Buk Song
71 O Jehova, mi kam long yu bai yu ken stap ples hait bilong mi.
Olsem na yu no ken larim mi i kisim sem.+
2 Yu save mekim stretpela pasin, olsem na yu mas helpim mi na kisim bek mi.
Putim yau long* singaut bilong mi na kisim bek mi.+
3 Yu stap olsem strongpela ples hait bilong mi antap long bikpela ston
Na olgeta taim mi ken i go insait long en.
Givim tok long ol bai kisim bek mi,
Long wanem, yu olsem bikpela ston na strongpela banis bilong mi.+
4 O God bilong mi, kisim bek mi long han bilong ol man nogut,+
Na long han bilong ol man i no save bihainim stretpela pasin na i save daunim ol arapela.
5 O Nambawan Bikpela Jehova, mi save bilip na wet long yu tasol;
Kirap long taim mi yangpela yet na i kam inap long nau, mi save bilip long yu.+
6 Kirap long taim mi bon, mi save wet long yu helpim mi;
Yu tasol i kisim mi long bel bilong mama bilong mi.+
Oltaim mi save preisim yu.
7 Planti man i lukim mi na ol i kirap nogut long ol samting i kamap long mi,
Tasol yu strongpela ples hait bilong mi.
8 Maus bilong mi i pulap long ol tok bilong preisim yu;+
Long olgeta de mi bai tokaut long biknem bilong yu.
9 Taim mi kamap lapun, yu no ken rausim mi i go;+
Taim strong bilong mi i pinis, yu no ken givim baksait long mi.+
10 Ol birua bilong mi i mekim tok bilong bagarapim mi,
Na ol man i laik kilim mi i dai, ol i bung na pasim tok,+
11 Ol i tok olsem: “God i givim baksait pinis long em.
Yumi ranim em na holimpas em, long wanem, i no gat wanpela bilong kisim em bek.”+
12 O God, no ken i stap longwe long mi.
God bilong mi, kam hariap na helpim mi.+
13 Ol man i birua long mi
Yu ken daunim ol na pinisim ol tru.+
Ol man i laik bai hevi i painim mi
Yu ken daunim ol na mekim ol i sem nogut tru.+
14 Tasol oltaim mi bai wet long yu i helpim mi;
Bai mi preisim yu moa yet.
15 Oltaim mi bai tokaut long stretpela pasin bilong yu,+
Na pasin bilong yu long kisim bek man.
Yu save mekim ol dispela pasin planti taim na mi no inap kaunim hamas taim yu bin mekim olsem.+
16 O Nambawan Bikpela Jehova,
Mi bai go na tokaut long ol bikpela wok bilong yu;
Mi bai tokaut long stretpela pasin bilong yu wanpela tasol.
17 O God, yu bin skulim mi kirap long taim mi yangpela yet,+
Na i kam inap long nau, mi save tokaut yet long ol gutpela wok bilong yu.+
18 O God, maski mi kamap lapun na mi gat waitpela gras, yu no ken givim baksait long mi.+
Bai mi tokaut long ol lain i kamap bihain long strong* bilong yu
Na mi bai tokaut tu long bikpela strong bilong yu long ol lain i kamap bihain.+
19 O God, stretpela pasin bilong yu i nambawan tru;+
Yu bin mekim planti bikpela wok;
God, i no gat wanpela i olsem yu.+
20 Maski yu bin larim mi i karim planti pen na hevi,+
Yu mas strongim mi gen;
Yu mas kisim mi long ples i daun tru insait long graun na bringim mi i kam antap.+
21 Yu ken mekim biknem bilong mi i go bikpela moa yet
Na lukautim mi na mekim bel bilong mi i stap isi.
22 O God bilong mi, yu no save lusim mi+
Olsem na bai mi pilaim instramen i gat string na preisim yu.