Buk Song
BUK FAIV
(Buk Song 107-150)
107 Tok tenkyu long Jehova, long wanem, em i gutpela;+
2 Yupela ol manmeri Jehova i bin kisim bek,* yupela i mas mekim dispela tok,
Em yupela ol manmeri em i bin kisim bek long han bilong ol birua,+
3 Em i bin kisim yupela long ol arapela kantri,+
Long hap is na long hap wes,*
Na long hap not na long hap saut.+
4 Ol i wokabaut nabaut long ples nating, long ples i no gat man long en;
Na ol i no painim wanpela rot i go long taun na bai ol i go i stap long en.
5 Ol i hangre na dai long dring wara;
Strong bilong ol i pinis olgeta na klostu ol i airaun.
6 Ol i stap nogut, olsem na ol i wok long singaut long Jehova;+
Na em i bin kisim ol bek long hevi bilong ol.+
8 Ol manmeri i mas tok tenkyu long Jehova+ long gutpela pasin laikim* bilong em
Na long ol gutpela wok em i mekim bilong helpim ol man.+
9 Em i givim wara long ol man i nek drai na ol i dring na ol i pulap tru
Na ol man i hangre, em i givim planti gutpela samting long ol.+
10 Sampela bilong ol i stap long ples i tudak nogut tru,
Ol man i bin kalabusim ol long sen na dispela i givim hevi long ol.
11 Long wanem, ol i bikhet long tok bilong God;
Ol i no bihainim tok bilong God Antap Tru.+
12 Olsem na God i larim ol i karim pen na hevi, na long dispela rot em i mekim bel bilong ol i kisim pasin daun;+
Ol i pundaun na i no gat wanpela man bilong helpim ol.
13 Ol i stap nogut na ol i wok long singaut long Jehova;
Na em i bin kisim ol bek long hevi bilong ol.
14 Em i kisim ol na ol i lusim ples i tudak nogut tru,
Na em i brukim sen i kalabusim ol.+
15 Ol manmeri i mas tok tenkyu long Jehova long gutpela pasin laikim* bilong em+
Na long ol gutpela wok em i mekim bilong helpim ol man.
16 Em i brukim ol dua ol i wokim long kopa
Na em i katim na brukim ol ain ba.+
17 Ol i mekim planti sin na rong+
Olsem na ol i karim planti pen na hevi long ol pasin nogut bilong ol.+
18 Bel bilong ol i no laikim kaikai;
Ol i go kamap klostu long ol geit bilong dai.
19 Ol i stap nogut na ol i wok long singaut long Jehova;
Na em i bin kisim ol bek long ol hevi bilong ol.
20 Em i save tok na ol i kamap orait+
Na em i kisim bek ol long hul bilong matmat em ol i kalabus long en.
21 Ol manmeri i mas tok tenkyu long Jehova long gutpela pasin laikim* bilong em
Na long ol gutpela wok em i mekim bilong helpim ol man.
22 Ol i mas ofaim ol sakrifais bilong givim tenkyu long em+
Na amamas na tokaut long ol wok em i bin mekim.
23 Ol man i save raun long ol sip long solwara,
Na ol i save mekim wok bisnis na bringim ol kago i go i kam long bikpela solwara,+
24 Ol i lukim ol samting Jehova i mekim
Na ol i save lukim ol naispela samting em i bin wokim i stap long solwara;+
25 Ol i bin lukim olsem wanem God i tok na traipela win i kirap,+
Na dispela i kirapim ol bikpela weiv.
26 Ol sip i go antap tru;
Na i go daunbilo tru.
Olsem na ol i pret nogut tru, long wanem, klostu bagarap bai painim ol.
27 Ol i wokabaut longlong insait long sip olsem spakman,
Na olgeta save bilong ol i no inap long helpim ol.+
28 Ol i stap nogut na ol i singaut long Jehova,+
Na em i kisim bek ol long ol hevi bilong ol.
29 Em i mekim traipela win i pinis;
Na ol weiv i stap isi na solwara i no kirap moa.+
30 Ol i amamas taim solwara i stap isi,
Na em i bringim ol i go long haba ol i laik go long en.
31 Ol manmeri i mas tok tenkyu long Jehova long gutpela pasin laikim* bilong em
Na long ol gutpela wok em i mekim bilong helpim ol man.+
32 Taim ol manmeri i bung wantaim, ol i mas givim biknem long em,+
Na taim ol hetman i bung wantaim, ol i mas litimapim nem bilong em.
33 Em i save mekim ol bikpela wara i drai olgeta na kamap ples nating
Na em i save mekim ol wara i pinis olgeta na graun i kamap drai,+
34 Em i save mekim graun i gat gris i kamap graun we i no gat wanpela samting i gro long en,+
Long wanem, ol man i sindaun long dispela hap, ol i save mekim pasin nogut.
35 Em i mekim ples nating i kamap raunwara.
Na em i mekim ples drai i gat planti wara.+
36 Em i larim ol man i hangre i sindaun long dispela hap,+
Na bai ol i ken wokim taun na i stap long en.+
37 Ol i planim kaikai long ol gaden na ol i planim ol gaden wain+
Na ol dispela gaden i karim planti kaikai.+
38 Em i blesim ol na ol i kamap planti;
Em i no larim ol bulmakau bilong ol i pinis.+
39 Tasol bihain namba bilong ol manmeri i go daun na ol i kisim sem
Long wanem, ol man i mekim nogut long ol na ol i karim pen na hevi.
40 Em i kapsaitim tok bilas antap long ol bikman
Na mekim ol i wokabaut nabaut long ples nating i no gat rot.+
41 Tasol ol rabisman i karim pen na hevi, em i banisim ol*+
Na em i mekim ol famili bilong ol i kamap planti olsem lain sipsip.