Paradais
Stori: Long bipo ol man i tanim tok bilong Ol Skripsa Hibru long tok Grik (Septuagint) na ol i kolim gaden Iden olsem “paradais” (pa·raʹdei·sos). I stret ol i mekim olsem, long wanem, em i wanpela gutpela ples i stap insait long banis. Hap bilong Buk Stat long Baibel i stori long dispela Paradais, na bihain Baibel i kolim dispela tok paradais bilong makim (1) gaden Iden yet, na (2) olgeta hap bilong graun taim em i kamap gutpela ples wankain olsem Iden, na (3) gutpela sindaun bilong spirit em ol wokboi bilong God long graun i kisim, na (4) ol gutpela samting long heven i kirapim yumi long tingim Iden.
“Nupela Testamen” tu i stori long Paradais bai kamap long graun, o “Olpela Testamen” tasol?
Yumi no ken brukim Baibel long tupela hap na ting tok bilong narapela hap i winim bilong narapela. Baibel i no orait long dispela. Long 2 Timoti 3:16, Baibel i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela . . . bilong skulim yumi.” Na Rom 15:4 i tok: “Olgeta tok bipo ol i bin raitim long buk bilong God [paslain long taim bilong ol Kristen], em ol i bin raitim bilong skulim yumi.” Olsem na yumi mas tingim Baibel olgeta bambai yumi ken save gut long bekim bilong dispela askim.
Stat 2:8 i tok: “Bikpela i wokim wanpela gaden [“paradais,” Dy; pa·raʹdei·son, LXX) i stap long Iden, long hap bilong sankamap. Na long dispela gaden God i putim dispela man [Adam] em i bin wokim.” I gat ol kain kain diwai na animal i stap long dispela ples. Jehova i givim blesing long namba wan man na meri na em i tok: “Yupela i mas kamap planti na i go sindaun long olgeta hap bilong graun na bosim olgeta samting i stap long en.” (Stt 1:28) God i laik bai olgeta hap bilong graun i kamap gutpela ples paradais, na ol man i pilim gutpela pasin bilong em na bihainim ol lo bilong em ol i ken i stap long en. Em bai inapim dispela laik bilong em bilong pastaim. (Ais 45:18; 55:10, 11) Olsem na Jisas i tok: “Ol man i save daunim nem bilong ol yet, em ol i ken amamas. Bai God i givim olgeta graun long ol.” Na em i lainim ol disaipel long beten olsem: “Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Mt 5:5; 6:9, 10) Na Efesus 1:9-11 i tok, God i laik “bungim olgeta samting long Krais, ol samting bilong heven na bilong graun tu.” Hibru 2:5 i stori long “nupela graun” bai kamap. Na Kamapim Tok Hait 5:10 i stori long lain bilong Krais long heven, ol bai “i stap king na bosim ol manmeri bilong graun.” Kamapim Tok Hait 21:1-5 na Re 22:1, 2 i stori long ol gutpela pasin bai stap long “nupela graun,” na dispela i kirapim yumi long tingim Paradais bilong pastaim long Iden, i gat diwai bilong givim laip.—Stt 2:9.
Na taim Jisas i stori long Paradais em bai kamap long graun, Jisas i kolim hap tok Grik (pa·raʹdei·sos) yumi tanim olsem “paradais.” Man nogut ol i nilim long diwai klostu long Jisas na em i bilip olsem Jisas bai kamap king, Jisas i tokim em: “Mi tok tru long yu nau, bai yu stap wantaim mi long Paradais.”—Lu 23:43, NW; lukim Nupela Testamen na Ol Sam bilong 1978.
Olsem wanem yumi ken save wanem Paradais Jisas i tok long en long Luk 23:43?
Yu ting em i tok long wanpela hap bilong ples bilong ol man i dai pinis [Hades], em ‘tewel bilong ol stretpela man’ i stap long en inap liklik taim?
Wanem as bilong dispela tingting? Wanpela buk i tok: “Ol Grik i tok ol man i gat tewel i no inap i dai, na taim dispela tok i kam insait [long lotu Kristen], nau ol i ting, paradais em i ples ol stretpela man i stap long en taim ol i dai na wet long go long heven.” (The New International Dictionary of New Testament Theology, 1976, Vol. 2, p. 761) Baibel i no as bilong dispela tingting, tasol yu ting planti Juda i bihainim long taim Jisas i stap long graun? Wanpela dikseneri bilong Baibel i tok, ating nogat.—Dictionary of the Bible, bilong Hastings, Vol. 3, p. 669, 670.
Na sapos tru planti Juda i bilip olsem, yu ting tok promis Jisas i mekim long man nogut i strongim dispela bilip bilong ol? Jisas i bin krosim ol Juda bilong lain Farisi na ol saveman bilong lo, long wanem, ol i lainim ol man long tok bilong ol tumbuna na dispela i pait wantaim tok bilong Baibel.—Mt 15:3-9; lukim tu bikpela het-tok “Tewel.”
Long Aposel 2:30, 31 Pita i tok, taim Jisas i dai em i go long ples bilong ol man i dai pinis (Hades). (Pita i kamapim tok bilong Song 16:10 na long tok Hibru, “Hades” em “Siol”.) Tasol i no gat wanpela taim Baibel i tok, ples bilong ol man i dai pinis (Siol/Hades) o wanpela hap bilong en em i gutpela ples paradais em man i ken amamas long en. Ples bilong ol man i dai pinis (Siol/Hades) em matmat tasol, na Baibel i tok, ol man i go long en “ol i no inap save long wanpela samting.”—Sav 9:5, 10.
Yu ting Paradais long Luk 23:43 em heven o wanpela hap bilong heven?
Baibel i no orait long dispela tingting olsem Jisas na dispela man nogut i bin go long heven long de stret em Jisas i mekim dispela tok promis. Jisas i bin tok, ol bai kilim em i dai na long de namba 3 bai em i kirap bek. (Lu 9:22) Insait long dispela 3-pela de em i no i go antap long heven, long wanem, taim em i kirap bek em i tokim Maria bilong Makdala: “Mi no i go antap yet long Papa bilong mi.” (Jo 20:17) Inap 40 de bihain long taim em i kirap bek, em i go antap long heven na ol disaipel i lukim em i lusim graun i go na ol i no lukim em moa.—Ap 1:3, 6-11.
Dispela man nogut i no inap i go long heven, long wanem, em i no bin “kamap nupela gen”—em i no baptais long wara na spirit holi i no bin mekim em i kamap pikinini bilong God. Em i dai pinis na 50 de bihain, God i kapsaitim spirit holi long ol disaipel bilong Jisas. (Jo 3:3, 5; Ap 2:1-4) Long de Jisas i dai, em i tok promis long givim kingdom bilong heven long ol man i bin stap gut long em long taim traim i painim em. Man nogut i no bin mekim olsem, na em i no insait long dispela lain.—Lu 22:28-30.
Olsem wanem yumi ken save dispela Paradais em bilong graun?
Ol Skripsa Hibru i no givim tingting long ol Juda olsem ol bai kisim laip long heven. Ol tok bilong Ol Skripsa Hibru i makim olsem Paradais bai kamap bek long graun. Daniel 7:13, 14 i tok profet olsem: Taim God i mekim Krais “i kamap king na i givim em strong na biknem,” orait “olgeta manmeri bilong olgeta kantri na olgeta lain na olgeta tok ples bai i stap aninit long en.” Ol dispela man i stap aninit long Kingdom, ol bai stap hia long graun. Tok promis Jisas i mekim long man nogut i makim olsem long dispela taim bai Jisas i tingim em.
Tasol olsem wanem bai Jisas i stap wantaim dispela man nogut? Jisas bai kirapim bek em, na mekim ol samting bilong lukautim em long skin, na givim rot long em bilong lainim na bihainim ol lo bilong Jehova bambai em inap kisim laip i stap oltaim. (Jo 5:28, 29) Jisas i lukim olsem dispela man nogut i tanim bel na daun long Jisas, na long dispela as em inap kirapim bek em wantaim ol planti milion man moa, na bai ol i stap laip long graun na ol i gat rot bilong i stap oltaim long Paradais.
Wanem taim dispela man nogut bai stap long Paradais?
Wanem hap ol i putim mak olsem koma long en bilong brukim tok bilong Luk 23:43, dispela inap kamapim klia o paulim tok bilong dispela ves. Long ol olpela rait bilong Baibel long tok Grik bilong pastaim i no gat dispela kain mak. (Buk The Encyclopedia Americana, 1956, Vol. 23, p. 16) Ol i kirap long putim kain mak olsem long yia 850 samting bihain long Krais. Orait, sapos yumi putim mak, yumi mas putim we? Yumi mas raitim Luk 23:43 olsem: “Mi tok tru long yu, nau bai yu stap wantaim mi long [Paradais],” o olsem: “Mi tok tru long yu nau, bai yu stap wantaim mi long Paradais”? (NW) Ol tok bilong Krais na ol narapela tok bilong Baibel inap helpim yumi long save yumi mas putim we dispela mak olsem koma.
I no Baibel New World Translation tasol i putim dispela mak bihain long tok “nau” long Luk 23:43. (Lukim The Emphasised Bible bilong Rotherham.) Na wanpela man bilong tanim Baibel long tok Jeman (L. Reinhardt) i stori long Luk 23:43 olsem: “Mak ol [planti man bilong tanim tok long nau] i putim long dispela ves em i no stret; em i mekim dispela tok i kamap narapela kain olgeta—i no wankain liklik long tingting bilong Krais na dispela man nogut. . . . [Krais] i no ting paradais em i wanpela hap bilong ples bilong ol man i dai pinis. Em i tok long paradais bai kamap bek long graun.”
Wanem taim Jisas bai “kamap king” na inapim laik bilong Papa na mekim graun i kamap paradais? Kamapim Tok Hait, em Jon i raitim inap 63 yia bihain long taim Luk i raitim tok bilong Luk 23:42, 43, i makim olsem dispela samting i mas kamap bihain. (Lukim “Ol Yia Ol Samting i Bin Kamap,” pes 341-343, na bikpela het-tok “Taim Bilong Las De.”)