Namba
24 Nau Balam i save olsem Jehova i laik blesim ol Israel, olsem na em i no moa lukluk long ol mak bilong kisim save long samting nogut bai painim ol Israel. Nogat.+ Em i tanim na lukluk i go olsem long ples nating. 2 Na Balam i lukim ol wan wan traib bilong ol Israel i sindaun long kem bilong ol.+ Na spirit bilong God i kam long em.+ 3 Na em i autim wanpela tok profet olsem:+
“Dispela em tok bilong mi Balam, pikinini man bilong Beor,
Em tok bilong man em ai bilong em i klia tru,
4 Em tok bilong man i harim tok God i givim,
Em i lukim visen bilong God i Gat Olgeta Strong,
Em i putim pes i go daun long graun na ai bilong em i op i stap.+
5 Mi lukim ol haus sel bilong yu ol i gutpela tru, O Jekop,
Em ol ples slip bilong yu, O Israel!+
6 Ol haus sel bilong ol i karamapim longpela hap olsem ol veli,*+
Olsem ol gaden i stap arere long wara,
Olsem ol diwai aloe em Jehova i bin planim,
Olsem ol diwai sida i stap arere long wara.
7 Wara i wok long drip i kam daun long 2-pela baket bilong em,
Na ol i planim ol sid bilong em klostu long ol wara.+
8 God i bin kisim em long Isip na bringim em i kam;
Long ol Israel, God i olsem kom bilong wel bulmakau man.
Em bai daunim ol arapela lain, ol birua bilong em,+
Na em bai kaikaim ol bun bilong ol na em bai bagarapim ol long ol spia bilong em.
9 Em i sindaun na stap isi olsem wanpela laion i malolo i stap,
Na olsem wanpela laion, husat inap kirapim em?
Ol man i blesim yu bai kisim blesing,
Na ol man i mekim tok long ol samting nogut i ken painim yu, orait samting nogut i ken painim ol.”+
10 Na Balak i belhat nogut tru long Balam. Na Balak i kros na paitim han bilong em na em i tokim Balam olsem: “Mi bin singautim yu i kam bilong tokaut long samting nogut i mas painim ol birua bilong mi.+ Tasol yu no mekim olsem. Inap 3-pela taim yu mekim tok bilong blesim ol. 11 Olsem na maski. Yu go bek long ples bilong yu nau. Pastaim mi bin tingting long givim yu bikpela ona,+ tasol harim! Jehova i pasim rot bilong yu na yu no inap kisim dispela ona.”
12 Na Balam i bekim tok bilong Balak olsem: “Mi bin tokim ol man em yu bin salim i kam olsem, 13 ‘Maski Balak i laik givim mi haus bilong em i pulap long silva na gol, bai mi no inap bihainim laik bilong mi yet na sakim tok bilong Jehova, maski em long mekim gutpela samting o samting nogut. Mi bai autim tasol ol tok em Jehova i givim long mi.’+ 14 Na nau mi bai go bek long ol lain bilong mi, tasol pastaim mi mas toksave long yu long ol samting ol Israel bai mekim long ol lain pipol bilong yu long bihain.”* 15 Na Balam i autim wanpela tok profet olsem:+
“Dispela em tok bilong mi Balam, pikinini man bilong Beor,
Em tok bilong man em ai bilong em i klia tru,+
16 Em tok bilong man i harim tok God i givim,
Na em i kisim save em God Antap Tru i givim long em,
Em i lukim visen bilong God i Gat Olgeta Strong,
Taim em i putim pes i go daun long graun na ai bilong em i op i stap.
17 Bai mi lukim em, tasol i no long nau,
Bai mi lukim em, tasol long bihain.
Wanpela sta+ bai kamap long lain pikinini bilong Jekop,
Stik bilong king*+ bai kamap long lain pikinini bilong Israel,+
Na em bai brukim poret bilong Moap,+
Na bun bilong het bilong ol pikinini man husat i save kamapim bagarap.
18 Em bai winim ol Idom na kisim graun bilong ol,+
Yes, ol birua bilong Seir+ bai kisim graun bilong Seir,+
Long dispela taim Israel bai soim olsem em i no pret.
19 Na wanpela man long lain bilong Jekop bai i go pait na daunim ol manmeri,+
Na ol man i bin abrusim bagarap long taim taun i kisim bagarap, em bai pinisim ol.”
20 Taim em i lukim ol Amalek, em i autim yet dispela tok profet bilong em olsem:
21 Taim em i lukim ol Kin,+ em i autim yet tok profet bilong em olsem:
“Ples yupela i stap long en, em i wanpela strongpela hap, olsem haus bilong pisin i stap gut antap long traipela ston.
22 Tasol bihain wanpela man bai kukim Kain.*
I no longtaim na ol Asiria bai kisim yupela i go kalabus.”
23 Na em i autim yet tok profet bilong em olsem:
“Sapos God i wokim dispela kain pasin, husat inap stap gut?
24 Ol sip bai lusim nambis bilong Kitim+ na kam,
Na ol bai bagarapim Asiria,+
Na ol bai bagarapim Eber.
Tasol em tu bai pinis olgeta.”
25 Balam+ i tok pinis, orait em i kirap na i go bek long ples bilong em. Na Balak tu i kirap na go long ples bilong em.