Jeremaia
16 Orait Jehova i tokim mi gen olsem: 2 “Taim yu stap long dispela ples, yu no ken maritim meri na kamapim ol pikinini man na ol pikinini meri. 3 Mi Jehova, mi tok long ol samting bai kamap long ol pikinini man na ol pikinini meri i bon long dispela kantri. Na mi tok tu long ol papa bilong ol na ol mama bilong ol olsem: 4 ‘Ol bai kisim sik nogut na ol bai dai,+ na i no gat wanpela bai i krai sori long ol na planim ol; bodi bilong ol bai stap nabaut long graun olsem pekpek.+ Bainat na bikpela hangre bai pinisim ol olgeta+ na ol bodi bilong ol bai kamap kaikai bilong ol pisin na ol animal.’
5 Jehova i tok olsem,
‘No ken go long haus em ol manmeri i stap long en na krai sori long man i dai pinis,
Na yu no ken go na krai na tok sori long ol.’+
‘Long wanem, mi rausim pinis bel isi bilong mi long ol dispela manmeri,’ mi Jehova, mi tok olsem,
‘Na mi no ken soim gutpela pasin laikim* long ol na marimari long ol.+
6 Ol bikman na ol man nating bai dai long dispela kantri.
Na i no gat man bai planim bodi bilong ol,
Na i no gat man bai krai sori long ol,
Na tu, i no gat man bai katim skin bilong em yet o sevim olgeta gras long het bilong em bilong soim sori long ol.*
7 Na i no gat man bai givim kaikai long ol man i krai sori long man i dai,
Bilong strongim bel bilong ol long famili bilong ol i dai;
Na tu, i no gat man bilong givim ol kap wain bilong mekim bel bilong ol i stap isi
Bilong dringim long papa o mama bilong ol i dai.
8 Na yu no ken go long haus bilong ol man i mekim bikpela kaikai
Na sindaun wantaim ol bilong kaikai na dring.’
9 “Jehova, bosman bilong bikpela lain ami,* em God bilong Israel, em i tok olsem, ‘Long dispela ples, nau long taim yupela i stap, bai yupela i lukim mi pinisim nois bilong ol man i belgut na amamas, na yupela i no inap harim nek bilong man i laik marit na nek bilong meri i laik marit.’+
10 “Taim yu tokim ol dispela manmeri long ol dispela tok, ol bai askim yu olsem, ‘Bilong wanem Jehova i tok long mekim olgeta dispela samting nogut i kamap long mipela? Mipela i bin mekim wanem rong na sin long Jehova, God bilong mipela?’+ 11 Orait yu mas bekim tok bilong ol olsem, ‘“Long wanem, ol tumbuna papa bilong yupela i bin givim baksait long mi,”+ mi Jehova, mi tok olsem, “na ol i wok long bihainim ol arapela god na lotu long ol na brukim skru long ol.+ Na ol i givim baksait long mi, na ol i no bihainim lo bilong mi.+ 12 Na yupela i mekim ol pasin nogut moa yet winim ol tumbuna papa bilong yupela,+ na olgeta wan wan bilong yupela i strong long bihainim ol laik nogut bilong bel bilong yupela yet, na yupela i no bihainim tok bilong mi.+ 13 Olsem na bai mi rausim yupela long dispela kantri i go long narapela kantri em yupela na ol tumbuna papa bilong yupela i no save long en.+ Na long dispela hap, yupela bai i lotuim ol arapela god long san na nait,+ long wanem, mi bai i no marimari long yupela.”’
14 “‘Tasol wanpela taim bai i kamap,’ Jehova i tokaut olsem, ‘em taim we ol bai i no moa tok olsem: “Mipela tok tru antap long Jehova i stap laip, em man i bin kisim ol manmeri bilong Israel long Isip na bringim ol i kam!”+ 15 tasol ol bai tok olsem: “Mipela tok tru antap long Jehova i stap laip, em man i bin kisim ol manmeri bilong Israel long hap not na long ol arapela kantri we em i bin rausim ol i go long en!” Mi bai bringim ol i kam bek long graun bilong ol, em mi bin givim long ol tumbuna papa bilong ol.’+
16 ‘Mi bai salim planti man bilong kisim pis i kam,’ Jehova i tok olsem,
‘Na ol bai kisim ol olsem ol man i save kisim ol pis.
Bihain mi bai salim planti man bilong painim abus i kam,
Na ol bai go painim ol olsem man i go painim abus long olgeta bikpela na liklik maunten
Na ol bai painim ol long ol hul bilong ol bikpela ston.
17 Long wanem, mi save lukim olgeta samting ol i mekim.*
Ol i no inap haitim ol pasin bilong ol long mi,
Na sin bilong ol tu i no hait long ai bilong mi.
18 Orait pastaim, bai mi bekim pe inap stret long rong bilong ol na sin bilong ol,+
Long wanem, ol i bin mekim graun bilong mi i kamap doti long ol stingpela imis bilong ol i no gat laip
Na ol i pulapim graun bilong mi long ol samting mi heitim tru.’”+
19 Jehova, yu save strongim mi na yu strongpela ples hait bilong mi,
Long taim bilong hevi, yu stap olsem ples mi save ranawe i go long en,+
Ol lain manmeri long olgeta hap bilong graun bai i kam long yu,
Na ol bai i tok olsem: “Ol tumbuna papa bilong mipela i bin kisim ol imis,*
Em ol samting nating tasol na i no inap helpim mipela.”+
20 Ating man inap wokim ol god, a? Nogat tru.
Ol samting em i wokim, ol i no god tru.+
21 “Olsem na mi bai skulim ol,
Long dispela taim mi bai mekim ol i save long bikpela strong bilong mi,
Na ol i mas save olsem nem bilong mi Jehova.”