Askim

Olsem wanem? Yu ting i orait sapos wanpela Kristen tru i go long bung bilong planim man o bung bilong marit long wanpela haus lotu?

Jehova i no orait long yumi insait long wanpela pasin bilong lotu giaman, na yumi mas abrusim dispela pasin. (2 Korin 6:​14-​17; KTH 18:4) Bung long haus lotu bilong planim man i dai pinis i olsem wanpela pasin bilong mekim lotu na planti taim ol i mekim wanpela tok long en i kamapim sampela tingting i no stret wantaim Baibel, olsem man i gat wanpela spirit i no save dai na ol gutpela man i save go long heven. Na ating ol bai mekim mak bilong kruse na pris bai kolim wanpela beten na olgeta man i mas kolim wantaim. Na long ol bung bilong marit long haus lotu o long narapela hap, long dispela taim tu ol i save mekim ol beten na sampela narapela pasin bilong lotu i no stret wantaim ol tok bilong Baibel. Taim Kristen i stap wantaim wanpela lain we olgeta man i save insait long sampela pasin bilong lotu i no stret, ating bai i hatwok long em i abrusim ol dispela pasin. I no gutpela long go long wanpela bung we ol narapela inap subim wanpela Kristen long insait long ol dispela kain pasin, a?

Tasol olsem wanem sapos wanpela Kristen i ting olsem em i mas i go long wanpela bung bilong planim man i dai pinis o wanpela bung bilong marit long haus lotu? Olsem: Poroman marit i no stap long tok i tru inap strong long meri Kristen i mas go wantaim em long dispela bung. Olsem wanem? Meri inap go wantaim em na stap nating tasol? Ating meri i tingim laik bilong man bilong em na i go wantaim em, tasol meri i tingting strong long em yet i no ken insait long sampela pasin bilong lotu. O ating em i pasim tok long bel olsem em i no inap i go, long wanem, dispela bai putim bikpela hevi tumas long em yet​—nogut em bai mekim sampela samting i no stret wantaim ol stiatok bilong God. Em yet i mas skelim wanem samting em i laik mekim. Tasol em i laik bel bilong em i ken stap gut, na bel i no gat tok.​​—1 Timoti 1:​19.

Tasol maski em i mekim wanem samting, gutpela em i tokim poroman marit bilong em olsem em i no inap insait long sampela pasin bilong lotu o long ol singsing bilong lotu o daunim het long taim ol i beten. Taim man hia i tingim ol dispela tok, em inap ting olsem sapos meri bai kam long bung dispela inap givim hevi long em. Olsem na ating em yet tasol i laik i go, long wanem, em i laikim tru meri bilong em, na em i rispektim ol bilip bilong meri, o em i laik abrusim ol samting inap kamap na em bai kisim sem long en. Tasol sapos em i strong long meri i mas i go wantaim em, ating meri bai i go na lukluk tasol.

Na tu, sapos meri hia i go long wanpela bung long haus lotu em i mas skelim olsem dispela bai mekim wanem long ol wanbilip. Olsem wanem? Em inap bagarapim bel bilong sampela? Em inap mekim na sampela wanbilip bai i no strong moa long sakim olgeta pasin bilong lotu giaman? Aposel Pol i tok: “Yupela inap long skelim gut olgeta pasin na kisim ol pasin i gutpela tru. Na long De bilong Krais i kotim ol manmeri, yupela bai i stap klin tru na i no gat asua long wanpela samting.”​​—Filipai 1:10.

Sapos dispela bung i bilong wanpela wanblut stret, ating famili inap subim yumi moa yet. Tasol maski em bung bilong wanpela wanblut o nogat, Kristen i mas skelim gut olgeta samting. Long sampela taim wanpela Kristen inap ting olsem i no gat wanpela hevi bai kamap sapos em i go long wanpela bung bilong planim man o long wanpela bung bilong marit long haus lotu na stap nating tasol. Tasol long sampela taim pasin bilong em long go long wanpela bung olsem, dispela inap mekim na bel bilong em bai i gat tok, o bel bilong ol narapela bai i gat tok, na dispela em i bikpela samting moa long tingim, winim gutpela samting Kristen inap kisim sapos em i go long bung. Tasol maski wanem samting i kamap, Kristen i mas was gut na bai samting em i tingting long mekim i helpim em long stap gut long ai bilong God na ol man, na bel bilong em i no gat tok.