Jehova Bai Tingim Yu Olsem Wanem?
“GOD, mi askim yu bai yu tingim . . . mi.” Planti taim Nehemia i mekim dispela beten bilong askim God long helpim em. (Nehemia 5:19; 13:14, 31) Em pasin bilong ol man olsem taim ol i bel hevi, ol i save tingim God na mekim ol kain beten olsem.
Tasol ol man i gat wanem tingting taim ol i askim God long tingim ol? Yumi save, ol i laik bai God i mekim sampela samting moa bilong tingim ol na i no olsem em i mas tingim nem bilong ol tasol. Ol i gat wankain tingting olsem bilong wanpela stilman i bin hangamap klostu long Jisas. Dispela stilman i no olsem narapela stilman, nogat. Em i tok long Jisas olsem: “Taim yu kamap king, yu ken tingting long mi.” Em i no laik bai Jisas i tingim nem bilong em tasol, nogat. Em i laik bai Jisas i mekim sampela samting bilong helpim em—Jisas i mas kirapim em bek long matmat.—Luk 23:42.
Planti taim Baibel i save kamapim olsem taim God i “tingting” long man, dispela i makim olsem em i save mekim sampela samting bilong helpim em. Olsem: Taim tait wara i karamapim pinis graun inap 150 de, “God i tingting long Noa. . . . na God i mekim win i ran antap long wara, na wara i go daun.” (Stat 8:1) Sampela handet yia bihain, ol Filistia i bagarapim ai bilong Samson na pasim hanlek bilong em, na em i beten olsem: “God, Bikpela, yu ken tingim mi nau. God, givim mi strong long dispela wanpela taim moa.” God i tingim Samson na givim em bikpela strong tru na bai em i ken bekim rong bilong ol birua bilong God. (Hetman 16:28-30) Na Jehova i bin blesim hatwok bilong Nehemia na em i kamapim bek lotu i tru long Jerusalem.
Aposel Pol i tok: “Olgeta tok bipo ol i bin raitim long buk bilong God, em ol i bin raitim bilong skulim yumi. Dispela tok i bilong strongim bel bilong yumi na mekim yumi sanap strong na wetim God i kisim yumi.” (Rom 15:4) Sapos yumi tingting long Jehova na yumi tingting long mekim laik bilong em, olsem ol gutpela wokboi bilong em long bipo ol i bin mekim, yumi inap bilip olsem Jehova bai tingim yumi na helpim yumi long ol samting yumi mas kisim long wan wan de, na em bai strongim yumi taim ol traim i painim yumi, na em bai lukautim yumi long taim em i givim strafe long ol man nogut.—Matyu 6:33; 2 Pita 2:9.