‘Pasin Bilong Mipela Long Laikim Tru Ol Narapela i Bin Kamap Strong Tru’
LONG Fraide, Mas 31, 2000, maunten Usu long Hokkaido, Japan, i pairap. Inap 23 yia olgeta em i no bin pairap. Dispela i mekim na planti tausen man i mas ranawe lusim dispela hap em ol inap kisim bagarap long en. Planti man i lusim haus na wok mani bilong ol, tasol gutpela tru i no gat wanpela i dai. Namel long ol lain i mas ranawe i gat 46 Witnes Bilong Jehova, tasol ol Witnes i bin kisim helpim.
Long dispela de stret em maunten i pairap, wanpela wokman Kristen i mekim wok bilong raun, em i stretim wok bilong helpim ol brata. I no longtaim na ol kongrigesen i stap klostu ol i salim ol kaikai samting bilong helpim ol dispela brata. Kwiktaim brens-ofis bilong Japan i kamapim wanpela komiti bilong helpim ol brata, na ol Witnes Bilong Jehova long olgeta hap bilong Japan ol i salim mani bilong helpim ol. Bilong strongim ol wok bilong spirit, ol brata i salim ol Witnes Bilong Jehova em ol i save autim tok fultaim, i go long kongrigesen i bin kisim bikpela hevi moa, na wasman sekit i go planti taim long dispela hap bilong strongim ol brata long ol samting bilong spirit na bilong bel.
Ol Witnes long hap em bagarap i bin kamap long en, ol i mekim yet ol miting Kristen long dispela taim bilong hevi, na ol i bung long ol haus bilong ol brata long hap i no bagarap. Taim ol i toksave olsem i orait long ol man i ken i go sindaun gen long hap em Haus Kingdom i stap long en, ol brata i go bek na ol i lukim olsem Haus Kingdom i bagarap. Klostu long hap Haus Kingdom i stap long en, bikpela smok i wok long kam ausait yet long wanpela nupela hul i kamap long maunten. Ol Witnes i tingting, ‘I gutpela long mipela i mekim yet ol miting long dispela hap? I gat rot bilong stretim Haus Kingdom?’
Ol i pasim tok long wokim nupela Haus Kingdom long wanpela hap i stap klostu na i no bagarap. Komiti Bilong Wokim Ol Haus Kingdom i helpim ol long mekim dispela wok. Bilong wokim dispela Haus Kingdom, ol i mekim wok long kontribiusen ol Witnes long olgeta hap bilong kantri i bin givim. Ol i painim kwik wanpela hap graun, na planti handet volantia i helpim dispela wok, olsem na ol i pinisim wok bilong sanapim nupela Haus Kingdom insait long sotpela hap taim tasol. Long Sande, Julai 23, 2000, inap 75 manmeri i kam long namba wan miting ol i mekim long dispela nupela Haus Kingdom. Aiwara bilong amamas i pundaun long ai bilong planti bilong ol dispela man i bung. Taim ol i dediketim dispela Haus Kingdom long Oktoba bilong dispela wankain yia yet, wanpela elda bilong kongrigesen long dispela hap em i tok: “Taim maunten i pairap, dispela i bin givim bikpela hevi long mipela. Tasol wok bilong sanapim dispela Haus Kingdom i bin daunim pret bilong mipela na i givim bikpela amamas long mipela. Pasin bilong mipela long laikim tru Jehova na ol gutpela brata Kristen i bin kamap strong tru!”
[Piksa Kredit Lain long pes 19]
Eruption of Mount Usu: AP Photo/Koji Sasahara