Buk Song
Tok i go long dairekta. Devit i raitim dispela song.
64 O God, plis mi laik bai yu harim singaut bilong mi.+
Mi pret nogut tru long ol birua bai mekim nogut long mi, olsem na yu mas lukautim mi.
2 Ol man nogut i pasim tok long mekim nogut long mi, olsem na yu mas lukautim mi,+
Na yu mas lukautim mi na bai ol man bilong mekim pasin nogut i no ken bagarapim mi.
3 Maus bilong ol i sap olsem bainat;
Ol i redim ol tok nogut bilong ol bilong sutim long narapela olsem ol spia.
4 Na ol i hait i stap na sutim spia bilong ol long man i no gat asua;
Ol i no pret, ol i sutim em wantu tasol.
5 Ol i holim strong yet tingting nogut bilong ol;*
Ol i toktok wantaim long olsem wanem ol bai haitim ol trap bilong ol.
Ol i tok olsem: “I no gat wanpela bai i lukim.”+
6 Ol i painim ol nupela rot bilong mekim pasin nogut;
Long pasin hait ol i wokim rot pinis bilong mekim samting ol i tingting long en;+
I no gat wanpela man i save long tingting i stap long bel bilong ol wan wan.
7 Tasol God bai sutim ol;+
Wantu spia bai sutim ol na ol bai kisim bagarap.
8 Maus bilong ol yet bai mekim na ol i pundaun;+
Ol man i lukim ol bai i seksekim het bilong ol.
9 Na olgeta man bai pret,
Na ol bai tokaut long ol samting God i bin mekim,
Na ol bai luksave long ol wok em i bin mekim.+