Namba

19 Jehova i tokim Moses na Aron olsem: 2 “Jehova i givim dispela lo long ol Israel, em i tok, ‘Ol Israel i mas kisim wanpela retpela bulmakau meri i no gat sik o bagarap long skin bilong en+ na ol man i no bin putim hap plang* long en bilong mekim wok na bringim i kam long yu. 3 Na yutupela i mas givim dispela bulmakau long pris Eleasar na em bai kisim dispela bulmakau i go ausait long kem. Na long ai bilong em ol i mas kilim i dai dispela bulmakau. 4 Na pris Eleasar i mas kisim sampela blut bilong bulmakau long pinga bilong em na tromoi dispela blut 7-pela taim i go olsem long fran bilong haus sel bilong bung.+ 5 Na bihain, long ai bilong Eleasar ol i mas kukim dispela bulmakau. Ol i mas kukim skin na mit na blut na pekpek bilong dispela bulmakau.+ 6 Na pris i mas kisim wanpela han bilong diwai sida na han bilong hisop+ na retpela tret* na tromoi olgeta dispela samting long paia i kukim bulmakau. 7 Na pris i mas wasim klos bilong em na em yet i mas waswas na bihain em i ken kam insait long kem. Tasol pris bai i stap doti i go inap long apinun tru.

8 “‘Na man i kukim dispela bulmakau long paia i mas wasim klos bilong em na em yet tu i mas waswas. Na em bai i stap doti i go inap apinun tru.

9 “‘Na bihain wanpela man i stap klin i mas i go kisim sit bilong paia ol i bin kukim bulmakau long en+ na karim i go putim long wanpela ples ausait long kem we i klin. Ol i mas putim dispela sit bilong paia i stap na bai ol manmeri bilong Israel i ken putim long wara bilong mekim ol man na ol samting i kamap klin.+ Dispela em ofa bilong tekewe sin. 10 Man i bungim sit bilong paia ol i bin kukim bulmakau long en, em i mas wasim klos bilong em. Na em bai i stap doti i go inap long apinun tru.

“‘Ol Israel na ol manmeri bilong narapela ples i kam sindaun wantaim ol, olgeta i mas bihainim dispela lo inap oltaim oltaim.+ 11 Sapos wanpela man i tatsim bodi bilong man* i dai pinis, orait em bai i stap doti inap 7-pela de.+ 12 Dispela man i mas kisim dispela wara na mekim em yet i kamap klin long de namba 3, na long de namba 7 em bai kamap klin. Tasol sapos em i no mekim em yet i kamap klin long de namba 3, orait long de namba 7 em bai i no inap kamap klin. 13 Sapos wanpela man i tatsim bodi bilong man* i dai pinis na em i no mekim em yet i kamap klin, orait dispela man i mekim haus lotu sel bilong Jehova i kamap doti.+ Na yupela i mas kilim dispela man i dai.+ Long wanem, ol i no bin kisim wara bilong mekim man i kamap klin+ na tromoi liklik liklik long em, olsem na em i stap doti yet na em i no kamap klin.

14 “‘Dispela em lo yupela i mas bihainim taim wanpela man i dai insait long haus sel. Olgeta man i go insait long dispela haus sel na olgeta man i stap insait pinis long dispela haus sel, olgeta bai i stap doti inap 7-pela de. 15 Olgeta sospen em ol i no pasim ai bilong ol, ol dispela sospen bai kamap doti.+ 16 Sapos wanpela man i raun ausait na em i tatsim bodi bilong wanpela man em ol i bin kilim i dai long bainat o em i tatsim bodi bilong man i dai pinis o bun bilong man i dai pinis o em i krungutim matmat, orait em bai i stap doti inap 7-pela de.+ 17 Orait bilong mekim dispela man i kamap klin, ol i mas kisim sampela sit bilong paia bilong ofa bilong tekewe sin na putim long wanpela sospen na kisim wara long liklik hanwara na kapsaitim i go insait long sospen. 18 Na bihain wanpela man i klin+ i mas kisim han bilong hisop+ na putim long dispela wara na tromoi liklik long haus sel na long olgeta sospen na long olgeta man i stap long dispela haus sel. Na em i mas tromoi liklik wara tu long man i bin tatsim bun bilong man i dai pinis o bodi bilong man ol i bin kilim i dai o bodi bilong man i dai pinis o long man i bin krungutim ples matmat. 19 Na man i klin i mas tromoi liklik wara long man i no klin long de namba 3 na long de namba 7. Na long de namba 7 em bai mekim dispela man i kamap klin long sin em i bin mekim.+ Na bihain dispela man i laik kamap klin i mas wasim klos bilong em na em i mas waswas na long apinun tru em bai kamap klin.

20 “‘Tasol sapos wanpela man i stap doti na em i no mekim em yet i kamap klin, orait yupela i mas kilim dispela man i dai,+ long wanem, em i mekim ples holi bilong Jehova i kamap doti. Ol i no bin kisim wara bilong mekim man i kamap klin na tromoi liklik liklik long em, olsem na em i stap doti.

21 “‘Oltaim ol Israel i mas bihainim dispela lo. Man i tromoi liklik wara long narapela man bilong mekim dispela man i kamap klin,+ em i mas wasim klos bilong em yet. Na man i tatsim wara bilong mekim man i kamap klin, em bai i stap doti i go inap long apinun tru. 22 Sapos dispela man i doti i tatsim wanpela samting, orait dispela samting bai i kamap doti. Na man i tatsim dispela samting i kamap doti, em tu bai kamap doti na em bai stap olsem i go inap long apinun tru.’”+