Tok Pait Bilong Kisim Ples “Holi”

LONG Julai 15, 1099, Namba Wan Pait Bilong Lotu em pop bilong Rom i bin givim tok orait long en i ken kamap, em i bin inapim wok bilong en long kisim na bosim Jerusalem. Dispela pait i nogut tru na planti man i bagarap! Namba wan gavman na ofisa bilong em, tupela tasol i bin abrusim bagarap. Ol i abrusim bagarap, long wanem, ol i bin givim bikpela mani bilong grisim ol ami na ol i no kilim ol. Long buk bilong em, The Crusades, pris Antony Bridge i stori long ol samting i bin painim ol lain Muslim na Juda i stap long taun: “Taim ol ami i go insait long taun, ol i gat bikpela laik tru long kapsaitim blut. . . . Ol i kilim i dai olgeta man, meri na pikinini ol i lukim long taun . . . Taim i no gat man moa i stap bilong ol i ken kilim, ol dispela lain i winim pait ol i mats i go daun long rot bilong taun . . . na ol i go long Haus Lotu Bilong Matmat Holi bilong tenkyu long God.”

Kirap long taim ol ami i daunim taun, ol lotu i gat nem Kristen ol i stap long Jerusalem na planti taim i gat kros pait namel long ol Katolik, ol Otodoks, na ol narapela lotu i tok ol i Kristen. Long 1850 i gat wanpela tok pait i bin kamap namel long ol bikman bilong ol kain kain lotu long ol ples holi long Jerusalem na ol ples klostu, na dispela i mekim na ol i kirap mekim dispela Pait Bilong Kraimia. Inglan, Frans, na lain Otoman i pait wantaim Rasia na ol i kilim i dai 500,000 manmeri.

Dispela pait i no pinisim kros namel long ol lotu i gat nem Kristen long kisim Jerusalem na ol ples holi bilong en. Ol lain Otoman em ol i bin bosim kantri long dispela taim, ol i traim long kamapim bel isi na ol i skelim ol dispela ples holi na givim hap long ol narapela narapela lotu. Long buk bilong em, This Is Jerusalem, saveman Menashe Har-el i tok: ‘Ol lain bilong Yunaitet Nesen i orait long bihainim dispela kain lo na dispela Tokaut Bilong Skelim Ol Samting ol i bin pasim long Novemba 1947. Olsem na em i wanpela lo bilong olgeta hap.’ Ol i mekim olsem na ol Katolik, ol Otodoks bilong Grik, ol Amenia, ol Siria, na ol Koptik i skelim na kisim hap hap bilong dispela Ples Holi. Bihain, ol Itiopia i tokim lain bilong ol long sindaun long ol liklik haus antap long het bilong haus na long dispela rot ol i tok ol i bosim dispela haus lotu. Planti man i tingim dispela ples holi olsem wanpela ples i holi tru bilong ol lotu i holim nating nem Kristen. I gat planti liklik piksa olsem ol haus lotu, ol imis, na ol piksa i pulap long en. Narapela ples holi, em Golgota; sampela Talatala i save tok olsem long dispela hap ol i bin kilim i dai Jisas na planim em, olsem na ol i ting olsem em wanpela ples holi.

Long bipo Jisas i bin tokim meri i bilip long ol ples holi olsem: “Wanpela taim i laik kamap na bai yupela i no lotu long Papa long dispela maunten, na bai yupela i no lotu long em long Jerusalem tu. . . . Olgeta man i laik lotu tru bai ol i lotu long Papa long strong bilong Holi Spirit na long pasin i tru.” (Jon 4:​21-​24) Olsem na ol Kristen tru i no save adorim ol ples holi. Bagarap i bin painim ol bikhet manmeri long Jerusalem long han bilong ol ami bilong Rom long yia 70 C.E., dispela i olsem tok lukaut i go long ol lotu i holim nating nem Kristen. Ol imis bilong ol, na pasin bilong brukim lain, na asua bilong planti blut ol i bin kapsaitim i kamapim klia olsem ol i holim nating nem Kristen. Olsem na ol bai kisim strafe long dispela bagarap em God i tok profet long givim long olgeta lotu insait long Bikpela Babilon.​—⁠KTH 18:​2-8.