Aisaia
27 Long dispela taim, Jehova bai yusim bikpela na strongpela bainat bilong em i sap tru,+
Long mekim save long Leviatan,* dispela snek i save spit tru
Na i save tanim tanim,
Na em bai kilim dispela traipela snek i save stap long solwara.
2 Long dispela taim, singsing long dispela meri:*
“Wanpela gaden wain i save kamapim wain!+
3 Mi Jehova, mi save banisim em.+
Olgeta taim mi givim wara long em.+
Long san na nait, mi save banisim em,
Na bai i no gat wanpela man inap mekim nogut long em.+
Husat bai kisim ol liklik nil diwai na ol gras nogut na kam pait long mi?
Bai mi krungutim ol na kukim ol olgeta long paia.
5 Sapos nogat, orait larim em i kam long strongpela banis bilong mi.
Larim em i kamap wanbel wantaim mi;
Larim em i kamap wanbel wantaim mi.”
6 Long taim bai kamap bihain, Jekop bai putim rop i go insait long graun na kamap strong olsem wanpela diwai,
Israel bai kamap bikpela diwai i putim planti plaua,+
Na ol bai kamapim kaikai long olgeta hap bilong graun.+
7 I stret ol i mas paitim em olsem nau ol i paitim em?
O i stret long kilim em i dai olsem ol i kilim i dai ol manmeri bilong em?
8 Long rot bilong wanpela singaut bilong pretim man, yu bai pait wantaim em taim yu salim em i go.
Yu bai rausim em long rot bilong strongpela belhat bilong yu long taim win bilong hap is i blo i kam.+
9 Long dispela rot, rong bilong Jekop bai tekewe,+
Na dispela samting bai kamap taim sin bilong em i tekewe:
Em bai mekim olgeta ston bilong alta
I kamap olsem ol waitpela ston i no strong em ol i memeim i kamap paura,
Na bai i no gat ol pos bilong lotu* o ol alta bilong kukim paura i gat gutpela smel i stap.+
10 Dispela taun i gat strongpela banis bai stap nating;
Ol man bai lusim ol graun i gat gutpela gras olsem em i wanpela ples nating.+
Long dispela hap, ol pikinini bulmakau bai kaikai gras na slip,
Na ol bai kaikai ol brens bilong em.+
11 Taim ol brens bilong em i drai,
Ol meri bai kam na brukim ol,
Na mekim paia long ol.
Ol dispela manmeri i no save kliagut long ol samting.+
Olsem na Man Bilong Wokim ol bai no inap marimari long ol,
Na Man husat i bin kamapim ol bai i no inap amamas long ol.+
12 O ol manmeri bilong Israel, long dispela taim, Jehova bai paitim na kisim ol prut, kirap long ol hanwara bilong Wara Yufretis i go inap long Veli* Bilong Isip,+ na em bai wok long bungim yupela wan wan.+ 13 Long dispela taim, ol bai winim traipela kom bilong sipsip na em bai krai bikpela tru,+ na ol manmeri klostu i laik dai long graun bilong Asiria,+ na ol manmeri i go stap nabaut long graun bilong Isip+ bai kam na brukim skru long Jehova long maunten holi long Jerusalem.+