Ol Famili i Stap Gut—Hap 2
Olsem “Ol Famili i Stap Gut—Hap 1” i kamapim, ol stiatok bilong Baibel inap strongim ol famili long taim bilong hevi.a God Jehova i tokim ol lain i save bihainim ol lo bilong em, olsem: “Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.”—Song 32:8.
Karim hevi bilong mani. Planti taim ol samting bilong mani i as bilong ol tok pait bilong ol marit. Tasol ol stiatok bilong Baibel inap helpim ol famili long kisim stretpela tingting taim ol i gat hevi bilong mani. Jisas i tok: “Yupela i no ken tingting planti long laip bilong yupela na tok, ‘Bai yumi kaikai wanem samting? Bai yumi dring wanem samting?’ Na yupela i no ken tingting planti long bodi bilong yupela na tok, ‘Bai yumi pasim wanem laplap?’ . . . Papa bilong yupela i stap long heven em i save pinis, yupela i mas kisim dispela olgeta kain samting.”—Matyu 6:25, 32.
Long pes 23, Issachar, long Amerika, i stori long olsem wanem em na famili bilong em i bin karim hevi bilong mani taim saiklon Katrina i bagarapim haus bilong ol.
Taim wanpela long famili i kisim bikpela sik. Olgeta man i save kisim sik. Planti taim sik i stap inap sampela de tasol na man i orait hariap. Tasol olsem wanem sapos wanpela long famili i kisim bikpela sik i no inap pinis? Baibel i tok Jehova inap lukautim ol man i sik. (Song 41:1-3) Olsem wanem famili inap i stap olsem rot bilong Jehova long givim kain helpim olsem?
Long pes 24, Hajime, wanpela man marit long Japan, i stori long olsem wanem em na ol pikinini meri bilong em i wok gut wantaim bilong helpim meri bilong em, Noriko, bihain long em i kisim wanpela bikpela sik i bagarapim em tru.
Taim pikinini i dai. Taim pikinini i dai, dispela i wanpela bikpela bel hevi tru i painim famili. Jehova i tok promis long pinisim aiwara bilong bel hevi em dai bilong pikinini i save kamapim. (KTH 21:1-4) Long nau tu, em i save mekim gut bel bilong ol man i krai sori.—Song 147:3.
Long pes 25, Fernando na Dilma, long Amerika, i stori long olsem wanem Baibel i bin strongim ol long karim hevi taim liklik pikinini meri bilong ol i dai.
Baibel inap helpim tru ol famili i karim bikpela hevi, olsem ol stori long ol pes bihain long dispela i kamapim klia.
[Futnot]
a Lukim pes 14-17 long dispela nius.
[Blok/Ol Piksa long pes 23]
Karim Hevi Bilong Mani
Stori bilong Issachar Nichols, Amerika
“Saiklon Katrina i bagarapim haus bilong mipela, na as bilong haus tasol i stap. Inap wan na hap mun wara i pulap i stap long skul mi wok long en.”
LONG taim bilong san long 2005, mi na meri bilong mi Michelle, na pikinini meri bilong mipela i gat 2-pela krismas, em Sydney, mipela i sindaun long Bay St. Louis, Mississippi, Amerika. Mipela i Witnes Bilong Jehova, na mitupela Michelle i bin putim mak long mekim bikpela wok Kristen bilong autim tok. Mi wanpela tisa, na skul mi wok long en i stap long New Orleans, Louisiana. Mi wok tripela de long olgeta wik na long ol narapela de mi lusim bikpela hap taim bilong skulim ol man long Baibel. Mipela i amamas long ol wok samting mipela i save mekim. Orait nau mipela i kisim toksave olsem saiklon Katrina bai kam. Mipela i stretim ol samting bilong lusim hariap dispela hap.
Taim saiklon i pinis, haus bilong mipela long Bay St. Louis i bagarap pinis, na skul mi mekim wok tisa long en long New Orleans, em tu i bagarap. Mani mipela i kisim long insurens na gavman, dispela i helpim mipela long kisim haus, tasol mi hatwok long painim wanpela wok mani stret. Na tu, meri bilong mi i kisim vairas long doti wara. Dispela i mekim na bodi bilong em i no gat strong long daunim sik, na bihain em i kisim Wes Nail vairas long rot bilong moskito. Na pe bilong baim kaikai samting na insurens i wok long i go antap.
Sindaun bilong mipela i senis, na mipela i no inap tromoi bikpela mani bilong baim ol samting, maski em ol samting mipela i mas kisim. Mi mas redi long mekim olgeta kain wok.
Mi mas tokaut stret olsem taim olgeta kago bilong mipela i lus, dispela i hatwok tru long mipela. Tasol mipela i tenkyu long mipela i stap laip. Na dispela hevi i painim mipela i kamapim klia olsem ol samting bilong skin i helpim yumi liklik tasol. Dispela hevi i kirapim mipela long tingim tok bilong Jisas, olsem: “Maski yu yet yu gat planti samting moa, tasol yu no inap kisim laip long ol dispela samting bilong yu.”—Luk 12:15.
Mipela i luksave tu olsem maski mipela i bel hevi long ol samting bilong mipela i lus, i gat planti man em planti samting moa bilong ol i lus—sampela i dai tu. Dispela em i wanpela as na bihain stret long dispela bikpela bagarap, mi insait long wok bilong helpim ol man, mekim gut bel bilong ol man em dispela bikpela hevi i painim ol.
Taim mipela i wok long karim dispela hevi, tok bilong Song 102:17 i bin mekim gut bel bilong mipela. Em i tok God Jehova ‘i harim beten bilong ol manmeri bilong en, em ol i stap nating. Bai em i no ken givim baksait long ol prea bilong ol.’ Mipela famili olgeta i pilim helpim Jehova i save givim!
[Blok long pes 23]
Bihain long saiklon Katrina na saiklon Rita i bin bagarapim Gulf Coast bilong Amerika long 2005, kwiktaim ol Witnes Bilong Jehova i kamapim 13 hap bilong lukautim ol lain em haus bilong ol i bagarap, 9-pela haus kago, na 4-pela hap bilong kisim petrol samting. Klostu 17,000 Witnes long Amerika na long 13 narapela kantri ol i kam na volantia long helpim wok bilong helpim ol man. Ol i bin stretim planti tausen haus.
[Blok/Ol Piksa long pes 24]
Taim Wanpela Long Famili i Kisim Bikpela Sik
Stori bilong Hajime Ito, Japan
“Paslain long Noriko i kisim sik, pasin bilong kuk wantaim em i wanpela feiveret wok bilong mipela. Nau em i no inap kaikai o dring na em i no inap toktok tu. Em i sindaun long wilsia na masin i helpim em long pulim win.”
LONG Me 2006, meri bilong mi, Noriko, i kirap pilim olsem i hatwok long toktok. Long Julai samting em i kirap pilim olsem i hatwok long em i kaikai na dring. Long Septemba, ol dokta i tok em i gat sik ALS (amyotrophic lateral sclerosis)—em wanpela sik i save bagarapim ol nev sel insait long kru na bun bilong baksait. Insait long 4-pela mun tasol, sindaun bilong mipela i senis olgeta. Na dispela em i kirap tasol bilong ol hevi bilong Noriko.
Bihain, tang na han sut bilong Noriko i paralais. Ol i katim hul long bel bilong em na putim gumi i go insait long bel na bai em inap kaikai. Ol i katim tu hul long nek bilong em na putim gumi i go insait long nek bambai em i ken pulim win, tasol dispela i mekim na em i no inap toktok moa. Dispela i bagarapim tru bel bilong Noriko, long wanem, em i meri bilong mekim planti samting. Mipela i Witnes Bilong Jehova, na Noriko wantaim ol pikinini meri bilong mipela i mekim wok Kristen bilong autim tok fultaim. Nau masin i helpim Noriko long pulim win, na bikpela hap taim em i save stap long bet tasol.
Tasol dispela i no stopim Noriko! Em i save go long ol miting Kristen long wilsia, na long wilsia ol i pasim masin bilong helpim em long pulim win. Em i no inap harim gut moa ol tok, olsem na pikinini meri bilong mipela i save raitim ol tok bilong miting long bikpela rait na bai ol miting i ken helpim em. Na maski Noriko i mas lusim wok bilong autim tok fultaim, em i save raitim yet ol pas long ol man, na lainim ol long ol gutpela tok bilong Baibel. Em i mekim olsem long rot bilong spesel tul i stap long kompiuta bilong mipela.—2 Pita 3:13; KTH 21:1-4.
Mipela famili olgeta i wok gut wantaim bilong helpim Noriko. Tupela pikinini meri bilong mi i kisim nupela wok mani bambai ol inap mekim bikpela wok moa long haus. Mipela tripela i save mekim ol wok bilong haus em bipo Noriko i save mekim.
Sampela moning taim mi lukluk long Noriko, em i save luk taiet. Mi save tingting, ‘Mi laik tokim em olsem em i mas malolo nau.’ Tasol Noriko i laik autim tok bilong Baibel long ol narapela man. Taim mi kirap redim kompiuta bilong em i ken yusim, ai bilong Noriko i save lait! Taim em i raitim ol pas, em i save pilim gutpela. Mi lukim olsem taim man i “wok strong long mekim wok bilong Bikpela,” dispela i save helpim em tru.—1 Korin 15:58.
Stori bilong Jason Stuart husat i gat sik ALS, i stap long nius Awake! bilong Janueri 2006, dispela i bin helpim tru Noriko na em i no bel hevi olgeta. Ol dokta na nes long haus sik i tingting, wanem samting i mekim na Noriko i gat gutpela tingting, na em i tokim ol long dispela stori long Awake!, na mipela i tilim ol kopi bilong dispela nius long ol dokta na nes. Pasin bilong meri bilong mi long skulim ol narapela long bilip bilong em i strongim em tru.
Mi na Noriko i bin marit inap 30 yia, tasol insait long 3-pela yia i go pinis, mi pilim tru ol gutpela pasin bilong em, em bipo mi no bin tingim tumas. Mi amamas tru long mi bin maritim em!
[Blok/Ol Piksa long pes 25]
Taim Pikinini i Dai
Stori bilong Fernando na Dilma Freitas, Amerika
“Bikpela bel hevi em dai bilong pikinini i save kamapim em i samting yumi no inap stori gut long en. I no gat narapela bel pen i bikpela olsem dispela.”
PIKININI meri bilong mipela, em mipela i givim nem Precious long em, i dai long Epril 16, 2006. Em i stap laip inap 10-pela de tasol. Taim mi gat bel inap 3-pela mun, ol dokta i kisim save olsem bebi i stap long bel em i gat bikpela sik long lewa bilong em. Taim bilong karim i kam klostu, na ol dokta i tok sapos bebi i stap laip yet taim em i bon, em bai stap inap sampela de tasol. I hatwok tru long mipela i kisim dispela tok. Mipela i gat tripela pikinini i no gat sik. Mipela i hatwok long bilip olsem bebi bilong mipela bai i dai.
Taim Precious i bon, wanpela speselis dokta i tok em i gat wanpela sik (Trisomy 18) em wan wan bebi tasol i save kisim, olsem 1-pela bebi long olgeta 5,000 5,000 bebi. I klia tru olsem em bai stap laip inap liklik taim tasol. Bel bilong mipela i bagarap stret, long wanem, i no gat planti samting mipela inap mekim bilong helpim em. Wanpela samting mipela inap long mekim, em mipela inap i stap wantaim em long dispela sotpela hap taim em i stap. Olsem na mipela i mekim olsem.
Mipela i amamas tru long dispela 10-pela de Precious i stap wantaim mipela. Insait long dispela haptaim, mipela na 3-pela pikinini meri bilong mipela i pas gut wantaim em. Mipela i holim em, toktok long em, holimpasim em, givim kis long em, na kisim planti poto long em. Mipela i toktok long em i luk wankain olsem husat long famili bilong mipela. Speselis dokta husat i bin painimaut sik bilong Precious, em i kam lukim mipela long olgeta de long haus sik. Em i krai wantaim mipela na tok em i sori tru long Precious i sik. Em i droim piksa bilong Precious taim em i toktok wantaim mipela na bai em inap tingim em. Em i givim wanpela kopi bilong dispela piksa long mipela.
Mipela i Witnes Bilong Jehova, na mipela i bilip tru long tok bilong Baibel, olsem God bai kamapim gen wanpela paradais hia long graun, na em i gat bikpela laik long kirapim bek ol man i dai pinis na ol bai kisim laip long graun—ol bebi tu, olsem Precious. (Jop 14:13-15; Jon 5:28, 29) Mipela i wetim dispela taim we mipela bai holimpasim em gen. Taim mipela i harim dispela tok “paradais,” dispela samting mipela i bilip na wet long en i mekim mipela i amamas! Tasol nau, mipela i save olsem God i tingim Precious na em i no pilim pen moa, na dispela i mekim gut bel bilong mipela.—Saveman 9:4, 5, 10.