Buk Song
148 Preisim Ja!*
Yupela ol lain i stap long heven, preisim Jehova;+
Yupela ol lain i stap antap, preisim em.
2 Yupela olgeta ensel bilong em, preisim em.+
Yupela olgeta ami bilong em, preisim em.+
3 San na mun, yutupela preisim em.
Na olgeta sta i lait tumas, yupela preisim em.+
4 Heven antap tru, preisim em
Na wara i stap antap long skai tu.
5 Ol dispela samting i mas preisim nem bilong Jehova,
Long wanem, em i tok na em yet i bin wokim ol.+
6 Em i putim ol na ol i stap oltaim oltaim long ples bilong ol;+
Em i putim lo we ol i mas bihainim.+
7 Preisim Jehova yupela olgeta samting i stap long graun,
Na yupela bikpela animal bilong solwara na yupela ol wara i dip,
8 Na yu laitning, na ren ais, na sno, na blakpela klaut,
Na yu strongpela win, yupela bihainim tok bilong em,+
9 Yupela ol maunten na yupela ol liklik maunten,+
Na yupela ol diwai i save karim prut na yupela ol diwai sida,+
10 Yupela ol wel animal+ na yupela ol animal bilong ples,
Na yupela ol palai samting na yupela ol pisin,
11 Yupela ol king bilong graun na yupela olgeta kantri,
Na yupela ol hetman na yupela ol jas bilong graun,+
12 Yupela ol yangpela man na yupela ol yangpela meri,*
Na yupela ol lapun man na ol yangpela tu.*
13 Yupela olgeta i mas preisim nem bilong Jehova,
Long wanem, nem bilong em tasol i stap antap moa winim ol arapela nem.+
Na biknem bilong em i antap tru winim heven na graun.+
14 Em bai mekim ol manmeri bilong em i kamap strong moa,
Na em bai mekim ol arapela i givim biknem long ol man i stap gut long em,
Em ol Israel, ol manmeri i stap klostu long em.
Preisim Ja!*