Amamas Long Sinman i Tanim Bel

Long narapela narapela taim long wok autim tok bilong Jisas, em i bin kamapim klia olsem em i bikpela samting long kisim pasin daun. (Luk 14:8-11) Em i wok strong long painim ol man na meri em long pasin daun ol i laik mekim wok bilong God. I kam inap long nau, sampela bilong ol i stap yet olsem man bilong mekim sin.

Ol Farisi na ol saveman bilong Lo i lukim olsem ol dispela kain manmeri i kam long Jisas na harim tok bilong em. Em ol manmeri we ol i tingim ol olsem samting nating. Na ol i komplein olsem: “Dispela man i save amamas long ol sinman i kam long em na em i save kaikai wantaim ol.” (Luk 15:2) Ol Farisi na ol saveman bilong lo i ting ol i winim ol narapela na ol i mekim pasin long ol manmeri nating olsem ol i pipia aninit long lek bilong ol. Bilong kamapim klia olsem ol i heitim ol dispela kain man, ol bikman i yusim wanpela tok Hibru, ‛am ha·’aʹrets, olsem “ol manmeri bilong graun,” bilong makim ol dispela manmeri.

Tasol Jisas i no mekim olsem, em i givim biknem long olgeta man, mekim gutpela pasin, na sori long ol. Olsem na planti bilong ol man nating, na sampela em ol i gat nem long mekim ol pasin nogut, ol i laik harim tok bilong Jisas. Tasol yu ting Jisas i pilim olsem wanem taim ol i kros long em i helpim ol man nating? Na em i mekim wanem?

Jisas i kamapim klia bekim bilong dispela askim long wanpela gutpela tok piksa, wankain olsem tok piksa em i bin mekim long Kaperneam. (Matyu 18:12-14) Jisas i tok ol Farisi i ting ol i stretpela man na ol i stap pinis insait long banis sipsip bilong God. Na ol man nating i olsem ol sipsip i lus pinis na God i no inap kisim bek ol. Jisas i tok:

“Sapos wanpela bilong yupela i gat 100 sipsip na wanpela i lus, orait husat bilong yupela bai i no lusim 99 sipsip i stap long ples nating na em i go painim dispela sipsip i lus inap long em i lukim em? Na taim em i painim pinis, em i putim antap long sol bilong en na em i amamas. Na taim em i kamap long haus, em i singautim ol pren na ol neiba bilong en na tokim ol, ‘Yupela amamas wantaim mi, mi painim pinis dispela sipsip i lus.’”—Luk 15:4-6.

Jisas i kamapim as bilong dispela tok piksa olsem: “Mi tokim yupela, amamas i kamap long heven taim wanpela sinman i tanim bel, dispela i winim amamas ol lain long heven i gat long 99 stretpela man em ol i no gat wok long tanim bel.”—Luk 15:7.

Ating tok bilong Jisas long tanim bel i sutim bel bilong ol Farisi. Ol i ting ol i stretpela man na i no gat wok long ol i mas tanim bel. Inap olsem 2-pela yia paslain, sampela Farisi i bin sutim tok long Jisas bikos em i kaikai wantaim ol takisman na ol sinman, na em i tokim ol: “Mi no kam bilong singautim ol stretpela man, nogat, mi kam bilong singautim ol sinman.” (Mak 2:15-17) Ol Farisi i ting ol i stretpela man na ol i no pilim olsem ol i mas tanim bel, olsem na dispela i no kamapim amamas long heven. Tasol taim wanpela man bilong mekim sin i tanim bel tru, bikpela amamas i kamap long heven.

Bilong strongim poin, Jisas i mekim narapela tok piksa long samting i kamap long haus. Em i tok: “Sapos wanpela meri i gat 10-pela koin drakma na wanpela i lus, yupela i ting bai em i no laitim lam na brumim haus na painim painim i go inap long em i kisim, a? Taim em i painim pinis dispela koin, em bai singautim ol meri em ol i pren bilong en na ol neiba na tokim ol, ‘Yupela amamas wantaim mi, mi painim pinis dispela koin drakma i lus.’”—Luk 15:8, 9.

Jisas i kamapim as bilong dispela tok piksa na dispela i wankain long tok piksa bilong sipsip i lus. Nau em i tok: “Mi tokim yupela, ol ensel bilong God i save amamas olsem long wanpela sinman i tanim bel.”—Luk 15:10.

Tingim, ol ensel bilong God i save amamas tru taim ol i lukim ol sinman i tanim bel! Na dispela i bikpela samting, long wanem, taim sinman i tanim bel na em i insait long Kingdom Bilong God long heven, em bai kisim wok i gat bikpela namba tru winim bilong ol ensel yet! (1 Korin 6:2, 3) Tasol ol ensel i no jeles long dispela. Orait, yumi mas i gat wanem tingting taim wanpela sinman i tanim bel tru na kam bek long God?