“Ol Pren Tru i Save Givim Pen”

APOSEL Pol i save em i gat wok long stretim ol Kristen bilong Galesia. Em i no laik bai ol i bel nogut long em, olsem na em i givim dispela askim long ol: “Tasol nau olsem wanem? Mi autim tok tru long yupela, na dispela i mekim mi i kamap birua bilong yupela, a?”​—⁠Galesia 4:⁠16.

Pol i “autim tok tru” long ol, tasol dispela i no mak olsem em i kamap birua bilong ol. Samting em i mekim i stret wantaim dispela tok bilong Baibel: “Ol pren tru i save givim pen long yu bilong helpim yu.” (Sindaun 27:⁠6) Pol i save olsem tok bilong em inap bagarapim bel bilong ol dispela man i gat asua. Tasol em i save sapos em i surik long stretim man i mekim sin, em bai pasim rot bilong dispela sinman long save long pasin sori bilong Jehova. (Hibru 12:​5-7) Pol i stap olsem wanpela gutpela pren i laik helpim tru dispela kongrigesen, olsem na em i no surik long kamapim sampela tok bilong stretim ol.

Long nau ol Witnes Bilong Jehova i laik inapim wok bilong ol long ‘mekim olgeta lain manmeri i kamap disaipel . . . na lainim ol long bihainim olgeta tok Jisas Krais i givim long ol.’ Taim ol i mekim dispela wok, ol dispela Kristen i strong long autim ol tok tru bilong Baibel i kamapim klia bilip kranki bilong sampela lotu, na ol pasin ol Kristen i no ken bihainim. (Matyu 15:9; 23:9; 28:​19, 20; 1 Korin 6:​9, 10) Taim ol i mekim olsem, ol Witnes i no laik kamap birua bilong ol man, nogat; ol i laik mekim pasin olsem pren tru long ol.

God i kirapim Man bilong raitim Song long tok: “Gutpela man i ken sori long mi na mekim save long mi na krosim mi. Tasol mi no ken pren wantaim ol man nogut. Long wanem, oltaim mi save beten long God long em i ken bekim pasin nogut bilong ol.”​—⁠Song 141:⁠5.