Ol Bikpela Sik—Inap Bagarapim Man Tasol i Gat Rot Bilong Pasim
STORI bilong ol bikpela bagarap olsem guria na tait wara i save kamap long ol het-tok bilong ol nius, tasol ol i no save stori tumas long ol bikpela sik i save kalap long ol narapela. Wanpela ripot bilong lain Red Cross/Red Crescent bilong Jun 2000 i kamapim olsem, “namba bilong ol man i dai long ol bikpela sik (olsem sik AIDS, malaria, sik sotwin, na pekpek wara) i winim tru namba bilong ol man i dai long rot bilong ol guria samting long yia i go pinis inap 160 taim. Na dispela hevi i wok long i go nogut moa.”
Ol i tok tupela samting i as na planti man moa i dai long ol bikpela sik. Wanpela as em sik AIDS i wok long kamap bikpela moa na i save kilim i dai 300 man long olgeta aua. Peter Walker, em dairekta bilong lain International Federation of Red Cross na Red Crescent Societies, em i tok, sik AIDS “i no wanpela sik tasol, nogat; nau em i wanpela bikpela bagarap. Dispela kain sik i save kilim i dai ol man i mekim wok na dispela i bagarapim ol samting bilong mani.” Na narapela as em olsem: I no gat ol gutpela samting bilong helt, olsem na ol sik olsem TB, sifilis, na malaria i kamap bikpela gen. Olsem: Long wanpela kantri long Esia inap 40,000 man i save kisim sik TB long olgeta yia. Insait long 10-pela yia i go pinis long wanpela kantri long Isten Yurop, namba bilong ol man i kisim sifilis i go bikpela inap 40 taim.
Ol bikpela sik i wok long bagarapim ol man, tasol i gat rot bilong pasim ol dispela sik. Ripot i tok, planti bilong ol dispela 13 milion man i dai long bikpela sik long 1999, ol bai i no bin dai ‘sapos gavman i bin tromoi 15 kina bilong helpim wan wan sikman.’ Sapos ol gavman bilong graun i redi long tromoi 15 kina bilong helpim wan wan man long kisim ol marasin samting—inap 90 bilion kina long olgeta dispela man—dispela inap pasim planti man long indai!
Dispela em i bikpela mani tru, tasol em i olsem liklik mani tasol taim yumi skelim wantaim mani ol i tromoi long ol narapela wok. Olsem: I no longtaim i go pinis na insait long wanpela yia, long olgeta hap ol i tromoi inap 2,704 bilion kina long ol samting bilong pait—olsem 450 kina long wanpela man. Tingim bikpela mani ol i tromoi long ol samting bilong pait na ol i no tingting long pasim ol sik i save kalap long planti man! Ating ol man i no inap long pasim ol bikpela sik i save kalap long planti man—i no olsem ol i sot long mani, tasol i gat sampela bikpela as na ol i no inap long mekim olsem. Ol gavman bilong ol man i no inap tingim wanem ol samting i bikpela samting tru.
[Ol Piksa Kredit Lain long pes 31]
X ray: New Jersey Medical School—National Tuberculosis Center
Photo of man coughing: WHO/Thierry Falise