Yu Ting Ol Mirakel Bilong Oraitim Ol Sik i Save Kamap Long Nau?
“BILIP long Jisas na sik bilong yu bai pinis!” Kain tok olsem i mekim na Alexandre, em bilong wanpela lotu Evanjelikal, em i bilip olsem sapos em i kisim marasin bilong stretim sik bilong em i olsem em i no gat strongpela bilip. Em i bilip strong olsem bilip bilong em bai mekim na long rot bilong mirakel sik bilong em bai pinis—maski long marasin. Benedita, em wanpela strongpela Katolik, taim em i harim olsem sampela mirakel bilong oraitim sikman i save kamap long ples holi bilong Aparesida do Note, long provins bilong Sau Paulo, Brasil, dispela i sutim tru bel bilong em. Taim Benedita i beten long Bikmeri Bilong Aparesida, na Antoni, na sampela narapela “santu,” em i bin mekim wok long sampela tok majik em kandere bilong em i bin lainim em long en, long wanem, em i laik kisim strong bilong oraitim ol sikman.
Long nau tu, planti man i bilip long ol mirakel bilong oraitim sik—tasol bilong wanem ol i bilip olsem? Ating planti i bel hevi, sapos ol dokta i no inap stretim sik, na pen, na hevi bilong famili bilong ol, na ol i bel hevi moa yet sapos em ol pikinini bilong ol. Ol man i gat bikpela sik ating ol i pilim olsem ol marasin samting long nau i gat bikpela pe tumas, olsem na sapos ol i go long wanpela man bilong oraitim sik long rot bilong bilip dispela i no inap nogutim ol. Sampela i lukim long televisen sampela lotu na man ol i tok ol inap oraitim sik AIDS, bel hevi, sik kensa, sik longlong, mak bilong blut i antap tumas, na planti ol narapela sik. Maski ol i bilip long ol dispela tok o nogat, ol i go lukim ol dispela man, long wanem, ol i pilim olsem i no gat narapela rot. Na sampela i bilip ol spirit nogut i as bilong sik bilong ol, olsem na ol i ting ol marasin ol dokta i save givim i no gat strong bilong helpim ol.
Tasol i gat sampela man ol i nolaik tru, na ol i tokaut strong olsem dispela tingting, olsem ol “santu” o ol man long nau ol inap oraitim sik long rot bilong mirakel, em i no stret. Nius Jornal da Tarde i tok, saveman Dráusio Varella i pilim olsem dispela tingting i “giamanim bilip bilong ol man i no was gut na ol man i strong tru long painim man bilong oraitim sik bilong ol.” Em i tok moa: “Ol i ting ol mirakel bai oraitim ol, olsem na ol i lusim ol marasin samting ol i mas kisim bilong stretim sik bilong ol, long wanem, ol man i giamanim ol.” Na The New Encyclopædia Britannica i tok: “Long bipo dispela pasin bilong oraitim sik long rot bilong mirakel ol i bin mekim long ol ples holi bilong ol na long ol pasin bilong lotu, na ol dokta i tok ol dispela kain pasin bilong oraitim sik, ol i mekim long rot bilong bosim tingting bilong man na long taim i gutpela long mekim olsem.” Tasol i gat planti ol i bilip olsem wanpela mirakel i bin oraitim sik bilong ol. Long tingting bilong ol, mirakel i bin helpim ol!
Ol man i save long Baibel, ol i save olsem planti taim Krais Jisas i bin oraitim ol sikman, na em i mekim dispela long “strong bilong God.” (Luk 9:42, 43) Olsem na ating ol i tingting olsem, ‘Strong bilong God i wok yet na ol man inap oraitim ol sik long rot bilong mirakel long nau?’ Sapos olsem, bilong wanem ol man i traim long oraitim sik long rot bilong mirakel ol i no inap mekim? Yu ting i olsem long wanem sikman i no gat strongpela bilip o em i no givim planti mani samting? Olsem wanem? I stret Kristen i gat bikpela sik o dokta i tok em i no inap stretim sik bilong em, em i ken go long wanpela man bilong oraitim sik long rot bilong mirakel? Na ol mirakel Jisas i bin mekim bilong oraitim man, yu ting bai ol i kamap gen? Yu inap painim bekim bilong ol dispela bikpela askim long stori i kamap bihain.