Gutpela Tok i Kam Long Malawi!

LONG Novemba 15, 1993, gavman bilong Malawi, em wanpela kantri long saut-is Afrika, i orait long Sosaiti Was Taua bilong Pensilvenia na ol i rejistaim. Nau ol Witnes Bilong Jehova inap autim ol tok i tru bilong Baibel long Malawi, no gat tambu.

Bipo, long yia 1948, Sosaiti Was Taua i putim brens-ofis long Malawi bilong lukautim wok bilong ol Witnes long dispela kantri. Long Janueri 8, 1957, ol i rejistaim Sosaiti Was Taua long dispela kantri long namba wan taim. Inap sampela yia lain Witnes i wok long i go bikpela kwiktaim, tasol long yia 1964, ol man i kirap mekim nogut tru long ol. Wanem as bilong dispela?

Ol Witnes Bilong Jehova i save bihainim tok bilong God na ol i no insait liklik long ol wok politik. (Jon 17:⁠16) Sampela man i no amamas long dispela pasin bilong ol, maski Baibel i as bilong en, na ol i tok, ol Witnes i narapela kain lotu na ol i no bihainim lo. Olsem na sampela man i ting i stret ol i ken mekim nogut long ol dispela Kristen i no save pait. Ol i rausim planti Witnes long wok, na paitim ol, na mekim sampela samting moa bilong semim ol, na ol i pulim pikinini long han bilong sampela papamama Witnes.

Long yia 1972, winim 30,000 Witnes na sampela man i lainim Baibel wantaim ol, ol i ranawe lusim Malawi bilong abrusim bagarap. Planti tausen ol i go i stap long ol kem bilong ol ranaweman long Mosambik. Tasol long 1975, gavman bilong Mosambik i salim ol i go bek long Malawi, na ol man i mekim nogut gen long ol. Ol i putim planti long ol banis kalabus nogut. Dispela bikpela hevi i kamap na long dispela taim, gavman i rausim nem bilong Sosaiti Was Taua long rejista. Kirap long dispela taim ol i putim tambu long wok bilong ol Witnes Bilong Jehova na oganaisesen bilong ol.

Ol i mekim ol dispela samting nogut long ol Witnes, tasol ol Witnes i no bekim nogut long ol. Ol i no bung bung na kros long gavman na kirapim pait. Nogat. Ol i beten na holim strong lo Kristen i tok ol i mas aninit long “ol gavman.” (Rom 13:​1-7; 1 Timoti 2:​1, 2) Na tu, ol Witnes i bihainim ol stretpela pasin em Baibel i makim bilong ol Kristen. Ol i wokabaut stret na i stap olsem gutpela piksa tru.

Nau tambu i pinis na ol Witnes Bilong Jehova long Malawi i stap fri. Tingting bilong ol i kirap pinis long ol i mas wok strong i go long autim ol tok i tru bilong Baibel taim “ol man i redi long harim tok.”​—⁠2 Timoti 4:⁠2.

[Piksa long pes 31]

M. G. Henschel wantaim famili bilong Betel long Malawi long 1960 samting