Namba
25 Taim ol Israel i stap long Sitim,+ ol man bilong Israel i stat long mekim pasin pamuk wantaim ol meri Moap.+ 2 Na ol dispela meri i singautim ol man Israel i go long taim ol i mekim ol sakrifais long ol god bilong ol.+ Na ol i kaikai ol dispela sakrifais na ol i brukim skru long ol dispela god.+ 3 Long dispela pasin ol Israel i bung wantaim ol long lotuim Bal bilong Peor.+ Na Jehova i belhat long ol Israel. 4 Na Jehova i tokim Moses olsem: “Yu mas kisim ol lida* bilong ol dispela manmeri em ol i gat asua long dispela pasin na kilim ol i dai na hangamapim bodi bilong ol long ai bilong Jehova na bai olgeta manmeri i ken lukim ol. Long dispela rot Jehova bai i no belhat moa long ol Israel.” 5 Na Moses i tokim ol hetman bilong Israel olsem:+ “Yupela olgeta wan wan i mas kilim i dai ol dispela man long lain bilong yupela em ol i lotuim Bal bilong Peor.”+
6 Olgeta manmeri i wok long krai i stap long ai bilong haus sel bilong bung. Na ol wantaim Moses i lukluk i stap na wanpela man Israel i bringim wanpela meri Midian+ i kam insait long kem. 7 Na Finias,+ pikinini man bilong Eleasar, em pikinini man bilong pris Aron, i lukim dispela samting. Orait em i lusim ol manmeri na hariap i go kisim spia bilong em. 8 Na em i bihainim dispela man Israel i go insait long haus sel na em i sutim tupela wantaim long spia. Em i sutim dispela man Israel na dispela meri long sem bilong em. Taim em i mekim olsem, bikpela sik i pinis long lain Israel.+ 9 Namba bilong ol manmeri i dai long dispela bikpela bagarap em 24,000.+
10 Orait Jehova i tokim Moses: 11 “Finias,+ pikinini man bilong Eleasar, em pikinini man bilong pris Aron, i mekim na mi no belhat moa long ol manmeri bilong Israel, long wanem, em i no laik narapela god i kisim ples bilong God bilong em.+ Olsem na mi no bin pinisim olgeta manmeri bilong Israel, maski mi strong long ol i mas lotuim mi wanpela tasol.+ 12 Olsem na yu mas tokim em olsem, ‘Mi bai wokim kontrak bilong bel isi wantaim em. 13 Dispela kontrak i olsem, oltaim em na ol lain tumbuna pikinini bilong em i kamap bihain bai mekim wok pris.+ Long wanem, em i no laik bai ol manmeri i senisim God bilong em na lotuim ol arapela god.+ Na long dispela rot em i karamapim sin bilong ol manmeri bilong Israel.’”
14 Simri, em nem bilong man Israel, em Finias i bin kilim i dai wantaim dispela meri Midian. Simri em pikinini man bilong Seilu, na em i wanpela hetman long lain bilong tumbuna papa bilong em insait long lain Simeon. 15 Na nem bilong meri Midian em Finias i bin kilim i dai, em Kosbi. Em i pikinini meri bilong Sur,+ na Sur em i wanpela lida long lain bilong tumbuna papa bilong em long Midian.+
16 Bihain Jehova i tokim Moses olsem: 17 “Yupela i mas go pait long ol Midian na kilim ol i dai,+ 18 long wanem, ol i bin mekim nogut long yupela taim ol i giamanim yupela long Peor,+ na long pasin Kosbi i bin mekim. Kosbi em i pikinini meri bilong wanpela hetman bilong Midian. Long de Finias i bin kilim em i dai,+ dispela bikpela sik i pinis.”