Ol i Amamas Long Ol i Lain Long Rit!

LONG sampela hap bilong ol ailan Solomon, inap 80 pesen bilong ol lain i Witnes Bilong Jehova, ol i gat hevi olsem ol i no save long rit rait. Dispela i mekim na ol i no insait tumas long ol miting bilong kongrigesen i save kamap long olgeta wik, na tu dispela i givim bikpela hatwok long ol long skulim ol narapela long tok i tru bilong Kingdom. Ol manmeri i bikpela pinis na ol i no bin holim pensil bipo, yu ting ol inap lain long rit?

Long ol skul bilong lainim ol man long rit rait long klostu olgeta kongrigesen bilong ol Witnes Bilong Jehova long ol ailan Solomon, ol i bin yusim buklet Wok Strong Long Lain Long Rit na Rait em ol Witnes Bilong Jehova i wokim. Ol dispela ekspiriens i soim olsem wanem planti handet manmeri i bin kisim helpim long save gut long rit rait long rot bilong dispela program. Na bikpela samting moa, pasin bilong lain long rit i bin helpim ol long mekim gut moa wok bilong autim bilip bilong ol.​​—⁠1 Pita 3:​15.

Wanpela misineri em ol i bin salim em long mekim wok long wanpela kongrigesen i gat winim wan handet pablisa bilong autim tok bilong Kingdom, em i luksave olsem long taim bilong stadi long Baibel long rot bilong Wastaua, i no planti manmeri i gat dispela nius na wan wan tasol i bekim tok. Wanem as bilong dispela? Ol i no save long rit rait. Taim kongrigesen i toksave olsem ol i laik kamapim wanpela skul bilong lainim ol man long rit rait, dispela misineri i amamas long volantia long kamap tisa. Pastaim wan wan sumatin tasol i kam long skul, tasol bihain winim 40 manmeri i gat kain kain krismas ol i kam.

Wanem ol samting i kamap? Misineri i tok: “Bihain liklik long skul i bin kirap, mi go long maket long 6 klok long moningtaim bilong baim sampela kaikai bilong haus misineri. Long maket mi lukim sampela sumatin, em sampela bilong ol i yangpela tru, ol i salim kokonas na ol kumu samting. Bilong wanem? Long wanem, ol i laik kisim inap mani long baim pen na notbuk bilong yusim long taim bilong skul! Na tu, taim ol i kam long skul dispela i kirapim ol long kisim Wastaua bilong ol yet.” Em i tok moa: “Nau long taim bilong Stadi Wastaua bilong kongrigesen, ol yangpela na lapun i bekim tok na stadi i kamap gutpela.” Dispela misineri i amamas tru taim fopela sumatin i askim em sapos ol inap insait long wok autim tok, long wanem, olsem ol yet i tok, ol i “no pret moa.”

Ol sumatin bilong dispela skul i lain long rit rait, tasol ol narapela gutpela samting tu i kamap. Olsem: Inap planti yia, pasin bilong meri bilong wanpela Witnes i no bilip, i mekim na kongrigesen i tingting planti. Ol liklik samting i kirapim em long tromoi ston long ol manmeri na em i save paitim ol narapela meri long wanpela hap diwai. Sampela taim em i go long ol miting Kristen wantaim man bilong em, em i jeles tru long man, olsem na man i putim sanglas bambai meri i no ken sutim tok long em olsem em i lukluk long ol narapela meri.

Tasol bihain liklik long taim skul i bin kirap, dispela meri i kam askim isi olsem: “Inap mi joinim klas?” Bekim em yes. Kirap long dispela taim em i no lusim skul o wanpela miting bilong kongrigesen. Em i wok hat long taim bilong lain long rit na em i lain gut long rit, na dispela i mekim na em i amamas tru. Na bihain em i askim olsem: “Inap mi stadi long Baibel?” Man bilong em i amamas long kirap stadi wantaim em, na meri i wok long lain long rit rait gut na save gut moa long Baibel.

Man i gat 50 krismas na em i no bin holim wanpela pensil bipo, na taim em i holim pensil bilong raitim ol leta bilong ABC, em i wanpela bikpela hatwok tru. Ol buk i gat wara i kamap long pinga bilong sampela taim ol i lain nupela long holim pensil na rait long pepa. Inap sampela wik ol i taitim bun long holim na bosim gut pensil, na bihain sampela sumatin i gat bikpela smail long pes na ol i tok: “Nau mi no gat hatwok long rait long pepa!” Taim ol tisa i lukim ol sumatin i lain gut, dispela i mekim ol tu i amamas. Wanpela tisa i tok: “Wok bilong skulim klas i wanpela wok bilong amamas, na ol sumatin i amamas long dispela samting Jehova i givim ol, na planti taim long pinis bilong klas ol i save paitim han bilong kamapim dispela amamas bilong ol.”

Ol misineri wantaim ol dispela Witnes i save nau long rit rait ol i amamas. Bilong wanem? Long wanem, nau ol inap mekim wok long dispela save bilong rit rait bilong givim biknem long Jehova.

[Ol Piksa long pes 8, 9]

Ol yangpela wantaim lapun i amamas long skul bilong lain long rit rait