I Stap na Wok Bilong Jisas

Gutpela Man Tru Bilong i Stap King

TAIM Jisas i givim kaikai long planti tausen manmeri, ol i kirap nogut. Ol i tok: “Tru tumas, em i dispela profet God i bin tok long salim i kam long graun.” Ol i ting Jisas em dispela profet i winim Moses, na ol i ting em i gutpela man tru bilong i stap king. Olsem na ol i tingting long makim em i kamap king bilong ol.

Jisas i save long dispela, olsem na kwiktaim em i lusim dispela ples. Em i salim ol manmeri i go, na em i hariapim ol disaipel na ol i kalap long wanpela bot na i go bek long Kaperneam. Nau em wanpela tasol i go antap long maunten bambai em i ken beten.

Klostu tulait na strongpela win i kamap. Jisas i stap antap long maunten na em i lukim win i mekim bikpela si i kirap. Mun i lait bikpela, na Jisas inap lukim win i sakim bot na ol disaipel i hatwok long pul.

Olsem na em i lusim maunten i kam daun na em i wokabaut antap long wara na i go long ol. Taim Jisas i kamap long ol, ol i stap longwe liklik long nambis. Tasol i olsem em i laik abrusim ol i go. Taim ol disaipel i lukim em, ol i singaut nogut, na ol i tok: “Em wanpela masalai.”

Tasol Jisas i mekim gut bel bilong ol, na em i tok: “Em mi tasol i kam. Yupela i no ken pret.”

Tasol Pita i tok: “Bikpela, sapos em yu tasol, orait yu tokim mi na mi ken wokabaut antap long wara na mi kam long yu.”

Jisas i tok: “Yu kam.”

Orait Pita i lusim bot na i wokabaut antap long wara na i go long Jisas. Tasol win i strong tumas na em i pret, na em i wok long i go daun insait long wara, na em i singaut: “Bikpela, helpim mi.”

Kwiktaim Jisas i holim em. Na Jisas i tokim em: “Yu gat liklik bilip tasol. Bilong wanem yu gat tupela tingting?”

Pita na Jisas i kalap long bot, na bihain win i dai, na ol disaipel i kirap nogut long dispela. Long wanem ol i no pilim mirakel Jisas i bin wokim sampela aua bipo, taim em i tilim 5-pela bret na tupela liklik pis long planti tausen manmeri. Olsem na nau, taim ol i lukim em i wokabaut antap long wara, na win i harim tok bilong em na i dai, ol i kirap nogut long dispela na ol i brukim skru long Jisas, na ol i tok: “Tru tumas, yu Pikinini Bilong God.”

I no longtaim na ol i kamap long hap bilong Genesaret, em wanpela naispela ples daun klostu long Kaperneam, na ol i tromoi anka. Tasol taim ol i lusim bot, ol manmeri i luksave long Jisas, na ol i go nabaut bilong painim ol sikman, na ol i bringim ol i kam long Jisas. Ol i slipim ol sikman long bet na karim ol i kam, na taim ol sikman i putim han bilong ol long arere bilong klos bilong Jisas, sik bilong ol i pinis.

Orait dispela bikpela lain i bin lukim Jisas i givim kaikai long planti tausen manmeri, ol i lukim olsem Jisas i bin lusim dispela ples. Olsem na taim sampela bot bilong Taiberias i kam klostu, ol i kalap long ol dispela bot na i go long hap bilong Kaperneam bilong painim Jisas. Taim ol i painim em pinis, ol i askim em, olsem: “Tisa, yu kam hia long wanem taim?” Jisas i krosim ol, na bihain bai yumi stori long dispela. Jon 6:​14-25; Matyu 14:​22-36; Mak 6:​45-56.

◆ Jisas i givim kaikai long planti tausen manmeri, na nau ol i laik mekim wanem long em?

◆ Jisas i stap long maunten na em i lukim wanem samting? Nau em i mekim wanem?

◆ Bilong wanem ol disaipel i no ken kirap nogut long ol samting Jisas i mekim?

◆ Taim ol i sua pinis, wanem samting i kamap?

[Piksa i karamapim pes olgeta long pes 9]