Sapta 75

As Bilong Amamas

TAIM Jisas i autim tok long Galili, em i wokim sampela mirakel, na nau em i wokim gen ol kain mirakel olsem long Judia. Wanpela man i gat spirit nogut i stap long em, olsem na em i mauspas. Jisas i rausim dispela spirit nogut na ol man i kirap nogut. Tasol sampela i mekim wankain tok olsem sampela long Galili i bin mekim. Ol i tok: “Em i save rausim ol spirit nogut long strong bilong Belsebul, em hetman bilong ol spirit nogut.” Na sampela i askim em long wokim wanpela mak bilong soim ol olsem em i husat tru.

Jisas i save long tingting bilong ol, olsem na em i givim wankain tok long ol olsem em i bin givim long ol manmeri long Galili. Em i tok, sapos wanpela kantri i bruk tupela lain, dispela kantri bai bagarap. Na em i askim ol: “Sapos ol lain bilong Satan i bruk tupela lain na ol i birua long ol yet, orait olsem wanem bai em i gat strong bilong bosim ol samting?” Na em i tok, ol i mas lukaut, long wanem ‘sapos God yet i givim strong long em na em i rausim ol spirit nogut, orait kingdom bilong God i kam pinis long ol na ol i no pilim.’

Ol man i lukim mirakel bilong Jisas, ol i mas kisim wankain tingting olsem ol man i bin kisim taim ol i lukim mirakel Moses i bin wokim planti handet yia bipo, em ol i bin tok: “God yet i mekim dispela samting.” Na God yet i bin raitim Tenpela Lo long tupela hap ston. Na nau long strong bilong God yet, em spirit holi bilong em, Jisas i rausim dispela spirit nogut long man. Jisas em i King bilong Kingdom na em i stap namel long ol, olsem na tru tumas, Kingdom bilong God i kam pinis long ol.

Nau Jisas i mekim wanpela tok piksa na bai ol i ken save, taim em i rausim ol spirit nogut, dispela i makim olsem strong bilong em i winim strong bilong Satan. Jisas i tok piksa long wanpela strongpela man i kam na daunim man i holim bainat na was long haus bilong em. Na em i kolim gen wanpela tok piksa em i bin mekim long Galili. Em i tok, sapos spirit nogut i lusim wanpela man na dispela man i no pulimapim gutpela tingting long bel, orait dispela spirit bai kam bek wantaim 7-pela moa na bai dispela man i stap nogut moa yet.

Ol manmeri i sanap harim dispela tok bilong Jisas, na wanpela meri namel long ol i singaut strong, olsem: “Dispela meri i bin karim yu na i givim susu long yu, em i ken amamas.” Olgeta meri bilong lain Juda ol i laik kamap mama bilong wanpela profet, na ol i gat bikpela laik moa long kamap mama bilong dispela man God i bin tok promis long salim i kam. Olsem na dispela meri i tok, Maria inap amamas moa yet, long wanem em i mama bilong Jisas.

Tasol Jisas i tokim meri: “Mobeta yumi tok olsem, ol man i harim tok bilong God na i bihainim, em ol i ken amamas.” Jisas i no bin tokim ol man long litimapim nem bilong mama bilong em Maria. Em i tok, bilong man i ken amamas tru, em i mas mekim wok bilong God; famili o wok bilong skin i no as bilong amamas tru.

Na Jisas i mekim wankain pasin olsem em i bin mekim long Galili. Em i krosim ol manmeri, long wanem ol i laik lukim wanpela mak. Na em i tokim ol, ol bai lukim mak bilong profet Jona tasol. Jona i kamap olsem mak, long wanem em i stap 3-pela de long bel bilong pis, na em i bin strong long autim tok long ol manmeri bilong Ninive na ol i tanim bel. Tasol Jisas i tok: “I gat wanpela man i stap hia, em i winim tru Jona.” Na em i tok, kwin bilong hap bilong saut em i bin kirap nogut long bikpela save bilong Solomon, tasol ‘i gat wanpela man i stap namel long ol, em i winim tru Solomon.’

Jisas i tokim ol, taim wanpela man i laitim lam, em i no save haitim aninit long baket samting. Nogat. Em i save putim long ples klia na ol man inap lukim dispela lait. Ating Jisas i laik tok, taim em i wokim mirakel long ai bilong ol dispela bikhetman, dispela mirakel i olsem lam i hait aninit long baket na ol i no lukim lait bilong en. Ai bilong ol i no “gutpela”​—ol i no pilim as bilong ol mirakel Jisas i wokim.

Nau tasol Jisas i bin rausim spirit nogut i stap long wanpela mauspas na nau mauspas inap toktok. Dispela samting i mas kirapim ol man, em ‘ai bilong ol i gutpela,’ na bai ol i litimapim nem bilong God na autim tok bilong Kingdom! Tasol ol dispela bikhetman i no mekim olsem. Olsem na Jisas i tok: “Yu mas was gut. Nogut dispela lait i stap insait long yu em i kamap tudak. Sapos olgeta hap bilong bodi bilong yu i gat lait, na i no gat wanpela hap bilong en i tudak, orait bodi bilong yu bai i lait olgeta, olsem lait bilong lam i sutim yu.” Luk 11:​14-36; Kisim Bek 8:​18, 19; 31:18; Matyu 12:​22, 28.

▪ Jisas i oraitim wanpela man, na wanem samting i kamap?

▪ Olsem wanem Kingdom bilong God i kam pinis long ol Juda?

▪ Wanem as bilong amamas tru?

▪ Olsem wanem ai bilong man i ken gutpela?