“Marasin Bilong Oraitim Bel-Baten Bilong Yu”
OL MAN i ting as bilong planti sik em ol tingting i stap long bel bilong man, olsem pasin bilong pret, bel hevi, bel kaskas, bel nogut, nolaik tru long narapela man, o bel bilong man i gat tok. Olsem na tok bilong Baibel i mekim gut bel bilong yumi taim em i tok, pasin bilong “pret long Jehova” em i “olsem marasin bilong oraitim bel-baten bilong yu na givim nupela strong long ol bun bilong yu.”—Sindaun 3:7, 8, NW.
Ol bun i mekim na bodi bilong man inap sanap stret. Olsem na Baibel i tok piksa long “ol bun” bilong makim insait tru bilong bel bilong man, olsem ol tingting bilong bel. Tasol olsem wanem pasin bilong pret long Jehova i “olsem marasin bilong oraitim bel-baten bilong yu”?
Ol saveman bilong Baibel i gat narapela narapela tingting long tok “bel-baten” i stap long dispela ves. Wanpela saveman i tok, “bel-baten” em i stap “long namel bilong bodi bilong man,” olsem na em i makim olgeta hap bilong bodi i gat bikpela wok. Narapela saveman i tok olsem dispela tok “bel-baten” em i makim rop bilong pikinini, olsem Esekiel 16:4 i tok long en. Sapos olsem, ating Sindaun 3:8 i kamapim klia olsem God tasol i mas helpim yumi, wankain olsem pikinini i stap long bel bilong mama i mas kisim kaikai samting long rot bilong mama tasol. Narapela tingting em olsem: Long dispela ves, tok “bel-baten” i makim ol masol na ol rop bilong masol bilong bodi. Sapos yumi skelim ol tok bilong dispela ves, ating dispela i soim olsem ol masol samting ol i narapela kain long “ol bun”—em ol strongpela samting bilong bodi.
Maski wanem insait tru bilong dispela ves, yumi ken save long dispela samting: Sapos yumi pret long Jehova yumi bihainim savepasin. Pasin bilong bihainim ol lo bilong God inap helpim skin bilong yumi long stap gut long nau. Na tu, em inap mekim na Jehova bai amamas long yumi, na long dispela rot yumi inap kisim laip oltaim na stap gut olgeta—long skin na long tingting—long nupela taim em bai kamapim.—Aisaia 33:24; KTH 21:4; 22:2.
[Piksa Kredit Lain long pes 32]
Dr. G. Moscoso/SPL/Photo Researchers