1 Stori
14 King Hiram+ bilong Tair i salim sampela man i go long Devit. Na em i salim tu ol timba bilong diwai sida, ol man i save wok long ston,* na ol kapenta. Ol i kam bilong wokim haus* bilong Devit.+ 2 Na Devit i luksave olsem Jehova i mekim em i kamap king bilong Israel,+ long wanem, em i tingim ol manmeri bilong em, em lain Israel, na em i mekim Devit i kamap strongpela king.+
3 Devit i stap long Jerusalem na em i maritim sampela meri moa.+ Na em i kamapim sampela moa pikinini man na pikinini meri.+ 4 Nem bilong ol pikinini bilong em i bon long Jerusalem+ i olsem: Samua, Sobap, Natan,+ Solomon,+ 5 Iphar, Elisua, Elpelet, 6 Noga, Nefek, Jafia, 7 Elisama, Beliada, na Elifelet.
8 Ol Filistia i harim olsem ol Israel i bin anointim* Devit long kamap king bilong olgeta Israel,+ olsem na ol Filistia i kam bilong pait long em.+ Taim Devit i harim olsem ol i kam, em i go bilong pait long ol. 9 Na ol Filistia i kam na pait long ol manmeri i stap long Veli* Bilong Refaim.+ 10 Na Devit i askim God olsem: “Mi ken i go pait long ol Filistia o nogat? Na bai yu putim ol long han bilong mi o nogat?” Na Jehova i bekim tok long em olsem: “Yu ken i go pait long ol, na bai mi putim ol long han bilong yu.”+ 11 Orait Devit i go pait long ol Filistia long Bal-perasim+ na em i winim ol long pait. Na Devit i tok olsem: “God tru i olsem wara i tait na i brukim lain bilong ol birua bilong mi long han bilong mi.” Olsem na ol i kolim nem bilong dispela ples olsem Bal-perasim.* 12 Ol Filistia i lusim ol god bilong ol long dispela hap, na Devit i tok na ol i kukim ol dispela giaman god long paia.+
13 Bihain ol Filistia i kam bek gen na pait long ol manmeri i stap long veli.*+ 14 Devit i askim God long em i ken i go pait long ol o nogat, tasol God tru i tokim em olsem: “Yu ken i go pait long ol, tasol no ken go stret long ol na pait. Yu mas i go baksait long ol. Na yu mas hait i stap baksait long ol diwai baka. Na bihain yu mas kam ausait na pait long ol.+ 15 Na bai yu harim nois i olsem ol man i mats antap long het bilong ol diwai baka, orait nau yu mas kirap pait long ol, long wanem, God tru bai i go paslain long yu long pait long ol ami bilong Filistia.”+ 16 Orait Devit i bihainim olgeta tok em God tru i bin tokim em long mekim,+ na ol i kilim i dai ol ami bilong Filistia kirap long Gibeon i go inap long Geser.+ 17 Ol manmeri long olgeta kantri i save long biknem bilong Devit, na Jehova i mekim ol manmeri bilong olgeta kantri i pret tru long Devit.+