Obadia
1 Dispela em visen bilong Obadia:*
Nambawan Bikpela Jehova i mekim dispela tok long Idom:+
“Mipela i harim wanpela ripot i kam long Jehova,
Em i salim wanpela man bilong bringim tok i go long ol kantri:
‘Yupela kirap, kam na yumi redi long go pait long em.’”+
2 “Harim! Mi mekim yu i kamap samting nating namel long ol arapela kantri;
Ol i heitim yu tru.+
3 Pasin antap bilong bel bilong yu yet i giamanim yu,+
Yu save stap long ol ples hait bilong traipela ston,
Yu stap long ples antap, na long bel yu tok olsem,
‘Husat inap pulim mi i go daun long graun?’
4 Maski sapos yu wokim ples bilong yu long antap* olsem wanpela tarangau,
O yu wokim haus bilong yu namel long ol sta,
Mi bai pulim yu long dispela ples i kam daun,” dispela em tok bilong Jehova.
5 “Sapos ol stilman i kam long yu, na ol raskol i kam long nait,
Ating ol bai stilim tasol ol samting ol i laikim, a?
O sapos ol man bilong bungim ol greip i kam long yu,
Ating ol i no save kisim olgeta, a?+
Tasol ol birua bilong yu bai bagarapim yu olgeta!*
6 O sori tru, ol i painim olgeta samting bilong Iso!
Ol i painim pinis na kisim olgeta gutpela gutpela samting bilong em i stap hait!
7 Ol i rausim yu i go stap long boda.
Olgeta poroman bilong yu* i bin giamanim yu.
Ol man i stap bel isi wantaim yu, ol i bin pait na daunim yu.
Ol man i kaikai bret wantaim yu, ol bai putim wanpela umben bilong holimpasim yu,
Tasol yu no inap luksave long dispela.
8 Long dispela de,” Jehova tok,
“Bai mi bagarapim ol man i gat savetingting long Idom,+
Na bai mi bagarapim ol man i gat gutpela tingting bilong skelim ol samting em ol i stap long ol ples maunten bilong Iso.
9 Na ol soldia bilong yu bai pret tru,+ O Teman,+
Long wanem, olgeta wan wan bilong ol bai pinis olgeta+ long ol ples maunten bilong Iso.
10 Yu bin pait na mekim nogut long brata bilong yu, Jekop,+
Olsem na bai yu sem pipia tru,+
Na yu bai pinis olgeta na stap olsem inap oltaim oltaim.+
11 Long dispela de, taim yu bin sanap tasol na lukluk,
Long dispela de, taim ol man i kam kisim lain ami bilong em i go kalabus,+
Na taim ol man bilong narapela ples i kam insait long taun* bilong em na pilai satu*+ bilong kisim Jerusalem,
Yu bin mekim pasin olsem wanpela bilong ol.
12 Yu no ken belgut long taim samting nogut+ i painim brata bilong yu,
Yu no ken amamas taim ol manmeri bilong Juda i bagarap olgeta,+
Na yu no ken tok hambak long taim hevi i painim ol.
13 Yu no ken kam insait long taun* bilong ol manmeri bilong mi taim bikpela bagarap i painim ol,+
Yu no ken belgut long hevi bilong em taim bikpela bagarap i painim em,
Na yu no ken putim han long kisim ol mani kago bilong em taim bikpela bagarap+ i painim em.
14 Yu no ken sanap long ol rot bung na kilim ol manmeri bilong em husat i laik ranawe,+
Na yu no ken putim ol manmeri bilong em husat i bin abrusim bagarap long han bilong ol birua bilong ol long taim hevi+ i painim ol.
15 De bilong Jehova long bagarapim olgeta kantri i kam klostu pinis.+
Samting yu bin mekim long ol arapela, wankain samting ol bai mekim long yu.+
Pasin yu mekim long ol arapela, ol bai mekim wankain pasin long yu.
16 Pasin yu bin mekim long dring wain long maunten holi bilong mi,
Long wankain pasin olgeta kantri bai wok long dringim+ belhat bilong mi olsem wain.
Tru tumas ol bai dringim belhat bilong mi na daunim i go daun.
Na bai i luk olsem ol i no bin stap laip bipo.
17 Tasol ol man i ranawe, ol bai stap long Maunten Saion,
Na dispela maunten bai stap holi;+
Na lain bilong Jekop bai kisim bek ol samting i bilong ol.+
18 Lain bilong Jekop bai kamap wanpela paia,
Na lain bilong Josep bai kamap wanpela paia i lait bikpela,
Na lain bilong Iso bai kamap olsem bun bilong wit samting i stap yet long gaden;
Em ol bai kukim na paia i pinisim olgeta,
Na i no gat wanpela long lain bilong Iso+ bai abrusim bagarap,
Long wanem, Jehova yet i tok pinis.
Ol bai kisim graun bilong Efraim na graun bilong Samaria,+
Na Benjamin bai kisim Gileat.
20 Ol manmeri bilong dispela strongpela banis,+ em ol i bin rausim ol long ples bilong ol,
Ol dispela manmeri i bilong Israel, na ol bai kisim graun bilong ol Kenan i go inap long Sarefat.+
Na ol manmeri bilong Jerusalem, em ol i bin rausim ol long ples bilong ol, na ol i stap long Sefaret, ol bai kisim ol taun bilong Negev.+