Namba
12 Moses i maritim wanpela meri bilong lain Kus,+ olsem na Miriam na Aron i toktok planti long dispela samting. 2 Tupela i tok olsem: “Ating Jehova i givim tok long rot bilong Moses wanpela tasol, a? Nogat tru. Em i givim tok long rot bilong mitupela tu.”+ Na Jehova i harim dispela tok bilong tupela.+ 3 Dispela man Moses em i man bilong mekim pasin daun tru,*+ na i no gat wanpela man long dispela graun i save daunim em yet olsem Moses.
4 Orait wantu Jehova i tokim Moses na Aron na Miriam olsem: “Mi laik bai yupela tripela i go long haus sel bilong bung.” Orait ol i kirap na i go. 5 Na Jehova i kam daun long klaut+ na sanap long dua bilong haus sel na em i singautim Aron na Miriam. Na tupela i go klostu liklik. 6 Orait em i tokim tupela: “Plis, yutupela harim tok bilong mi. Sapos i gat wanpela profet bilong Jehova i stap namel long yupela, orait bai mi soim mi yet long em long wanpela visen,+ na long rot bilong driman bai mi toktok long em.+ 7 Tasol mi no save mekim olsem long wokman bilong mi Moses! Mi givim em wok long lukautim ol manmeri bilong mi.*+ 8 Mi save toktok wantaim Moses olsem man i save toktok wantaim narapela man.*+ Mi save toktok stret long em, na mi save mekim ol tok i klia. Na Jehova i save kamap long ai bilong em. Olsem na watpo yutupela i no pret long toktok planti long wokman bilong mi Moses?”
9 Na Jehova i belhat nogut tru long tupela na em i lusim ol na i go. 10 Na klaut i lusim haus sel na i go. Na lukim! Sik lepra i karamapim skin bilong Miriam, na skin bilong em i kamap wait olsem sno.+ Aron i tanim na lukim olsem sik lepra i karamapim skin bilong Miriam.+ 11 Na wantu Aron i tokim Moses: “Bikman bilong mi, plis no ken larim mitupela i karim hevi long sin bilong mitupela! Mitupela i bin mekim pasin kranki na mekim dispela sin. 12 Plis no ken larim Miriam i luk olsem pikinini i bin dai pinis long bel bilong mama na taim mama i karim em, skin bilong em i tekewe pinis!” 13 Na Moses i singaut long Jehova na tok olsem: “O God, plis, mekim em i kamap orait gen! Plis!”+
14 Na Jehova i bekim tok long Moses olsem: “Sapos papa bilong Miriam i spet long pes bilong em, ating Miriam bai sem inap 7-pela de. Olsem tasol, Miriam i mas stap wanpis ausait long kem+ inap 7-pela de, na bihain em i ken kam insait gen long kem.” 15 Olsem na ol i putim Miriam i stap wanpis ausait long kem inap 7-pela de.+ Na ol manmeri i no kirap i go long narapela hap inap long Miriam i kam bek insait long kem. 16 Na bihain ol manmeri i lusim Haserot+ na ol i go wokim kem long ples nating bilong Paran.+