“Kisim Drak na Sekanim Satan!”
Sapos man i kaikai drak bilong kisim amamas, dispela samting inap mekim wanem long skin bilong em? Tingim Sals. Em i gat 15 krismas tasol taim susa bilong em i soim rot long em long kaikai drak. Insait long 15 yia Sals i save kaikai maruana, koken na heroin. Em i stil na hansapim ol man na stilim samting bilong ol, olsem na em i bin stap long kain kain skul kalabus. Long rot bilong ol dispela drak em i kisim sik AIDS. Em i bel hevi tru taim ol dokta i tokim em, em i gat dispela sik AIDS. Taim em i lukim longpela, strongpela bodi bilong em i go bun nating, bel bilong em i bagarap stret. Kaunim dispela stori bilong em na askim yu yet, ‘I gutpela mi mekim olsem?’ Sals i stori olsem:
“TAIM mi kisim drak bilong painim amamas em i bagarapim gutpela bodi bilong mi. Na tu, i gat planti gutpela samting mi no inap mekim, long wanem mi kisim drak. Mi no inap pilai wantaim liklik pikinini meri bilong mi. Mi no inap pilai bal wantaim em. Mi no inap lukim liklik pikinini man bilong mi i lain long wokabaut na i go bikpela. Mi no inap kisim meri bilong mi i go danis, long wanem, mi no inap danis moa. Klostu olgeta spot mi no inap insait long en, long wanem, bodi bilong mi i olsem em i dai na em i no wok gut. Em i wok isi isi tasol.
“Han bilong mi i no wok gut olsem bipo. Nau mi no inap sev o katim maus gras bilong mi o katim gras bilong het bilong mi olsem bipo mi bin mekim. Na tu, mi no inap putim klos olsem bipo mi bin mekim. Mi no inap tru long pasim baten long siot bilong mi. Mi wanpela i no inap i go long toilet o waswas—i mas i gat wanpela bilong helpim mi. Sampela taim mi no inap rausim liklik gras bilong ai taim em i go insait long ai, long wanem, pinga bilong mi i no wok gut. Mi no inap kukim kaikai olsem bipo mi bin mekim. Ol i rausim mi long wok mani bilong mi long putim tail na kapet long flua, long wanem, mi kisim drak nogut na dispela sik AIDS i painim mi.
“Olgeta man i mas lukautim mi. Mi olsem wanpela liklik pikinini tru. Kru bilong mi i no wok olsem bipo em i wok. Mi no inap tingting gut. Olsem: I gat wanpela man i save lukautim mi long haus, tasol oltaim mi hatwok long tingim nem bilong em. Taim meri bilong mi i tokim mi long wanpela samting, em i mas kolim kolim planti taim. Tasol maski em i mekim olsem, mi save lusim tingting. Na nau dispela hevi i go bikpela tru.
“Olgeta hap bilong bodi bilong mi i pen. Long olgeta de i no gat wanpela minit na bodi bilong mi i no pen. Dispela kain pen inap mekim wanpela strongpela man i krai, maski yu husat. Ol dokta i givim marasin long mi bilong pasim pen, tasol dispela marasin i save bagarapim bel, olsem na sua i save kamap long bel. Olsem na mi no inap dring dispela marasin olgeta taim, long wanem dispela sua i stap na blut i save kamap insait long bel, na taim mi kus, blut i save kamap long maus. Sapos skin bilong mi i kisim liklik bagarap, olsem katim pinga samting, mi mas was gut, long wanem kwiktaim ol binatang bilong sik i save go insait long en. Skin bilong mi i no gat strong. Sori tru, mi no inap pilai moa wantaim pikinini man bilong mi.
“Mi bin ting dispela samting i no inap painim mi. Insait long 15 yia mi bin hambak na kisim ol drak na mi ting wanpela samting nogut i no inap painim mi. Tasol nogat; nau mi gat dispela sik AIDS. Mi no save long wanem taim bai mi dai.
“Olsem na sapos wanpela i laik lusim Jehova bilong kisim ol drak, na painim amamas, em i mas tingting gut pastaim—Em i mas save, sapos em i kisim drak, i olsem em i sekanim Satan, long wanem, ol drak i olsem rot bilong Satan long bagarapim man!”
Taim dispela man Sals i lainim tok i tru bilong Baibel em i lusim dispela pasin bilong kisim drak na em i baptais na kamap wanpela Witnes Bilong Jehova. Taim em i stap long haus sik, em i no les long autim tok bilong Baibel long ol dokta na nes na ol narapela sikman i save slip long haus sik. Tripela yia samting bihain long baptais bilong em, Sals em i dai. Em i dai long Janueri 27, 1990, taim em i gat 37 krismas tasol.