Askim

Olsem wanem dispela snek long gaden Iden i bin givim tingting long Iv long kalapim lo God i bin putim long diwai bilong givim save long wanem samting i gutpela na wanem samting i nogut?

Stat 3:1 i tok: “God, Bikpela i bin wokim olgeta animal, tasol i no gat wanpela bilong ol inap winim snek long tok gris. Na snek i askim meri olsem, ‘Ating God i tambuim yutupela long kaikai pikinini bilong olgeta diwai bilong gaden, a?’ ” Ol man i bin kamapim kain kain tok long olsem wanem dispela snek i bin mekim tok long Iv. Sampela man i tok em i bin mekim tok long rot bilong meknaisim bodi samting. Olsem: Wanpela pasto bilong Inglan, Joseph Benson, i tok: “I luk olsem em i bin mekim sampela kain mak. Sampela man i tok, long dispela taim bipo ol snek inap wokim tingting na mekim tok, . . . tasol i no gat samting bilong kamapim klia olsem dispela tok i tru.”

Tasol sapos snek i mekim wok long bodi bilong en tasol long toktok long Iv, olsem wanem bai em inap tokim Iv olsem sapos em i kaikai pikinini bilong diwai tambu, em bai kamap wankain olsem God na em yet inap makim wanem samting i gutpela na wanem samting i nogut? Na tu, Iv i toktok wantaim snek na em i bekim askim bilong en. (Stat 3:​2-5) Dispela tingting bilong ol man olsem snek i bin mekim tok long rot bilong meknaisim bodi samting, i makim olsem Iv i bekim tok bilong snek long rot bilong wokim han samting, tasol Baibel i tok em i bin toktok.

Aposel Pol i tingim dispela samting na em i givim tok lukaut long ol wanlain Kristen: “Mi ting long dispela snek i save tumas long pasin bilong giaman, na bipo tru em i bin giamanim Iv, na mi pret, nogut wankain samting i kamap long yupela. Nogut tingting bilong yupela i paul.” Samting inap bagarapim ol na Pol i tok lukaut long en, em ol “giaman aposel na giaman wokman.” Ol dispela “namba wan aposel” i no save mekim tok long han samting tasol bilong giamanim ol man, nogat. Ol i save mekim ol tok​​—⁠em ol tok gris bilong paulim ol narapela.​​—⁠2 Korin 11:​3-5, 13.

Tru, long gaden Iden, toktok i kamap long rot bilong snek i bin paulim Iv, tasol i no gat wanpela samting bilong kamapim klia olsem snek tru tru i gat hap bilong nek em krai bilong toktok i save kamap. I no gat wok long snek tru tru i mas i gat dispela samting. Taim ensel bilong God i toktok long Balam long rot bilong wanpela donki, i no gat wok long dispela animal i mas i gat hap bilong nek em krai bilong toktok i save kamap olsem bilong ol man. (Namba 22:​26-​31) Yumi save olsem “ol donki i no save toktok,” olsem na taim “wanpela donki i mekim toktok olsem man,” strong bilong mekim tok i kam long ples spirit.​​—⁠2 Pita 2:​16.

Baibel i kolim dispela spirit i bin mekim tok long rot bilong snek olsem “dispela snek bilong bipo yet, na ol i kolim em Satan na ‘Man I Save Kotim Olgeta Manmeri.’ ” (KTH 12:⁠9) Ol tok em Iv i harim na em i bekim tok, em i kam long Satan, em “i save senisim pasin bilong en na kamap olsem ensel bilong lait.”​​—⁠2 Korin 11:⁠14.

[Piksa long pes 27]

“Yutupela [bai] i kisim save long wanem samting i gutpela, na wanem samting i nogut, na bai yutupela i kamap wankain olsem God”