Kisim Bek
24 Orait Jehova i tokim Moses: “Yu wantaim Aron na Nadap, na Abihu,+ na 70 hetman bilong Israel, yupela i mas go antap long maunten. Na yupela i mas sanap longwe liklik na brukim skru na lotu long mi. 2 Na Moses, yu wanpela tasol i ken kam klostu long mi Jehova. Tasol ol arapela i no ken kam klostu long mi. Na ol manmeri bilong Israel i no ken kam antap long maunten wantaim yu.”+
3 Orait Moses i go tokim ol manmeri long olgeta tok bilong Jehova na olgeta lo bilong em.+ Ol manmeri i harim na olgeta wantaim i tok olsem: “Mipela i wanbel long mekim olgeta samting em Jehova i tok long en.”+ 4 Orait Moses i raitim olgeta tok bilong Jehova.+ Na long de bihain em i kirap long moningtaim tru na em i wokim wanpela alta long as bilong maunten na em i sanapim 12-pela ston bilong makim 12-pela traib bilong Israel. 5 Bihain em i makim sampela yangpela man Israel long mekim ol ofa bilong paia i kukim olgeta na ol i sakrifaisim ol bulmakau long Jehova olsem ol sakrifais bilong kamap wanbel wantaim em.+ 6 Orait Moses i kisim blut na tilim long tupela hap, wanpela hap em i tilim long ol boul, na narapela hap em i tromoi liklik liklik long alta. 7 Na em i kisim buk* bilong kontrak na em i ritim long ol manmeri.+ Ol i harim na ol i tok: “Mipela i wanbel long mekim olgeta samting em Jehova i tok long en, na mipela bai bihainim tok bilong em.”+ 8 Orait Moses i kisim blut na tromoi liklik liklik antap long ol manmeri+ na em i tok olsem: “Dispela blut i strongim kontrak em Jehova i wokim wantaim yupela. Na dispela i stret wantaim ol dispela tok yupela i wanbel long en.”+
9 Moses na Aron, na Nadap, na Abihu wantaim 70 hetman bilong Israel i go antap long maunten, 10 na ol i lukim God bilong Israel.+ Na aninit long lek bilong em ol i lukim samting olsem floa em ol i wokim long ol ston sapaia na ol dispela ston i lait tumas olsem skai i klia.+ 11 God i no bagarapim ol dispela hetman bilong Israel.+ Na ol i lukim God tru long wanpela visen taim ol i kaikai na dring i stap.
12 Na Jehova i tokim Moses olsem: “Yu kam antap long maunten na stap. Mi bai givim yu 2-pela fletpela ston em mi raitim ol lo long en bilong skulim ol manmeri.”+ 13 Orait Moses wantaim wokman bilong em, Josua,+ i redi na Moses i go antap long maunten bilong God tru.+ 14 Tasol Moses i bin tokim ol hetman: “Yupela i mas wetim mitupela i stap long hia i go inap long mitupela i kam bek.+ Aron na Hur+ bai i stap wantaim yupela. Sapos wanpela i gat tok long narapela, orait ol i ken i go lukim tupela long stretim.”+ 15 Klaut i karamapim het bilong maunten i stap taim Moses i go antap.+
16 Bikpela lait bilong Jehova+ i stap yet long Maunten Sainai,+ na klaut i karamapim maunten inap 6-pela de. Na long de namba 7, em i stap long klaut na singautim Moses. 17 Long ai bilong ol manmeri bilong Israel, dispela lait bilong Jehova i olsem bikpela paia i stap antap long het bilong maunten. 18 Orait Moses i go insait long klaut antap long maunten.+ Na Moses i stap long maunten inap 40 de na 40 nait.+