Josua
3 Orait Josua i kirap long moningtaim tru na em wantaim olgeta Israel* i lusim Sitim+ na ol i go kamap long Wara Jordan. Na ol i stap long dispela hap long nait olgeta paslain long ol i brukim wara na go long hapsait.
2 Bihain long 3-pela de, ol ofisa+ i raun long olgeta hap bilong kem 3 na ol i tokim ol manmeri olsem: “Taim yupela i lukim ol pris long lain Livai i karim Bokis Kontrak bilong Jehova, God bilong yupela, na wokabaut i go,+ orait wantu yupela i mas lusim ples bilong yupela na bihainim Bokis Kontrak. 4 Tasol yupela i no ken kam klostu long Bokis Kontrak. Yupela i mas stap longwe long en inap 2,000 kiubit.* Olsem bai yupela i ken save long wanem rot yupela i mas bihainim, long wanem, yupela i no bin wokabaut long dispela rot bipo.”
5 Na Josua i tokim ol manmeri olsem: “Yupela i mas redi,*+ long wanem, tumora Jehova bai mekim ol gutpela samting namel long yupela.”+
6 Na bihain Josua i tokim ol pris olsem: “Yupela i mas kisim Bokis+ Kontrak na wokabaut i go pas long ol manmeri.” So ol i kisim Bokis Kontrak na wokabaut i go pas long ol manmeri.
7 Na Jehova i tokim Josua: “Kirap long dispela de bai mi litimapim yu long ai bilong ol Israel,+ na bai ol i ken save olsem mi stap wantaim yu+ olsem mi bin stap wantaim Moses.+ 8 Yu mas tokim ol pris husat bai karim Bokis Kontrak olsem: ‘Taim yupela i kamap long arere bilong Wara Jordan, yupela i mas go sanap insait long wara na wet i stap.’”+
9 Orait Josua i tokim ol Israel olsem: “Yupela kam na putim yau long tok bilong Jehova, God bilong yupela.” 10 Na Josua i tok: “Nau bai yupela i save olsem wanpela God i gat laip i stap namel long yupela,+ na long ai bilong yupela em bai rausim ol Kenan, ol Hit, ol Hivi, ol Peris, ol Girgas, ol Amor, na ol Jebus.+ 11 Harim! Bokis Kontrak bilong Bikpela bilong olgeta graun bai go pas long yupela long brukim Wara Jordan. 12 Orait yupela i mas kisim 12-pela man long ol traib bilong Israel, wan wan man long wan wan traib,+ 13 na taim lek bilong ol pris i karim Bokis Kontrak bilong Jehova, em Bikpela bilong olgeta graun, i tatsim Wara Jordan, orait wara i ron i kam daun bai stop na em bai sanap olsem wanpela banis.”+
14 Taim ol manmeri i lusim haus sel bilong ol na i go, na paslain long ol i brukim Wara Jordan, ol pris i karim Bokis+ Kontrak i wokabaut i go pas long ol manmeri. 15 Na taim ol pris i karim Bokis Kontrak i go kamap long arere bilong Wara Jordan, na lek bilong ol i tatsim wara (dispela taim em i taim bilong kamautim kaikai long gaden na Wara Jordan i tait bikpela),+ 16 wara i ron i kam daun i stop. Na wara i solap i go antap olsem wanpela banis longwe yet long taun Adam, em taun i stap klostu long Saretan. Na wara i save ron i go daun long Solwara Bilong Araba, em Detsi, i drai. Wara i stop na ol manmeri i go long hapsait klostu long Jeriko. 17 Ol pris i karim Bokis Kontrak bilong Jehova i sanap na wet i stap long graun i drai+ namel long Wara Jordan, na olgeta Israel i wokabaut long graun i drai+ i go long hapsait. Ol i mekim olsem i go inap olgeta manmeri long lain Israel i brukim Wara Jordan.