Wara i Bagarapim Wanpela Lain Man—Em Bai Kamap Gen?

OLSEM WANEM? Yu bin harim sampela man i stori long graun bai pinis?— Long nau planti man i save stori long dispela samting. Sampela man i ting graun bai bagarap long rot bilong wanpela pait em ol man bai yusim ol bom nuklia long en. Yu ting God bai larim ol man i bagarapim gutpela graun bilong yumi?—

Olsem yumi bin lainim pinis, Baibel i mekim sampela tok long graun bai pinis. Baibel i tok: “Dispela graun bai i pinis.” (1 Jon 2:17) Yu ting dispela tok olsem graun bai pinis i makim olsem graun tru tru bai pinis?— Nogat, Baibel i tok God i bin wokim graun “bilong olgeta samting i ken i stap long en,” yes, bilong ol man i ken stap long en na amamas long en. (Aisaia 45:18) Song 37:29 i tok: “Ol stretpela man bai i kisim graun God i givim ol, na bai ol i stap oltaim long en.” Long dispela as na Baibel i tok tu olsem dispela graun bai stap oltaim.—Song 104:5; Saveman 1:4.

Olsem na sapos dispela tok i no makim olsem graun tru tru bai i pinis, orait em i makim wanem samting?— Yumi inap kisim bekim bilong dispela askim sapos yumi skelim gut samting i bin kamap long taim bilong Noa. Baibel i tok: “Bikpela tait i karamapim dispela graun, na graun i bagarap olgeta.”—2 Pita 3:6.

Olsem wanem? Sampela man i bin abrusim bagarap long Bikpela Tait long taim bilong Noa?— Baibel i tok “Noa em i man bilong tokaut long stretpela pasin. Na God i lukautim em wantaim 7-pela manmeri, na ol i stap gut.”—2 Pita 2:5.

Olsem na wanem graun i bin bagarap? Yu ting em i makim graun tru tru, o ol man nogut?— Baibel i tok em ol ‘manmeri i bin givim baksait long God.’ Na lukim, Baibel i kolim Noa olsem “man bilong tokaut,” olsem autim tok. Yu ting em i bin autim tok long wanem samting?— Noa i toksave long ol man olsem “graun” o ol manmeri bilong dispela taim ol bai pinis.

Taim Jisas i toktok long Bikpela Tait, em i tokim ol disaipel long ol samting ol man i bin mekim paslain long pinis i kamap. Em i tokim ol olsem: “Taim bikpela tait i no kamap yet, ol i wok long kaikai na dring, na ol man i maritim ol meri, i go inap long taim Noa i go insait long sip. Ol i no save long dispela samting bai i kamap long ol, na ol i stap olsem tasol i go inap long taim bikpela tait i kamap na i pinisim olgeta dispela manmeri.” Jisas i tok ol man bai mekim wankain pasin paslain long ol man nogut bilong nau i pinis.—Matyu 24:37-39.

Tok bilong Jisas i soim olsem yumi inap lainim sampela samting long pasin ol man i bin mekim paslain long Bikpela Tait i kamap. Long Sapta 10 bilong dispela buk, yu inap tingim yet pasin ol i bin mekim?— Sampela ol i bikhetman na ol i pait na bagarapim ol arapela. Tasol planti ol i no putim yau taim God i salim Noa i go autim tok long ol.

Taim i kamap na Jehova i tokim Noa olsem Em bai bagarapim ol man nogut long rot bilong tait wara. Wara bai karamapim graun olgeta, na ol maunten tu. Jehova i tokim Noa long wokim wanpela bikpela sip. Em i olsem wanpela bikpela, longpela bokis, olsem yu ken lukim sapos yu tanim i go bek long piksa long pes 238.

God i tokim Noa long wokim bikpela sip na bai em na famili bilong em na planti animal inap i stap gut insait long en. Noa na famili bilong em i wok strong tru. Ol i katim ol bikpela diwai, na kirap wokim sip long timba ol i kisim. Planti yia i lus long mekim dispela wok, long wanem, sip i bikpela tru.

Yu inap tingim wanem narapela wok Noa i bin mekim insait long ol dispela yia em i bin wokim sip?— Em i autim tok, em i toksave long ol man long Bikpela Tait bai kamap. Olsem wanem? Sampela bilong ol i harim tok? I no gat wanpela, famili bilong Noa tasol i harim. Ol arapela man i bisi tumas long mekim ol narapela samting. Yu inap tingim ol samting Jisas i tok ol i bin mekim?— Ol i bisi long kaikai na dring na marit. Ol i no ting ol i man nogut, na ol i no givim haptaim bilong harim tok bilong Noa. Yumi ken stori long samting i bin painim ol.

Taim Noa na famili bilong em i go insait pinis long sip, Jehova i pasim dua. Ol man i stap ausait ol i tingting yet olsem Bikpela Tait i no inap kamap. Tasol wantu tasol, bikpela ren i kirap pundaun! Em i no wanpela ren nating, nogat. Em i traipela mama ren! I no longtaim na ol bikpela wara i kamap na i mekim bikpela nois. Wara i daunim ol bikpela diwai na karim ol bikpela ston i go olsem ol i liklik ston nating. Na olsem wanem long ol man i stap ausait long sip?— Jisas i tok: “Bikpela tait i kamap na i pinisim olgeta dispela manmeri.” Olgeta man i stap ausait long sip ol i dai. Bilong wanem?— Olsem Jisas i tok, “ol i stap olsem tasol.” Ol i no harim tok!—Matyu 24:39; Stat 6:5-7.

Orait, tingim, Jisas i tok ol samting i bin kamap long ol dispela manmeri i mas lainim yumi long nau. Yumi inap lainim wanem samting?— God i bin bagarapim ol man, long wanem, ol i man nogut, na tu, planti ol i bisi tumas na ol i no givim haptaim bilong kisim save long God na ol samting em bai mekim. Yumi mas was gut, nogut yumi mekim wankain pasin olsem ol i bin mekim, a?—

Yu ting God bai bagarapim gen ol man long rot bilong tait wara?— Nogat, God i bin tok promis olsem em bai no mekim olsem. Em i tok: “Mi putim renbo bilong mi long klaut olsem mak.” Jehova i tok renbo em mak bilong soim olsem “tait i no ken bagarapim gen olgeta samting i gat laip.”—Stat 9:11-17.

Olsem na yumi ken bilip tru olsem God i no inap bagarapim gen ol manmeri long rot bilong tait wara. Tasol olsem yumi bin skelim pinis, Baibel i tokaut long bagarap bai painim ol man. Taim God i bagarapim ol man bilong dispela graun, em bai lukautim husat?— Yu ting em bai lukautim ol man husat i tingim tumas ol narapela samting na ol i no laik kisim save long God? O ol man husat i no gat taim bilong stadi long Baibel? Yu ting wanem?—

Yumi laik insait long dispela lain em God bai lukautim ol, a?— Em bai gutpela tru sapos famili bilong yumi i olsem famili bilong Noa na bai God i ken lukautim yumi olgeta, a?— Bilong yumi ken abrusim bagarap taim God i bagarapim ol man nogut, yumi mas kliagut long olsem wanem God bai bagarapim ol na kamapim nupela taim i gat stretpela pasin tasol long en. Nau yumi ken stori long olsem wanem em bai mekim dispela samting.

Baibel i tokim yumi long dispela samting long Daniel sapta 2, ves 44. Dispela skripsa i stori long samting i kamap nau long taim bilong yumi, em i tok: “Taim ol dispela king i stap yet God bai i kirapim wanpela kingdom [o, gavman] na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”

Yu kliagut long dispela samting?— Baibel i tok gavman bilong God bai bagarapim olgeta gavman long graun. Bilong wanem?— Long wanem, ol i no bihainim tok bilong Man em God i bin makim em i kamap King. Dispela man em husat?— Yes, em Jisas Krais!

God Jehova i gat rait long makim wanem kain gavman bai bosim graun, na em i bin makim Pikinini bilong em, Jisas, long i stap King. Klostu nau dispela King em God i bin makim, Jisas Krais, em bai go pas long bagarapim olgeta gavman bilong dispela graun. Long Kamapim Tok Hait sapta 19, ves 11 i go ves 16, Baibel i stori long dispela samting, olsem piksa hia i soim. Baibel i kolim dispela pait bilong God long bagarapim olgeta gavman bilong graun olsem Armagedon.

God i tok Kingdom bilong em bai bagarapim ol gavman bilong ol man. Yu ting em i tokim yumi long mekim dispela wok?— Nogat, Baibel i kolim Armagedon olsem ‘pait bilong dispela bikpela de bilong God i Gat Olgeta Strong.’ (KTH 16:14, 16) Yes, Armagedon em pait bilong God, na em i yusim Jisas Krais long go pas long ol ami bilong heven long mekim dispela pait. Olsem wanem? Dispela pait bilong Armagedon em i klostu pinis? Yumi ken stori long olsem wanem yumi inap save long dispela.