Sampela Ples Long Graun Bilong Promis

Berseba—Hul Wara i Helpim Ol Long i Stap Laip

‘KIRAP long taun Dan long hap not na i go inap long taun Berseba long hap saut.’ Dispela tok long Baibel i makim olgeta hap bilong Israel. Baibel i stori long gutaim i stap long taim Solomon i stap king na i tok: “Olgeta manmeri long olgeta hap bilong Juda na Israel [kirap long Dan i go inap long Berseba], ol i sindaun gut klostu long gaden wain na diwai fik bilong ol, na i no gat wanpela samting nogut i kamap long ol.”​—⁠1 King 4:​25; Hetman 20:⁠1.

Long hap bilong Dan bikpela ren i save kam daun, tasol long hap bilong Berseba, nogat. Long hap bilong Dan, wara i save kamap long graun na em i het bilong Wara Jordan, olsem yumi lukim long piksa long han sut. Tasol Berseba i stap long ples drai namel long nambis na hap saut bilong Raunwara Detsi.

Long hap bilong Berseba insait long wanpela yia, liklik ren tasol, olsem 15 i go inap 20 sentimita, i save kam daun. Lukim piksa bilong wanpela hip graun olsem liklik maunten i makim taun Berseba.a Long piksa antap yu inap lukim grinpela gras, olsem na yumi save ol i bin kisim dispela piksa long taim bilong ren. Tasol taim bilong ren i sotpela taim tasol. Graun klostu long Berseba i gutpela bilong planim wit na kon samting.

Dispela hap em i ples drai, olsem na taim Baibel i stori long taun Berseba em i stori long ol hul wara na ol lo bilong bosim ol dispela wara. Dispela taun i stap klostu long ol rot i brukim ol bikpela ples wesan nating long hap saut. Ol man i wokabaut long ol dispela rot wantaim ol animal bilong ol, ol i mas i gat wara bilong ol yet na ol animal. Long dispela hap, wara i no save kamap long graun, olsem na ol man i wokim hul wara. Tok Hibru beʼerʹ i makim hul ol i wokim bilong kisim wara insait long graun. Nem Berseba i olsem “Hul Wara Bilong Kontrak” o “Hul Wara Bilong Sevenpela.”

Abraham wantaim lain bilong em ol i bin sindaun longtaim long hap bilong Berseba na ol i save, ol hul wara i bikpela samting tru. Taim wokmeri bilong Sara, em Hagar, i ranawe i go long ples drai i no gat man, ating em i tingting long kisim wara long ol hul wara o long ol lain Beduin, em ol i save kisim wara long ol dispela hul​—⁠olsem dispela meri Beduin long piksa i stap antap long narapela pes, em i kisim wara long wanpela hul wara long hap bilong Sainai. Bihain Abraham i mas rausim Hagar wantaim pikinini man bilong em i save toknogutim Aisak, na Abraham i mekim pasin sori na givim wara long em bilong karim i go. Tasol taim wara i pinis, olsem wanem nau? “God i mekim ai bilong Hagar i op, na Hagar i lukim wanpela hul wara i stap. Na em i go pulimapim wara long skin meme.”​—⁠Stat 21:⁠19.

Abraham i kisim we dispela wara? Ating em i kisim long hul wara em yet i bin wokim na em i bin planim diwai tamarisk klostu long en. (Stat 21:​25-33) Sampela saveman i ting, Abraham i gat save na em i planim dispela kain diwai, long wanem, ol lip bilong en i liklik tru na san i no save pulim bikpela wara long en. Olsem na dispela diwai i save stap strong, maski em i ples drai.​—⁠Lukim piksa daunbilo.

Baibel i stori long wanpela tok i kamap namel long Abraham na king bilong Filistia, na i stori tu long hul wara Abraham i bin wokim. Hul wara em i bikpela samting long ol man, long wanem, i no gat planti wara long ol dispela hap, na i hatwok long digim graun na wokim. Olsem na wanpela man i no ken i go na kisim nating wara long en​—⁠em i mas kisim tok orait pastaim.​—⁠Lukim Namba 20:​17, 19.

Long arere bilong liklik maunten em Berseba i stap long en, i gat hul wara i stap. Ol man i bin wokim long hap i gat ston, na maus bilong hul (lukim piksa daunbilo) i gat ol ston bilong strongim. Ol saientis i tekewe graun arere long hul i go daun inap 30 mita, tasol ol i no kamap long as bilong hul. Wanpela i tok, ‘Mipela ting, dispela hul em i “Hul Wara Bilong Kontrak,” em Abraham na Abimelek i bin mekim kontrak klostu long en.’​—⁠Biblical Archaeology Review.

Bihain ol i wokim taun Berseba i go bikpela, na i gat strongpela banis na bikpela dua. Yumi save, dispela taun i stap longtaim na kamap bikpela, long wanem, ol inap kisim wara long dispela hul wara i daun moa.

[Ol Futnot]

[Piksa Kredit Lain long pes 24]

Pictorial Archive (Near Eastern History) Est.

[Piksa Kredit Lain long pes 25]

Pictorial Archive (Near Eastern History) Est.