Sampela Ples Long Graun Bilong Promis

Gerisim—‘Long Dispela Maunten Mipela Mekim Lotu’

MERI i kam long hul wara long Sikar long hap bilong Samaria na em i painim Jisas i sindaun i stap, na Jisas i autim tok long em. Yu laik save gut long dispela stori?​—⁠Jon 4:​5-14.

Lukim tupela maunten long piksa. Ol i stap 50 kilomita lusim Jerusalem i go long hap bilong not.a Long han kais em Gerisim, i gat hap bus i stap long en, na i gat planti wara i kamap long graun, olsem na ol kaikai na gras samting i kamap gutpela. Ebal i stap long han sut, na i gat planti ston na no gat gras.

Namel em ples daun bilong Sekem, na ol gaden i save kamap gut long en. Abraham i bin malolo long dispela hap taim em i bin wokabaut i kam long Graun Bilong Promis, na em i wokim alta bilong Jehova, long wanem, long dispela hap Jehova i bin tok promis long givim dispela graun long ol tumbuna bilong Abraham. (Stat 12:​5-7) Taim Abraham i bin sanap antap long ol dispela maunten em inap lukim gut ol hap nabaut em Jehova i tok long en. Taun Sekem i stap long rot bung bilong rot i go long ol maunten na rot i go long nambis na ples daun bilong Jordan.

Alta bilong Abraham i stap, na Jekop i kisim hap graun hia tu na bai em i ken lotuim Jehova long en. Na Jekop i wokim hul wara long as bilong Maunten Gerisim. Planti handet yia bihain meri Samaria i tokim Jisas: “Tumbuna . . . Jekop em i givim dispela hul wara long mipela. Na em yet . . . i bin dring long dispela hul wara.” Na aposel Jon i bin kolim dispela hul wara olsem “hul wara, bipo Jekop i bin wokim.”

Josua i bin bringim ol Israel i kam long dispela hap, olsem Moses i bin tokim em long mekim, na Josua i wokim wanpela alta long Ebal. Yumi ken tingim sampela Israel i sanap long hap bilong Gerisim na sampela long hap bilong Tebal, na Josua i “ritim tok bilong God bai mekim gut long ol sapos ol i bihainim tru tok bilong God, na . . . God bai bagarapim ol sapos ol i sakim tok.” (Josua 8:​30-35; Lo 11:29) Na planti yia bihain Josua i tok: “Mi wantaim famili bilong mi, mipela bai lotu long [Jehova] tasol,” na ol Israel i tok ol tu bai mekim olsem. (Josua 24:​1, 15-18, 25) Tasol bihain ol i no mekim.

Na Jisas i bin kamapim dispela samting long meri Samaria. Abraham na Jekop na Josua i bihainim trupela lotu, tasol bihain i no gat trupela lotu moa long Samaria.

Lain Israel i bruk, na tenpela lain long hap bilong not i kirap lotuim bulmakau, olsem na long yia 740 paslain long Krais, Jehova i larim ol Asiria i daunim ol na karim sampela i go, na ol Asiria i kisim graun bilong ol na bringim ol haiden i kam, em ol i lotuim ol god giaman. Ating sampela i marit long ol Israel, na nau ol Samaria i kamap, na ol i save liklik long sampela samting bilong trupela lotu, tasol God i no amamas tumas long lotu bilong ol.​—⁠2 King 17:​7-33.

Ol Samaria i bilip long 5-pela hap tasol bilong Baibel, olsem long Stat i go inap long Lo. Ol i bin wokim haus lotu long Maunten Gerisim na dediketim long god Sus, tasol bihain ol man i bagarapim. Tasol Maunten Gerisim i bin stap yet olsem as bilong lotu bilong ol Samaria.

Long nau tu ol i save wokim bung bilong Pasova long Maunten Gerisim long olgeta yia, na ol i save kilim sampela sipsip, na ol i putim i go insait long wara i boil na bai ol i ken rausim gras bilong en, na bihain ol i kukim ol dispela sipsip, na long 12 klok biknait ol i kaikai. Lukim piksa bilong hetpris Samaria long han kais, em i karamapim laplap long het bilong em, na em i bosim bung bilong Pasova long Maunten Gerisim.

Meri Samaria i bin tokim Jisas olsem: “Ol tumbuna bilong mipela ol i save bung long dispela maunten [Gerisim] na mekim lotu.” Orait, nau Jisas i laik stretim tingting bilong meri na em i tok: “Taim i laik kamap na bai yupela i no lotu long Papa long dispela maunten . . . , na olgeta man i laik lotu tru bai ol i lotu long Papa long [spirit bilong ol yet (lukim mak olsem sta)] na long pasin [bilong tok] i tru.”​—⁠Jon 4:​20-24.

[Ol Futnot]

[Piksa Kredit Lain long pes 24]

Pictorial Archive (Near Eastern History) Est.

[Ol Piksa Kredit Lain long pes 25]

Garo Nalbandian

Garo Nalbandian