Sapta 36
Wanpela Kepten Bilong Ami Em i Gat Strongpela Bilip
JISAS i autim tok antap long maunten na em i gat wanpela yia na 6-pela mun moa bilong inapim wok bilong em long graun.
Jisas i lusim maunten i go daun na em i go long Kaperneam na sampela hetman bilong lain Juda i singautim em long mekim wanpela samting. Wanpela kepten bilong ami bilong Rom i bin salim ol i go long em. Kepten i no bilong lain Juda.
Dispela kepten i gat wanpela wokboi em i laikim tumas, tasol sik i painim em na em i laik i dai. Kepten i laik bai Jisas i ken oraitim dispela wokboi. Olsem na ol dispela Juda i strong long Jisas i mas helpim dispela kepten long hevi bilong em na ol i tok: “Dispela man em i gutpela man, inap long yu ken helpim em. Em i save laikim yumi Juda. Em yet i bin wokim haus lotu bilong mipela.”
Wantu tasol Jisas i go wantaim ol. Ol i kamap klostu pinis long haus na kepten i salim sampela pren bilong em i kam long Jisas na givim tok long em olsem: “Bikpela, maski yu hatwok tumas. Mi no gutpela man inap long yu kam insait long haus bilong mi. Olsem na mi ting mi no gutpela man inap long mi yet mi kam lukim yu.”
Kepten i mekim pasin daun tru, maski em i bikpela man i bosim wanpela lain! Na tu, em i tingim Jisas, em i wanpela Juda na ol Juda i no save bung wantaim ol man bilong ol narapela lain. Olsem Pita i tok: “I tambu tru long mipela Juda i stap wantaim ol man bilong ol arapela lain.”
Ating kepten ya em i no laik bai Jisas i brukim dispela tambu na kisim hevi long en. Olsem na em i salim ol pren bilong em i kam tokim Jisas: “Yu mekim tok tasol, na wokboi bilong mi bai i orait gen. Mi . . . gat ol soldia i stap aninit long mi. Na sapos mi tokim wanpela, ‘Yu go,’ orait em i save go. Na sapos mi tokim narapela, ‘Yu kam,’ orait em i save kam.”
Jisas i kirap nogut long dispela tok na em i tok: “Mi no bin lukim wanpela man namel long ol lain Israel i gat kain bilip olsem bilong dispela man.” Jisas i oraitim pinis wokboi bilong kepten, na nau em i stori olsem bihain bai sampela man bilong ol narapela lain i kisim ol blesing, em ol Juda i no bilip ol i sakim.
Jisas i tok: “Planti manmeri bai i lusim ol kantri i stap long hap sankamap na hap san i go daun, na ol bai i kam sindaun long kaikai wantaim Abraham na Aisak na Jekop insait long kingdom . . . Tasol ol manmeri pastaim God i bin makim bilong i stap long kingdom bilong en, God bai i rausim ol i go long ples tudak. Na long dispela hap ol bai i krai nogut na skrapim tit bilong ol.”
‘Ol manmeri pastaim God i bin makim ol bilong i stap long kingdom bilong em, na God i rausim ol i go long ples tudak,’ em ol Juda bilong skin. God i bin opim rot bilong ol i ken kisim wok king wantaim Krais, tasol ol i sakim dispela blesing. Abraham na Aisak na Jekop i olsem piksa na i makim Kingdom, em God i kamapim. Olsem na Jisas i tok bai sampela man bilong ol narapela lain ol tu inap kisim wok king long heven na bai ol i “sindaun . . . insait long kingdom bilong heven.” Luk 7:1-10; Matyu 8:5-13; Aposel 10:28.
▪ Bilong wanem sampela Juda i strong long Jisas i mas helpim wanpela kepten em bilong narapela lain?
▪ Ating i gat wanem as na kepten i no singautim Jisas i go insait long haus bilong em?
▪ Wanem insait bilong ol laspela tok Jisas i mekim?