Namba Tu Tesalonaika

3 Ol brata, mi laik pinisim tok olsem, yupela i mas beten yet long God i ken helpim mipela,+ bai tok bilong Jehova* i ken wok yet long spit i go+ na kisim biknem olsem em i kisim namel long yupela. 2 Na beten tu bai God i ken kisim bek mipela long han bilong ol man nogut, em ol man i save bagarapim ol arapela.+ Long wanem, bilip i no samting olgeta man i gat.+ 3 Tasol Bikpela i save truim tok bilong em, na em bai mekim yupela i stap strong na em bai banisim yupela long dispela man nogut. 4 Na tu, mipela ol lain i bihainim Bikpela, mipela i bilip long yupela. Mipela i bilip olsem yupela i wok long mekim ol samting mipela i tokim yupela long mekim na yupela bai mekim yet. 5 Bikpela i ken stiaim yet bel bilong yupela i go long rot i stret, olsem yupela i ken laikim God+ na kamapim pasin bilong sanap strong+ bai yupela i ken mekim wok bilong Krais.

6 Ol brata, long nem bilong Bikpela Jisas Krais, mipela i givim tok long yupela olsem, yupela i mas stap longwe long ol brata i no wokabaut stret+ na ol i no bihainim pasin* em yupela* i bin kisim long mipela.+ 7 Yupela yet i save long olsem wanem yupela i mas bihainim pasin bilong mipela.+ Long wanem, mipela i no bin wokabaut long pasin i no stret namel long yupela. 8 Na tu, mipela i no bin kisim nating kaikai long wanpela man, nogat.+ Long san na long nait mipela i bin hatwok na taitim bun tru bai mipela i no ken putim hevi long yupela long lukautim mipela.+ 9 I no olsem mipela i no gat namba, nogat.+ Mipela i laik stap olsem gutpela piksa yupela i ken bihainim.+ 10 Tru tumas, taim mipela i bin stap wantaim yupela, mipela i bin givim dispela tok long yupela: “Sapos man i no laik wok, orait em i no ken kaikai.”+ 11 Mipela i harim olsem sampela namel long yupela i no wokabaut stret.+ Ol i no wok liklik, ol i subim nus bilong ol long ol samting bilong ol arapela.+ 12 Long ol kain man olsem, mipela i givim tok na kirapim ol long nem bilong Bikpela Jisas Krais olsem ol i mas stap isi na mekim wok bai ol i ken lukautim ol yet long kaikai samting.+

13 Ol brata, yupela i no ken les long mekim gutpela pasin. 14 Sapos wanpela man i no bihainim tok mipela i givim long rot bilong dispela pas, orait yupela i mas putim mak long dispela man. Na no ken poroman moa wantaim em,+ bai em i ken sem long dispela samting. 15 Tasol no ken tingim em olsem wanpela birua, nogat. Yupela i mas wok yet long givim tok long em+ olsem wanpela brata.

16 Bikpela, em man bilong bel isi, oltaim em yet i ken givim bel isi long yupela long olgeta kain rot.+ Bikpela i ken i stap wantaim yupela olgeta.

17 Mi Pol, mi raitim dispela gude long han bilong mi yet.+ Em i olsem mak long olgeta pas bilong mi, dispela em i pasin bilong mi long raitim pas.

18 Bikpela pasin helpim bilong Bikpela bilong yumi, Jisas Krais, i ken i stap wantaim yupela olgeta.