas makim ol Livai bilong lukautim haus lotu sel i gat Bokis Kontrak+ na olgeta samting bilong haus lotu sel.+ Ol bai karim haus lotu sel na olgeta samting bilong en+ na ol bai mekim wok insait long en.+ Na ol i mas sanapim haus sel bilong ol yet i raunim haus lotu sel.+ 51 Na taim yupela i laik kisim haus lotu sel i go, ol Livai i mas rausim haus lotu sel.+ Na taim yupela i laik sanapim gen haus lotu sel, orait ol Livai i mas sanapim. Na sapos man husat i no wanpela pris* i kam klostu long haus lotu sel, orait yupela i mas kilim em i dai.+

52 “Olgeta wan wan Israel i mas sanapim haus sel bilong ol long hap ol i makim bilong ol 3-pela 3-pela traib bilong ol.+ 53 Na ol Livai i mas sanapim haus sel bilong ol i raunim haus lotu sel i gat Bokis Kontrak, na bai mi no ken belhat long ol manmeri bilong Israel.+ Ol Livai i gat wok long lukautim* haus lotu sel i gat Bokis Kontrak.”+

54 Ol manmeri bilong Israel i mekim olgeta samting olsem Jehova i tokim Moses. Ol i bihainim olgeta tok.