Wanpela Saveman Bilong Saiens i Stori Long Bilip Bilong Em

Stori long bekgraun bilong yu.

Mi bon long 1963 na mi go bikpela long wanpela viles i stap long hap saut bilong wara Yangtze long provins Jiangsu, long Saina. Dispela ples i stap long hap we i no hat o kol tumas, olsem na ol i kolim dispela ples olsem ples tru bilong planim rais na kisim pis. Taim mi liklik yet, mi save tingting olsem: ‘Bilong wanem graun i kamapim planti gutpela kaikai? Ol kaikai i kamap long laik bilong ol yet? Wanem samting i kamap paslain, kakaruk o kiau bilong en?’ Planti man long Saina i no bilip long God, olsem na ol i skulim mi long evolusen taim mi stap long skul.

Stori long famili bilong yu.

Papamama bilong mi i no bilip long God. Mama bilong mi i wok long fam, na papa i mekim wok olsem wanpela akitek na em i gat wanpela konstraksen kampani. Mi fes bilong 5-pela pikinini man. Tasol tupela brata bilong mi i dai taim ol i liklik yet. Dispela i mekim na mi bel hevi tru, na mi tingting olsem: ‘Bilong wanem ol man i save dai? Bai mi lukim gen ol brata bilong mi?’

Wai na yu stadi long saiens?

Mi stadim ol samting bilong saiens, long wanem, mi gat planti askim long ol samting mi lukim long graun na yunives. Mi ting long rot bilong stadi long saiens mi inap kisim ol bekim bilong ol askim mi gat.

Yu stadim wanem samting long saiens?

Mi mekim wok painimaut long hau ol liklik samting em ol i save wok long paua i ken spit tru wankain olsem spit bilong lait. Mi mekim olsem bilong stadim ol atom. Na tu, mi mekim wok painimaut long rot bilong kamapim strongpela rediesen. Maski ol wok painimaut bilong mi i kamapim bikpela mani, ol dispela wok painimaut i helpim mi long kisim save tu long ol samting i stap long yunives.

Wanem samting i kirapim yu long kisim save long Baibel?

Long 1998, tupela Witnes Bilong Jehova i kam lukim mi long haus. Ol i amamas long bekim ol askim bilong mi long rot bilong Baibel. Meri bilong mi, Huabi, em tu i wanpela saientis, em i tok orait long joinim mipela long dispela stadi. Dispela em fes taim mitupela Huabi i lukim wanpela Baibel, tasol mipela i amamas long ol gutpela tok mipela i harim. Mipela i luksave olsem Baibel i helpim dispela tupela marit Witnes bikos ol i bihainim ol stiatok bilong en. Ol i nogat planti samting na ol i stap amamas. Na tu, tok Baibel i mekim long God i mekim na mi tingting olsem ating i gat man i bin wokim yunives. Mi wanpela saientis, olsem na mi laik save long hau ol samting i kamap. So mi skelim gen ol wok painimaut bilong mi.

Yu skelim gen wanem ol samting?

Pastaim mi luksave olsem ol samting insait long wanpela grup, ol i no inap wok gut sapos i nogat ol narapela samting long sapotim ol. Em wankain tu long graun bilong yumi na yunives. Graun na yunives i stap stret long ples bilong ol na ol i mekim gut wok bilong ol, olsem na mi bilip olsem i gat Krieta husat i bin wokim ol. Na tu, narapela samting mi luksave long en em olsem, graun bilong yumi na yunives inap lukautim na helpim ol samting i stap laip.

Wanem evidens i soim olsem i gat Man i bin wokim ol samting?

Olgeta samting long graun i nidim san lait bilong i stap laip. Olsem, strong bilong san i save kam long graun olsem rediesen. Dispela rediesen i strong tru. Na tu, i gat kain kain rediesen, wanpela bilong ol dispela rediesen em ol i kolim ultraviolet rays. Tingim, atmosfia i save pasim ol rediesen nogut, tasol em i larim gutpela rediesen long i kam long graun bilong helpim ol samting i stap laip. Dispela em narakain samting tru.

Bilong wanem dispela em narakain samting?

Mi kirap nogut taim mi kisim save olsem Baibel i stori long God i bin wokim olgeta samting, na em i bin wokim tu lait. Baibel i tok: “God i tok olsem, ‘Lait i mas kamap.’ Orait lait i kamap.”a Yumi ol man inap lukim liklik hap tasol bilong san lait, tasol yumi save olsem ol samting i gat laip ol i nidim lait. Ol diwai na gras samting i nidim lait bilong wokim kaikai, na tu, i mas i gat lait na bai yumi inap lukim ol samting. Atmosfia i save larim lait rediesen long mak stret bilong en long i kam long graun, olsem na liklik hap san lait tasol i kam long graun. Dispela i soim olsem i gat Man i bin wokim olgeta samting.

Wai na dispela i bikpela samting?

Sampela rediesen i gutpela bilong helpim yumi. Olsem, yumi nidim san lait bilong helpim bodi long wokim vaitamin D. Dispela vaitamin i save strongim ol bun na lukautim bodi long sik kensa na ol narapela sik. Tasol sapos yumi kisim planti tumas rediesen, dispela inap kamapim skin kensa na katarak, em sik bilong ai. Atmosfia i larim liklik hap san lait long i kam long graun na dispela i inap stret long mak bilong en. Olgeta dispela samting i helpim mi long luksave olsem i gat Man i bin wokim graun na bai ol samting i gat laip i ken stap long en.

Isi isi mi na Huabi i luksave olsem i gat Krieta na em i as bilong olgeta tok i stap long Baibel. Long 2005, mitupela i kamap ol Witnes Bilong Jehova na nau mitupela i helpim ol narapela long kisim save long tok bilong Baibel.