Jop
24 “Wai na God i Gat Olgeta Strong i no makim taim bilong kotim ol manmeri?+
Na wai na ol manmeri i save long em, ol i no luksave long de* bilong em?
2 Ol man i save surikim mak bilong graun bilong ol arapela i go bek.+
Na ol i save stilim ol sipsip bilong ol arapela na putim long lain sipsip bilong ol yet.
3 Ol i save kisim ol donki bilong ol pikinini i no gat papa
Na ol i save kisim bulmakau man bilong wido meri bai dispela i stap olsem mak bilong em i ken bekim dinau bilong em.+
4 Ol i no save larim ol rabisman i wokabaut long rot.
Na ol rabisman i save hait, long wanem, ol i pret long ol man i save mekim nogut long ol.+
5 Ol rabisman i wok long painim kaikai long ples nating olsem ol wel donki;+
Ol i wok long painim kaikai long ples nating bilong givim long ol pikinini bilong ol.
6 Ol i save kisim kaikai long gaden bilong ol arapela man*
Na taim ol wokman i kisim pinis ol greip long gaden wain bilong ol man nogut, ol rabisman i save raun na kisim ol wan wan greip i stap yet.
7 Long nait ol i save slip skin nating na i no gat klos bilong karamapim skin bilong ol.+
Ol i no gat wanpela samting bilong karamapim skin bilong ol long kol.
8 Ol i stap long ples maunten, na ren i kam daun na wasim ol,
Ol i no gat ples bilong hait long ren, olsem na ol i go hait long ol bikpela ston.
9 Ol man nogut i save go long ol meri, man bilong ol i dai pinis, na pulim pikinini bilong ol i stap yet long susu;+
Na ol i save kisim klos bilong ol rabisman na holim i stap olsem mak bai ol rabisman i ken bekim dinau bilong ol.+
10 Dispela i mekim na ol rabisman i stap skin nating,* na i no gat klos bilong karamapim skin bilong ol,
Na ol i hangre wantaim na karim ol bandel wit samting long gaden bilong ol arapela.
11 Ol i save wok hat stret namel long banis ston i stap arere long ol liklik maunten long taim we san i hat nogut tru,*
Ol i save krungutim ol greip long ol tang ston bilong krungutim ol greip, tasol ol yet i nek drai.+
12 Insait long taun ol manmeri i laik dai i wok long krai nogut tru.
Ol man i kisim bikpela bagarap tru, ol i krai na singaut long wanpela i helpim ol,+
Tasol God i no wari long ol dispela samting i painim ol.*
13 Sampela man i no laikim lait;+
Ol i no luksave long rot bilong en,
Na ol i no bihainim rot bilong en.
14 Kilman i save kirap long bikmoning tru.
Em i save go na kilim i dai ol man i no gat strong na ol rabisman,+
Na long nait em i save go na stilim ol samting.
15 Man i save mekim pasin adaltri,* em i save lukluk na wet inap long apinun tru,+
Em i save tok, ‘No gat man bai luksave long mi!’+
Na em i save karamapim pes bilong em.
16 Long nait ol dispela man i save brukim ol haus na i go insait.*
Na long san ol i save hait i stap insait long haus bilong ol yet.
Ol i no save raun long taim bilong san.+
17 Moning i wankain olsem bikpela tudak long ol.
Ol samting bilong tudak we ol man i save pret long en, ol i no pret long ol dispela samting.
18 Tasol ol bai i go pinis kwiktaim olsem samting em wara i karim i go.*
Na God bai tok na graun bilong ol bai i bagarap.+
Na ol bai i no inap i go bek long gaden wain bilong ol.
19 Long taim bilong san, san i save hat nogut tru na i save mekim sno i melt na i pinis olgeta,
Olsem tasol, Matmat* i save kisim ol man i mekim sin na ol i pinis olgeta!+
20 Na mama* bilong ol bai lusim tingting long ol. Na ol liklik snek bai kaikaim bodi bilong ol.
Na i no gat man bai tingim ol moa.+
Na ol man i save mekim pasin i no stret, ol bai bruk olsem diwai i bruk.
21 Ol i save mekim nogut long ol meri i no inap karim pikinini,
Na ol i no save mekim gutpela pasin long ol wido meri.
22 God* bai mekim wok long strong bilong em na pinisim ol man i gat biknem.
Tru ol inap kisim bikpela namba moa, tasol ol i no save ol bai i stap longpela taim o nogat.
24 Tru, ol i gat biknem, tasol ol bai stap sotpela taim tasol, na bihain ol i no stap moa.+
Ol i olsem ol het bilong wit samting em ol man i katim na bungim.
Biknem bilong ol bai pinis+ na ol bai dai olsem ol arapela manmeri i save dai;
25 Sapos tok bilong mi i no tru, orait husat inap kamapim ples klia olsem mi tok giaman?
Na husat inap soim olsem tok bilong mi i no tru?”