Yu Save Pilim Tru Pasin Sori Bilong God?
WANPELA taim Jop i stori long i stap bilong ol man i gat sin, em i tok: “Mipela ol manmeri i save stap sotpela taim tasol long graun, na stat long taim mama i karim mipela, ol kain kain trabel i save kamap long mipela. Mipela i olsem ol plaua i kamap long moningtaim na long apinun ol i drai pinis. Na tu mipela i olsem tewel san i mekim i kamap, na i save pinis kwik taim klaut i karamapim lait bilong san.” (Jop 14:1, 2) I stap bilong man, olsem Jop i bin pilim, i gat planti hevi. Sampela taim yu pilim olsem?
Tasol maski kain kain hevi i painim yumi, yumi ken wetim gutpela samting bai kamap, em pasin sori bilong God i as bilong en. Namba wan samting, em Papa bilong yumi long heven i givim Jisas olsem ofa bilong baim bek ol man long sin. Long Jon 3:16, 17, Jisas Krais i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim. God i no salim Pikinini bilong en i kam long graun bilong skelim pasin bilong ol manmeri bilong graun olsem jas. Nogat. Em i salim em i kam bilong kisim bek ol.”
Tingim tu gutpela tingting bilong God long yumi ol man i gat sin. Aposel Pol i tok: “Long wanpela tumbuna tasol em i bin mekim olgeta lain manmeri i kamap. Na em i putim ol i stap long olgeta hap bilong graun. Em yet i bin makim taim bilong ol i ken i stap, na em i bin putim mak bilong graun bilong ol. God i laik bai ol manmeri i ken kam long em na save tru long em, olsem na em i putim ol i stap, bai ol i ken wok long painim em. Tasol em i no i stap longwe long yumi olgeta wan wan.” (Aposel 17:26, 27) Tingim dispela! Maski yumi gat sin, yumi inap pas gut wantaim Man bilong wokim yumi, em God Jehova.
Yumi inap bilip olsem gutpela samting bai kamap long bihain, na yumi save olsem God i tingim tru yumi na i givim ol samting bilong helpim yumi long olgeta taim bihain. (1 Pita 5:7; 2 Pita 3:13) Olsem na i gat as tru na yumi mas kisim sampela save moa long God bilong yumi long rot bilong stadi long Tok bilong em, Baibel.