Buk Song
Tok i go long dairekta. Devit i raitim dispela song.
109 O God, mi save litimapim nem bilong yu,+ olsem na plis yu mas harim singaut bilong mi.
2 Ol man nogut na ol man bilong giaman, ol i mekim tok i bagarapim mi.
Ol i save mekim tok giaman long ol arapela long mi;+
3 Ol man i stap klostu long mi, ol i mekim ol tok nogut tru long mi,
Na i no gat as na ol i pait long mi.+
4 Ol i sakim mi, maski mi save laikim ol;+
Tasol mi wok yet long beten long God.
5 Mi mekim gutpela pasin long ol, tasol ol i bekim pasin nogut long mi+
Na mi save laikim ol tasol ol i no laikim mi.+
6 Makim wanpela man nogut long bosim birua bilong mi;*
Mi laik bai wanpela birua* i ken sanap long rait sait bilong em.
7 Na taim em i sanap long kot, ol i ken tokaut olsem em i gat asua;*
Beten bilong dispela man tu, em i sin.+
9 Na mi laik bai em i dai na ol pikinini* bilong em bai i no gat papa,
Na meri bilong em i ken kamap wido.
10 Na mi laik bai ol pikinini* bilong em i raun raun na askim ol narapela long ol samting,
Na ol i ken painim painim kaikai insait long haus bilong ol i bagarap i stap.
11 Na ol man em i dinau long ol, mi laik bai ol i kisim olgeta samting em i gat,
Na ol man em i no save long ol, ol i ken stilim ol samting bilong em.
12 Mi laik bai i no gat wanpela man i ken soim pasin helpim long em,
Na i no gat wanpela i ken tingim ol pikinini bilong em i no gat papa.
13 Mi laik bai ol tumbuna pikinini bilong em i ken i dai;+
Na ol lain i kamap bihain i no ken tingim moa nem bilong ol.
14 Mi laik bai Jehova i ken tingim rong bilong ol tumbuna bilong em,+
Na em i no ken lusim sin bilong mama bilong em.
15 Jehova i ken tingting oltaim long ol samting ol i bin mekim;
Na ol manmeri i no ken tingim nem bilong ol gen.+
16 As bilong dispela i olsem, dispela man i no bin tingting long soim pasin helpim long ol arapela,+
Em i wok long putim hevi long man i karim pen na hevi,+ na man i stap rabis, na man em bel bilong em i hevi tru,
Na em i laik kilim em i dai.+
17 Em i save amamas long mekim tok long bagarap i ken painim narapela, orait nau dispela samting i kamap long em yet;
Em i no save tok long gutpela samting i ken painim ol arapela, olsem na gutpela samting i no painim em.
18 Oltaim em i save tok long bagarap i ken painim ol arapela na ol dispela tok i olsem klos em i werim.
Na ol dispela tok i olsem wara i go insait long bodi bilong em.
Na i go insait long ol bun bilong em olsem oil.
19 Mi laik bai ol dispela tok bilong em long bagarap i ken painim narapela, i ken kamap olsem klos i karamapim em yet+
Na olsem belt em i save werim oltaim.
20 Dispela samting i stap olsem pe Jehova i bekim bek long man i sakim mi+
Na pe bilong ol man i mekim ol tok nogut long mi.
21 Tasol yu Jehova, Nambawan Bikpela,
Yu mas tingim nem bilong yu na helpim mi.+
Gutpela pasin laikim* bilong yu i gutpela, olsem na yu mas kisim bek mi.+
22 Mi stap rabis tru na i no gat wanpela bilong helpim mi,+
Na long bel bilong mi, mi pilim nogut tru.+
23 Mi laik i go pinis olsem sedo i save stap sotpela taim na i go pinis;
Mi olsem grasopa em ol i rausim i go.
24 Mi bin tambu long kaikai, olsem na skru bilong mi i no gat strong;
Mi kamap bun nating na bodi bilong mi i bagarap.*
25 Ol manmeri i save tok bilas long mi.+
Taim ol i lukim mi, ol i save tantanim het bilong ol.+
26 O Jehova, God bilong mi, yu mas helpim mi;
Mekim gutpela pasin laikim* long mi na kisim bek mi.
27 Na ol bai save olsem long han bilong yu;
O Jehova, yu bin kisim bek mi.
28 Ol i ken mekim tok long bagarap i ken painim mi, tasol mi laik bai yu mekim gut long mi.
Taim ol i birua long mi, yu ken mekim ol i sem,
Tasol larim mi, wokman bilong yu, i ken amamas.
29 Ol man i sakim mi, bikpela sem i mas karamapim ol olsem klos ol i werim;
Yes, sem i mas karamapim ol olsem longpela saket* ol i werim.+
30 Maus bilong mi bai givim biknem long Jehova;
Mi bai litimapim nem bilong em long ai bilong planti manmeri.+
31 Long wanem, em bai sanap long rait sait bilong man i stap rabis
Bilong kisim bek em long han bilong ol man i kotim em.