Wanpela Tokaut
Mipela ol Witnes Bilong Jehova, em bihain long yia 1914 mipela stap long “de bilong Bikpela” na long taim bilong kot bilong God, mipela amamas long wok aninit long King Krais Jisas na mekim wok i winim olgeta narapela wok, em wok bilong Nambawan Bikpela King Jehova. (Revelesen 1:10) Mipela WITNES BILONG JEHOVA na mipela laik tokaut olsem:
(1) MIPELA NOLAIK TRU long pasin Bikpela Babilon i bin mekim na ol misin ol i kolim Kristen i bin mekim moa yet, em ol i bin semim nem bilong God Jehova, em wanpela tasol em i God tru. Tasol mipela, MIPELA MEKIM TOK TRU olsem i stap long Revelesen 4:11: “[Jehova], yu God bilong mipela. Yu inap tru long olgeta man i ken amamas long yu, na litimapim nem bilong yu, na i stap aninit long strong bilong yu.”
(2) MIPELA NOLAIK TRU long pasin bilong ol misin ol i kolim Kristen, em ol i bihainim ol tok giaman bilong Babilon na ol i bilip long god triwan, na ol i ting yumi gat tewel, na ol man nogut bai kisim pen oltaim long bikpaia, na ol i bilip long klinpaia, na ol i save lotuim ol piksa, olsem piksa bilong Maria na kruse samting. Mipela bihainim tok bilong Revelesen 22:18, 19, na MIPELA STRONG long bihainim olgeta tok bilong Baibel, em Tok Bilong God.
(3) MIPELA NOLAIK TRU long ol tingting na pasin i birua long God, em planti man ol i kolim Kristen ol i bihainim, em ol i ting yumi bin kamap nating long rot bilong ol animal, na ol i save kisim blut long haus sik, na rausim bel, na giaman, na mangal. Long olgeta wokabaut bilong mipela na long lotu bilong mipela BAI MIPELA LITIMAPIM NEM bilong Man bilong wokim yumi, em God Jehova, em God I Gat Olgeta Strong, na pasin bilong em “i stret na i tru olgeta,” olsem Revelesen 15:3 i tok.
(4) MIPELA NOLAIK TRU long pasin bikhet bilong ol misin ol i kolim Kristen, em ol i no bihainim ol tok Jisas i bin givim long ol 7-pela kongrigesen long Revelesen sapta 2 na 3, olsem na ol i bruk bruk na kamapim kain kain lotu, na ol i save lotuim ol god giaman, na mekim pasin pamuk, na bihainim pasin olsem bilong Jesebel, na givim hap bel tasol long God, na ol i no was i stap. Tasol mipela yet, MIPELA BAI HARIM NA BIHAINIM ol tok “Holi Spirit i autim long ol [kongrigesen].”
(5) MIPELA NOLAIK TRU long pasin sem na pasin bilong orait long kain kain pasin nogut em ol misin ol i kolim Kristen na ol pris pasto bilong ol i save bihainim. Mipela amamas long tok bilong Jehova i stap long Revelesen 21:8, em i tok ol man i save mekim pasin pamuk, na olgeta man i mekim tok giaman na ol kain pasin olsem, bai ol i bagarap na pinis olgeta. MIPELA GIVIM BEL LONG BIHAINIM ol lo bilong God long marit na long famili.
(6) MIPELA NOLAIK TRU long pasin pamuk bilong spirit em ol pris pasto bilong Bikpela Babilon i bin mekim inap planti handet yia pinis, em ol i wok wantaim ol hetman bilong graun long kisim bikpela namba na strong na bikpela mani, na ol i bin mekim hatpela pasin na daunim ol man nating. MIPELA PASIM TOK PINIS long helpim ol manmeri i gat gutpela bel bambai ol i ken bihainim tok bilong ensel long Revelesen 18:4 i tok: “Ol manmeri bilong mi, yupela i mas lusim dispela ples na i kam ausait.”
(7) MIPELA NOLAIK TRU long bikpela asua long blut em pasin pamuk bilong bikpela pamukmeri i as bilong en−em i bin pren wantaim ol gavman bilong dispela graun na long taim bilong yumi winim 100 milion manmeri i bin bagarap long ol pait. MIPELA AMAMAS, long wanem taim i laik kamap nau bilong God i givim strafe long Bikpela Babilon, olsem Revelesen 18:21-24 i tok.
Mipela ol Witnes Bilong Jehova MIPELA PILIM TRU GUTPELA WOK MIPELA INAP MEKIM NA MIPELA AMAMAS LONG MEKIM−Mipela amamas long tokim ol manmeri long olgeta hap bilong graun olsem “Bikpela bilong yumi [Jehova] wantaim Krais tupela i kamap king bilong olgeta graun” long yia 1914. (Revelesen 11:15) MIPELA PASIM TOK PINIS long wok i go yet na i no ken pret long tokim ol man long strafe Jehova i kolim bilong Bikpela Babilon, na long tokim ol manmeri olsem bikpela pait bilong God, em Amagedon, em i klostu pinis. MIPELA TINGTING PINIS long singaut strong long “olgeta lain man bilong olgeta graun, na bilong olgeta tok ples, na bilong olgeta kain skin,” na tokim ol long gutpela tok olsem: “Nupela skai na nupela graun” i laik kamap nau, na olgeta manmeri i bihainim tok bai ol i kisim blesing. (Revelesen 14:6; 21:1) MIPELA AMAMAS, long wanem dispela wok bilong autim tok i mekim na nau bikpela lain bilong olgeta hap, winim 3 milion, ol i kam bung wantaim mipela. Mipela olgeta wantaim ensel i flai i go namel long skai, mipela tok: “Taim i kamap pinis bilong God i skelim olgeta man long kot. Olsem na yupela i mas pret long [God] na litimapim nem bilong em. Yupela i mas lotu long God, em i bin wokim heven na graun na solwara na olgeta hul wara.”−Revelesen 14:7.
Ol Askim Bilong Stadi long “Wanpela Tokaut”:
1. Long nau ol Witnes Bilong Jehova i amamas long wanem samting?
2. Long olgeta wan wan bilong 7-pela hap bilong Tokaut, kolim (a) wanem samting ol Witnes Bilong Jehova i nolaik tru long en, (b) na wanem tokaut ol Witnes i mekim?
3. (a) Wanem wok ol Witnes Bilong Jehova i amamas long mekim? (b) Ol Witnes i pasim tok pinis long mekim wanem? (c) Na mipela tingting pinis tu long mekim wanem? (d) Ol Witnes Bilong Jehova i amamas long wanem samting? Ol i tokaut long wanem samting?